വാഷിംഗ്ടണ്‍: ഇന്ത്യയും അമേരിക്കയും തമ്മിലുള്ള വ്യാപാര കരാര്‍ സംബന്ധിച്ച ചര്‍ച്ചകള്‍ തുടരുകയാണെന്നും എന്നാല്‍ ഉടന്‍ ധാരണയിലെത്തുമെന്ന് പ്രതീക്ഷിക്കാനാകില്ലെന്നും യു എസ് വ്യാപാര പ്രതിനിധി ജാമിസണ്‍ ഗ്രീര്‍. കരാറുമായി ബന്ധപ്പെട്ട് ഇരുരാജ്യങ്ങളും തമ്മില്‍ ഇപ്പോഴും പരിഹരിക്കാനുള്ള ചില പ്രധാന വിഷയങ്ങള്‍ അവശേഷിക്കുന്നുണ്ടെന്നും അദ്ദേഹം പറഞ്ഞു. ഇന്ത്യന്‍ വാര്‍ത്താ ഏജന്‍സിയായ എ എന്‍ ഐയുടെ ചോദ്യത്തിന് മറുപടിയായാണ് ഗ്രീറിന്റെ പ്രതികരണം.
അമേരിക്കന്‍ പ്രസിഡന്റ് ഡൊണാള്‍ഡ് ട്രംപും ഇന്ത്യന്‍ പ്രധാനമന്ത്രി നരേന്ദ്ര മോഡിയും തമ്മില്‍ നടത്തിയ ഫോണ്‍ സംഭാഷണത്തിന് പിന്നാലെയാണ് ഗ്രീറിന്റെ പ്രതികരണം. ഫോണ്‍ സംഭാഷണം വളരെ ക്രിയാത്മകമായിരുന്നു എന്ന് അദ്ദേഹം വിശേഷിപ്പിച്ചു.
വ്യാപാര കരാര്‍ ചര്‍ച്ചകള്‍ക്കായി യു എസിലെത്തിയ കേന്ദ്ര വാണിജ്യമന്ത്രി പീയുഷ് ഗോയലുമായി ഗ്രീര്‍ ഉഭയകക്ഷി കൂടിക്കാഴ്ചയും നടത്തി. മില്‍വാക്കിയില്‍ നടക്കുന്ന ജി20 വ്യാപാര മന്ത്രിമാരുടെ യോഗത്തിലും ഗോയല്‍ പങ്കെടുക്കുന്നുണ്ട്.
അതേസമയം, ഇന്ത്യ- യു എസ് ഉഭയകക്ഷി വ്യാപാര കരാറിന്റെ ഭാഗമായി പരസ്പരം പ്രയോജനകരമായ ഇടക്കാല ധാരണയില്‍ വേഗത്തില്‍ എത്തുന്നതിനാണ് ചര്‍ച്ചകളുടെ പ്രധാന ലക്ഷ്യമെന്ന് ഗോയല്‍ സമൂഹമാധ്യമ കുറിപ്പില്‍ വ്യക്തമാക്കി. ഇതോടെ ചര്‍ച്ചകളില്‍ പുരോഗതിയുണ്ടെന്ന സൂചനയാണ് ഗോയല്‍ നല്‍കിയത്.
പരിഹരിച്ച വിഷയങ്ങളാണ് ഗോയല്‍ പ്രധാനമായും ചൂണ്ടിക്കാണിക്കുന്നത്. ഗ്രീര്‍ പരിഹരിക്കാനുള്ള വിഷയങ്ങളെയാണ് ചൂണ്ടിക്കാണിക്കുന്നത്. ഏത് വ്യാപാര കരാറിലെയും അവസാന ഘട്ടത്തിലെ വിഷയങ്ങളാണ് സാധാരണയായി ഏറ്റവും പ്രയാസമേറിയതെന്ന് സ്റ്റാന്‍ഫോര്‍ഡ് സര്‍വകലാശാലയിലെ ഹൂവര്‍ ഇന്‍സ്റ്റിറ്റിയൂഷനിലെ വിസിറ്റിങ് ഫെലോ റോണക് ഡി ദേശായി പറഞ്ഞു.
റഷ്യയില്‍നിന്നുള്ള ഇന്ത്യയുടെ എണ്ണ ഇറക്കുമതി വാഷിംഗ്ടണിനെ സംബന്ധിച്ചിടത്തോളം ഇപ്പോഴും പ്രധാന തര്‍ക്കവിഷയമാണ്. അതേസമയം, കാര്‍ഷിക മേഖലയിലെ രാഷ്ട്രീയമായി നിര്‍ണായകമായ വിഭാഗങ്ങളെ സംരക്ഷിക്കുന്നതും മറ്റ് രാജ്യങ്ങളെ അപേക്ഷിച്ച് ഇന്ത്യന്‍ ഉത്പന്നങ്ങള്‍ക്ക് ലഭിക്കുന്ന മുന്‍ഗണനാ തീരുവ നിലനിര്‍ത്തുന്നതുമാണ് ന്യൂഡല്‍ഹിയുടെ പ്രധാന പരിഗണനയെന്ന് വിദഗ്ധര്‍ ചൂണ്ടിക്കാട്ടുന്നു.
ട്രംപുമായുള്ള ഫോണ്‍ സംഭാഷണം ഫലപ്രദമായിരുന്നു എന്ന് പ്രധാനമന്ത്രി നരേന്ദ്ര മോഡിയും പ്രതികരിച്ചിരുന്നു. ഉഭയകക്ഷി വ്യാപാരം, പ്രതിരോധം, ഊര്‍ജം, നിര്‍ണായക സാങ്കേതികവിദ്യകള്‍ തുടങ്ങിയ വിഷയങ്ങള്‍ ഇരുനേതാക്കളും ചര്‍ച്ച ചെയ്തതായി മോഡി വ്യക്തമാക്കി. ആഗോള സമാധാനവും സുരക്ഷയും ശക്തിപ്പെടുത്തുന്നതിനുള്ള ശ്രമങ്ങളും ചര്‍ച്ചയായതായി അദ്ദേഹം പറഞ്ഞു.
ഇറാന്‍ യുദ്ധം ഇന്ത്യയുടെ സുരക്ഷയ്ക്ക് വെല്ലുവിളിയായതോടെ റഷ്യന്‍ എണ്ണയെ കൂടുതല്‍ ആശ്രയിക്കേണ്ട സാഹചര്യമാണുള്ളത്. എന്നാല്‍, റഷ്യയില്‍ നിന്നുള്ള ഇന്ത്യയുടെ എണ്ണ വാങ്ങല്‍ യുക്രെയ്ന്‍ യുദ്ധത്തിന് സാമ്പത്തിക പിന്തുണ നല്‍കുന്നുവെന്നാണ് യു എസ് ഭരണകൂടത്തിന്റെ നിലപാട്.
കഴിഞ്ഞ ഒരു വര്‍ഷത്തിലേറെയായി ഇന്ത്യ- യു എസ് ബന്ധത്തില്‍ സമ്മര്‍ദം തുടരുകയാണ്. റഷ്യയില്‍ നിന്ന് എണ്ണ വാങ്ങുന്നത് തുടരുകയാണെങ്കില്‍ ഇന്ത്യക്കെതിരെ 100 ശതമാനം വരെ അധിക തീരുവ ചുമത്താനുള്ള സാധ്യതയും നിലനില്‍ക്കുന്നുണ്ട്.
ഇത്തരം സാഹചര്യം വ്യാപാര ചര്‍ച്ചകളെ പ്രതികൂലമായി ബാധിച്ചേക്കാം. യു എസ് വിപണിയില്‍ ഇന്ത്യന്‍ ഉത്പന്നങ്ങള്‍ക്ക് കൂടുതല്‍ മത്സരക്ഷമത ഉറപ്പാക്കുന്നതിനായി മുന്‍ഗണനാ തീരുവയാണ് ഇന്ത്യ ആവശ്യപ്പെടുന്നത്.
റഷ്യന്‍ എണ്ണ വാങ്ങുന്നതിന്റെ പേരില്‍ കഴിഞ്ഞ ഓഗസ്റ്റില്‍ യു എസ് ഇന്ത്യയില്‍ നിന്നുള്ള ഇറക്കുമതിക്ക് 25 ശതമാനം അധിക തീരുവ ഏര്‍പ്പെടുത്തിയിരുന്നു. ഇതോടെ ഇന്ത്യയില്‍നിന്നുള്ള ഇറക്കുമതിയുടെ ആകെ തീരുവ 50 ശതമാനമായി ഉയര്‍ന്നു.
ഫെബ്രുവരിയില്‍ ഇത് 18 ശതമാനമായി കുറച്ചു. റഷ്യയില്‍ നിന്നുള്ള എണ്ണ വാങ്ങല്‍ നിര്‍ത്താനും അമേരിക്കയില്‍ നിന്നും ആവശ്യമായാല്‍ വെനസ്വേലയില്‍നിന്നും കൂടുതല്‍ എണ്ണ വാങ്ങാനും ഇന്ത്യ സമ്മതിച്ചതായി അന്ന് ട്രംപ് അവകാശപ്പെട്ടിരുന്നു.
എന്നാല്‍ ട്രംപ് പരാമര്‍ശിച്ച ഈ വിശദാംശങ്ങള്‍ ഇന്ത്യ ഔദ്യോഗികമായി അംഗീകരിച്ചിരുന്നില്ല. രാജ്യത്തിന്റെ ഊര്‍ജസുരക്ഷ ഉറപ്പാക്കുന്നതിനാണ് റഷ്യയില്‍ നിന്ന് എണ്ണ വാങ്ങുന്നതെന്നാണ് ന്യൂഡല്‍ഹി തുടര്‍ച്ചയായി വ്യക്തമാക്കിയിട്ടുള്ളത്.
ഈ വര്‍ഷം തുടക്കം മുതല്‍ അമേരിക്കയും വെനസ്വേലയും ചേര്‍ന്ന് ഇന്ത്യയുടെ ഊര്‍ജ ഇറക്കുമതിയിലെ പ്രധാന സ്രോതസ്സുകളായി മാറിയിട്ടുണ്ടെങ്കിലും ഇറാന്‍ യുദ്ധത്തെ തുടര്‍ന്നുണ്ടായ ആഗോള എണ്ണ വിതരണ നിയന്ത്രണങ്ങളുടെ പശ്ചാത്തലത്തില്‍ റഷ്യന്‍ എണ്ണയെ പൂര്‍ണമായി ഒഴിവാക്കാന്‍ ഇന്ത്യയ്ക്ക് കഴിയില്ലെന്നാണ് വിലയിരുത്തല്‍.
നിലവിലെ ഭിന്നതകളില്‍ പരസ്പരം വിട്ടുവീഴ്ച ചെയ്യാനുള്ള സാഹചര്യം ഇരു രാജ്യങ്ങള്‍ക്കും ഇപ്പോഴില്ലെന്നും അതേസമയം അഭിപ്രായവ്യത്യാസങ്ങള്‍ നിലനില്‍ക്കെ തന്നെ അവ അംഗീകരിച്ച് കരാറില്‍ എത്താനും ഇരു രാജ്യങ്ങളും ഇതുവരെ തയ്യാറായിട്ടില്ലെന്നും തന്ത്രപ്രധാന ഉപദേശക സ്ഥാപനമായ ടെനെയോയിലെ ദക്ഷിണേഷ്യാ ഉപദേഷ്ടാവ് അര്‍പിത് ചതുര്‍വേദി പറഞ്ഞു.
നിര്‍ബന്ധിത തൊഴിലുമായി ബന്ധപ്പെട്ട് 60 രാജ്യങ്ങളിലെ നിയമങ്ങളും നയങ്ങളും നടപടികളും സംബന്ധിച്ച യു എസ് വ്യാപാര പ്രതിനിധിയുടെ അന്വേഷണത്തിന് പിന്നാലെ, നിലവില്‍ ഇന്ത്യന്‍ ഉത്പന്നങ്ങളുടെ യു എസ് കയറ്റുമതിക്ക് 10 ശതമാനം തീരുവയാണ് ബാധകമായിരിക്കുന്നത്.
എന്നാല്‍, ഇന്ത്യന്‍ സര്‍ക്കാര്‍ വ്യക്തമാക്കുന്നതനുസരിച്ച് അമേരിക്കയിലേക്കുള്ള ഇന്ത്യയുടെ കയറ്റുമതിയുടെ ഗണ്യമായൊരു വിഭാഗം ഈ 10 ശതമാനം തീരുവയുടെ പരിധിയില്‍പ്പെടുന്നില്ല. ജനറിക് മരുന്നുകളും സ്മാര്‍ട്ട്‌ഫോണുകളും ഉള്‍പ്പെടെയുള്ള പ്രധാന കയറ്റുമതി ഉത്പന്നങ്ങള്‍ ഇതില്‍ ഉള്‍പ്പെടുന്നു.