ന്യൂയോര്‍ക്ക്: ന്യൂയോര്‍ക്കിലെ ലോവര്‍ മാന്‍ഹട്ടനില്‍ ഐസിഇ യുടെ (Immigration and Customs Enforcement – ICE) സാന്നിധ്യം ഉണ്ടാകുമെന്ന ആശങ്ക ഉയര്‍ന്നതിനെ തുടര്‍ന്ന് നടന്ന പ്രതിഷേധത്തില്‍ നിരവധി പേര്‍ അറസ്റ്റിലായി. ചൈനാടൗണിനടുത്തുള്ള സെന്റര്‍ സ്ട്രീറ്റില്‍ വാഹനങ്ങള്‍ തടഞ്ഞുനിര്‍ത്തി 'ഐസ് ന്യൂയോര്‍ക്കിന് പുറത്തുപോവുക ' എന്ന മുദ്രാവാക്യം മുഴക്കിയ പ്രതിഷേധക്കാരെയാണ് പൊലീസ് കസ്റ്റഡിയിലെടുത്തത്.
ഗാരേജില്‍ നിന്ന് പുറത്ത് വരുന്ന ഒരു വാന്‍ പ്രതിഷേധക്കാര്‍ തടയുന്നതായി ദൃശ്യങ്ങള്‍ കാണിക്കുന്നു. ഇടംവിട്ടു പോകാന്‍ പല തവണ മുന്നറിയിപ്പ് നല്‍കിയെങ്കിലും അവര്‍ അനുസരിച്ചില്ലെന്നാണ് ന്യൂയോര്‍ക്ക് പൊലീസ് ഡിപ്പാര്‍ട്ട്‌മെന്റിന്റെ വിശദീകരണം. അറസ്റ്റ് ചെയ്തവരുടെ കൃത്യമായ എണ്ണം, ഏത് വകുപ്പുകളാണ് ചുമത്തിയത് എന്നൊന്നും പൊലീസ് ഇതുവരെ വ്യക്തമാക്കിയിട്ടില്ല.
മാസങ്ങള്‍ക്ക് മുന്‍പ് കനാല്‍ സ്ട്രീറ്റില്‍ ഫെഡറല്‍ ഏജന്റുകള്‍ നടത്തിയ റെയ്ഡില്‍ ഒന്‍പത് പേരെ പിടികൂടിയിരുന്നു. ആ റെയ്ഡില്‍ നാല് അമേരിക്കന്‍ പൗരന്മാരെയും ഫെഡറല്‍ കുറ്റങ്ങള്‍ ചുമത്താതെ 24 മണിക്കൂറോളം തടവിലിട്ടുവെന്നായിരുന്നു പ്രദേശത്തെ കോണ്‍ഗ്രസ് അംഗം ഡാന്‍ ഗോള്‍ഡ്മാന്റെ ആരോപണം.
ഐസ് സാന്നിധ്യം സംബന്ധിച്ച ചോദ്യങ്ങള്‍ക്ക് പ്രതികരിക്കാന്‍ ന്യൂയോര്‍ക്ക് പോലീസ് ഡിപ്പാര്‍ട്ട്‌മെന്റ് തയ്യാറായില്ല. അതേസമയം, ഡിപ്പാര്‍ട്ട്‌മെന്റ് ഓഫ് ഹോംലാന്‍ഡ് സെക്യൂരിറ്റിയും പ്രതികരണം നല്‍കിയിട്ടില്ല.
ചൈനാടൗണില്‍ ഐസ് റെയ്ഡ് ഭീഷണി- പ്രതിഷേധക്കാര്‍ അറസ്റ്റില്‍; ലോവര്‍ മാന്‍ഹട്ടനില്‍ വന്‍ കലഹം
