ടൊറന്റോ: യു എസ് പ്രസിഡന്റ് ഡൊണള്‍ഡ് ട്രംപ് ചുമത്തിയ തീരുവകളുടെ അനിശ്ചിതത്വം നേരിടാന്‍ കാനഡയുടെ ഊര്‍ജ മേഖലയില്‍ നിന്ന് കൂടുതല്‍ പിന്തുണ നേടാന്‍ ശ്രമം നടത്തി പ്രധാനമന്ത്രി മാര്‍ക്ക് കാര്‍നി. ആല്‍ബര്‍ട്ട പ്രീമിയറുമായുള്ള പുതിയ ധാരണാപത്രത്തില്‍ കാര്‍നി ഒപ്പുവെച്ചിട്ടുണ്ട്. ഇത് ഊര്‍ജ ഉത്പാദനത്തില്‍ നിക്ഷേപം പ്രോത്സാഹിപ്പിക്കുന്നതിന് ചില കാലാവസ്ഥാ നിയമങ്ങളില്‍ ഇളവ് വരുത്തുകയും പാശ്ചാത്യ തീരത്തേക്കുള്ള പുതിയ എണ്ണ പൈപ്പ്ലൈന്‍ പദ്ധതിക്ക് കൂടി മുന്നൊരുക്കം നടത്തുകയും ചെയ്യുന്നു.
കരാറിന്റെ ഭാഗമായി ഫെഡറല്‍ സര്‍ക്കാര്‍ എണ്ണ- വാതക മേഖലയില്‍ കൊണ്ടുവരാനിരുന്ന നിയന്ത്രണങ്ങള്‍ മാറ്റുകയും ശുദ്ധ വൈദ്യുതി സംബന്ധിച്ച ചില നിയന്ത്രണങ്ങള്‍ ഒഴിവാക്കുകയും ചെയ്യും. ഇതിന് പകരം ഏറ്റവും കൂടുതല്‍ എണ്ണ ഉത്പാദിപ്പിക്കുന്ന ആല്‍ബര്‍ട്ട പ്രവിശ്യം വ്യവസായിക കാര്‍ബണ്‍ പ്രൈസിംഗിനെ കൂടുതല്‍ ശക്തിപ്പെടുത്താനും കാര്‍ബണ്‍ ക്യാപ്ചര്‍ ആന്റ് സ്റ്റോറേജ് പദ്ധതിക്ക് പിന്തുണ നല്‍കാനും സമ്മതിച്ചിട്ടുണ്ട്.
നിലവില്‍ കാനഡയുടെ എണ്ണ കയറ്റുമതിയുടെ 90 ശതമാനവും യു എസ് ഏറ്റെടുക്കുന്ന സാഹചര്യത്തില്‍ ആമേരിക്കന്‍ വിപണിയില്‍ നിന്നുള്ള ആശ്രയം കുറയ്ക്കാന്‍ കാര്‍നി ആഗ്രഹിക്കുന്നു. കല്‍ഗറിയില്‍ നടന്ന വ്യവസായ സമ്മേളനത്തില്‍ സംസാരിച്ച കാര്‍നി യു എസ് തീരുവകളും അതുമായി ബന്ധപ്പെട്ട അനിശ്ചിതത്വവും കാനഡയുടെ സമ്പദ്വ്യവസ്ഥയ്ക്ക് 50 ബില്യണ്‍ ഡോളറിന്റെ നഷ്ടമുണ്ടാക്കുമെന്ന് പറഞ്ഞു. അതായത് ഓരോ കാനഡക്കാരനും 1,300 ഡോളറിന്റെ ബാധ്യതയാണെന്ന് പ്രധാനമന്ത്രി വ്യക്തമാക്കി.
വളര്‍ച്ച പ്രോത്സാഹിപ്പിക്കുന്നതും യു എസ് ആശ്രയം കുറയ്ക്കുന്നതുമായ പുതിയ പദ്ധതികള്‍ ന
പ്പാക്കേണ്ടത് അനിവാര്യമാമെന്നും കാനഡയുടെ മേഖലകളെ സംരക്ഷിക്കാനും പുതിയ ആഗോള സമ്പദ്വ്യവസ്ഥയ്ക്ക് അനുയോജ്യമായി പുനഃസ്ഥാപിക്കാനും സര്‍ക്കാര്‍ ആവശ്യമായ എല്ലാം ചെയ്യുമെന്നും കാര്‍നി മാധ്യമ പ്രവര്‍ത്തകരോട് പറഞ്ഞു.
ഊര്‍ജ കരാര്‍ എണ്ണ വ്യവസായം സ്വാഗതം ചെയ്‌തെങ്കിലും പരിസ്ഥിതി പ്രവര്‍ത്തകര്‍ കടുത്ത വിമര്‍ശനവുമായി രംഗത്തെത്തി. ഇത് കാനഡയുടെ ഊര്‍ജ നയത്തില്‍ ഫോസില്‍ ഇന്ധന വികസനത്തിന് അനുകൂലമായ മാറ്റമാണെന്നും കാര്‍നിയുടെ ന്യൂനപക്ഷ സര്‍ക്കാരിനുള്ളില്‍ തന്നെ വിരോധം സൃഷ്ടിച്ചിരിക്കുകയെന്നും വിലയിരുത്തപ്പെടുന്നു.
മുന്‍ പ്രധാനമന്ത്രി ജസ്റ്റിന്‍ ട്രൂഡോയുടെ ഭരണത്തില്‍ പരിസ്ഥിതി മന്ത്രിയായിരുന്ന സ്റ്റീവന്‍ ഗില്‍ബോള്‍ട്ട് കാനഡയുടെ കാലാവസ്ഥാ പദ്ധതി തകരുന്നതായി ആരോപിച്ച് മന്ത്രിസഭയില്‍ നിന്ന് രാജിവെച്ചു. ട്രൂഡോ കൊണ്ടുവന്ന ചില പരിസ്ഥിതി നിയന്ത്രണങ്ങളില്‍ ഇളവ് വരുത്തിയെങ്കിലും 2050ഓടെ നെറ്റ് സീറോ വാഗ്ദാനം തുടരണം എന്ന് ആവര്‍ത്തിച്ചു.
ഈ കരാറില്‍ ശുദ്ധ വൈദ്യുതി സംബന്ധിച്ച നിയമങ്ങളും ഒഴിവാക്കിയിട്ടുണ്ട്. യു എസ് വ്യാപാര അസ്ഥിരതയുടെ പശ്ചാത്തലത്തില്‍ എണ്ണ കയറ്റുമതി വിപണികളെ വൈവിധ്യവത്ക്കരിക്കുകയാണ് കാനഡയുടെ ലക്ഷ്യം.
യു എസ് തീരുവകള്‍ ഗുരുതരമായി ബാധിച്ച സ്റ്റീല്‍, മരം മേഖലകളെ രക്ഷിക്കാന്‍ കാര്‍നി നിരവധി നടപടികള്‍ പ്രഖ്യാപിച്ചിരുന്നു. സ്റ്റീല്‍ ഉത്പന്നങ്ങള്‍ക്ക് പുതിയ തീരുവ, വിദേശ സ്റ്റീലിന്റെ ഇറക്കുമതിക്കുള്ള നിയന്ത്രണം, സ്റ്റീല്‍- മരം റെയില്‍ ഗതാഗത ചെലവ് കുറയ്ക്കല്‍ എന്നിവയാണ് പ്രധാന നീക്കങ്ങള്‍.
സ്റ്റീല്‍ ഉത്പന്നങ്ങളില്‍ പ്രിഫാബ്രിക്കേറ്റഡ് ബില്‍ഡിംഗുകള്‍, വയര്‍, ഫാസ്റ്റനറുകള്‍ തുടങ്ങിയവയില്‍ 25 ശതമാനം തീരുവ ചുമത്തുമെന്ന് കാര്‍നി അറിയിച്ചു. ഇവയില്‍ 40 ശതമാനം ഉത്പന്നങ്ങളും യു എസില്‍ നിന്നാണ് വരുന്നത്. ഇതിനകം തന്നെ യു എസ് സ്റ്റീലിന് കാനഡ 25 ശതമാനം തീരുവ ചുമത്തിയിട്ടുണ്ട്.
കാര്‍നി അടുത്തിടെ പ്രസിഡന്റ് ട്രംപുമായി സംസാരിച്ചെങ്കിലും അത് വാര്‍ത്താപ്രാധാന്യമുള്ളതല്ലെന്നും ഇപ്പോള്‍ രണ്ട് രാജ്യങ്ങള്‍ തമ്മില്‍ സംവാദങ്ങള്‍ നടക്കുന്നില്ലെന്നും അദ്ദേഹം വ്യക്തമാക്കി. എന്നാല്‍ യു എസ്- കാനഡ ബന്ധം മെച്ചപ്പെടുത്തണമെന്നതില്‍ താന്‍ പ്രതിബദ്ധനാണെന്നും കാര്‍നി കൂട്ടിച്ചേര്‍ത്തു.