യുഎസില്‍ സ്ഥിരതാമസമാക്കാന്‍ ആഗ്രഹിക്കുന്ന ഇന്ത്യക്കാര്‍ക്ക് പ്രധാന മാര്‍ഗം ഇബി 5 വിസ

---

വാഷിംഗ്ടണ്‍: യുഎസില്‍ സ്ഥിരതാമസമാക്കാന്‍ ആഗ്രഹിക്കുന്ന ഇന്ത്യക്കാര്‍ക്ക് ഇബി 5 വിസ ഒരു പ്രധാന മാര്‍ഗമായി മാറുകയാണ്. എച്ച്1ബി, എഫ്1 വിസകള്‍ കിട്ടാന്‍ ബുദ്ധിമുട്ടുള്ളതുകൊണ്ട് കൂടുതല്‍ പേര്‍ ഈ വഴി തിരഞ്ഞെടുക്കുകയാണെന്നാണ് പുതിയ റിപ്പോര്‍ട്ട്. സയന്‍സ്, ടെക്‌നോളജി, എഞ്ചിനീയറിങ്, മാത്ത്‌സ് അല്ലെങ്കില്‍ സ്‌റ്റെം (STEM) മേഖലയിലെ ഇന്ത്യന്‍ വിദ്യാര്‍ഥികളും പ്രൊഫഷണലുകളും സാമ്പത്തികമായി മെച്ചപ്പെട്ടവരുമാണ് അമേരിക്കയില്‍ സ്ഥിരതാമസമാക്കാന്‍ ഇബി 5 വിസ തിരഞ്ഞെടുക്കുന്നത്.

എച്ച്1ബി, എഫ്1 വിസകള്‍ക്ക് കാത്തിരിപ്പ് സമയം കൂടുന്നതും കിട്ടാനുള്ള സാധ്യത കുറയുന്നതുമാണ് ഇബി 5 വിസയുടെ പ്രധാന ആകര്‍ഷണം. സാധാരണയായി എംപ്ലോയ്‌മെന്റ് ബേസ്ഡ് ഗ്രീന്‍ കാര്‍ഡ് കിട്ടാന്‍ 15 മുതല്‍ 24 വര്‍ഷം വരെ എടുക്കും. എന്നാല്‍ ഇബി 5 വിസ വഴി നിക്ഷേപം നടത്തി എളുപ്പത്തില്‍ ഗ്രീന്‍ കാര്‍ഡ് നേടാം.

ഇബി 5 വിസ ഇപ്പോള്‍ ഒരു സാധാരണ വഴിയായി മാറിയിരിക്കുന്നുവെന്ന് ഇന്ത്യന്‍ അമേരിക്കന്‍ ഇമിഗ്രേഷന്‍ അറ്റോര്‍ണി നടാദൂര്‍ എസ് കുമാര്‍ പറഞ്ഞതായി ബിസിനസ് സ്റ്റാന്‍ഡേഡ് റിപ്പോര്‍ട്ട് ചെയ്തു. വസ്തുവകകളുടെ വിലയും വീടിന്റെ വിലയുമൊക്കെ ഉയര്‍ന്നതോടെ കൂടുതല്‍ ഇന്ത്യക്കാര്‍ക്ക് ഈ വിസയില്‍ പണം മുടക്കാന്‍ സാധിക്കുന്നു. പലപ്പോഴും അവരുടെ മാതാപിതാക്കളും സഹായിക്കുന്നു. എച്ച1ബി വിസയുള്ളവരും എഫ്1 വിസയില്‍നിന്ന് എച്ച്1ബി വിസയിലേക്ക് മാറാന്‍ ശ്രമിക്കുന്ന വിദ്യാര്‍ഥികളും സാമ്പത്തികമായി മെച്ചപ്പെട്ടതിനാല്‍ ഇബി 5 വിസയെക്കുറിച്ച് ആലോചിക്കുന്നുണ്ടെന്നും അദ്ദേഹം വ്യക്തമാക്കി.

സ്‌റ്റെം മേഖലയിലുള്ള ഇന്ത്യക്കാര്‍ക്കിടയില്‍ ഈ വിസയ്ക്ക് ഇത്രയും പ്രചാരം കിട്ടാന്‍ കാരണം കൂടുതല്‍ അപേക്ഷകരുള്ളതുകൊണ്ടാണ്. ഇതിന് പിന്നില്‍ മറ്റ് വിവേചനങ്ങളൊന്നുമില്ലെന്നും അദ്ദേഹം കൂട്ടിച്ചേര്‍ത്തു. ഇമിഗ്രന്റ് ഇന്‍വെസ്റ്റര്‍ പ്രോഗ്രാമില്‍ സംസാരിക്കവെ ആണ് അദ്ദേഹം ഇക്കാര്യം പറഞ്ഞത്.

എന്തുകൊണ്ട് ഇബി 5 വിസ ആകര്‍ഷകമാകുന്നു?

എച്ച്1ബി വിസാ നിയമങ്ങള്‍ കൂടുതല്‍ കര്‍ശനമാക്കിയതും അപേക്ഷകള്‍ക്ക് അംഗീകാരം കുറഞ്ഞതും ഗ്രീന്‍ കാര്‍ഡിനായുള്ള കാത്തിരിപ്പ് കൂടിയതും ഇബി 5 വിസ ആളുകളെ ആകര്‍ഷിക്കുന്നു. 2025ല്‍ ഇന്ത്യക്കാര്‍ക്കുള്ള എച്ച്1ബി വിസയുടെ അപ്രൂവല്‍ റേറ്റ് 27 ശതമാനം കുറഞ്ഞു. എഫ്1 വിസയിലുള്ള വിദ്യാര്‍ഥികള്‍ക്ക് ഓപ്ഷണല്‍ പ്രാക്ടിക്കല്‍ ട്രെയിനിങ് നേടാനും കൂടുതല്‍ ബുദ്ധിമുട്ടുകള്‍ ഉണ്ട്. കൂടാതെ, ഇന്ത്യക്കാര്‍ക്ക് തൊഴില്‍ അടിസ്ഥാനത്തിലുള്ള ഇബി 2, ഇബി 3 ഗ്രീന്‍ കാര്‍ഡിനായുള്ള കാത്തിരിപ്പ് 15 മുതല്‍ 24 വര്‍ഷം വരെയാണ്. എന്നാല്‍ ഇബി5 വിസ വഴി പണം നിക്ഷേപിച്ച് നേരിട്ട് സ്ഥിരതാമസത്തിനുള്ള അനുമതി ലഭിക്കും. 2024 ഏപ്രില്‍ മുതല്‍ ഇബി5 വിസയ്ക്ക് ആവശ്യക്കാര്‍ ഏറിയിട്ടുണ്ട്. 2025ല്‍ 50 ശതമാനത്തില്‍ കൂടുതല്‍ അപേക്ഷകള്‍ ഇന്ത്യയില്‍നിന്ന് വന്നിട്ടുണ്ട്.

എന്താണ് ഇബി5 വിസ?

യുഎസ് സിറ്റിസണ്‍ഷിപ്പ് ആന്‍ഡ് ഇമിഗ്രേഷന്‍ സര്‍വീസസ് കൈകാര്യം ചെയ്യുന്ന ഇമിഗ്രന്റ് ഇന്‍വെസ്റ്റര്‍ പ്രോഗ്രാം ആണ് ഇബി5 വിസ. ഈ വിസാ മുഖേന, കുറഞ്ഞത് 8,00,000 ഡോളര്‍ അമേരിക്കയിലെ പുതിയ ബിസിനസില്‍ നിക്ഷേപം നടത്തുന്ന വിദേശികള്‍ക്ക് ഗ്രീന്‍ കാര്‍ഡ് നേടാം. ഇങ്ങനെ ചെയ്യുന്നതിലൂടെ അവിടെ 10 പേര്‍ക്കെങ്കിലും സ്ഥിരമായി ജോലി ലഭിക്കണം.

എച്ച1ബി വിസയുടെ ലോട്ടറി സമ്പ്രദായവും ഗ്രീന്‍ കാര്‍ഡിനായുള്ള കാത്തിരിപ്പും ഒഴിവാക്കി എളുപ്പത്തില്‍ ഗ്രീന്‍ കാര്‍ഡ് നേടാന്‍ സഹായിക്കുന്നതാണ് ഇബി 5 വിസ. എച്ച്1ബി വിസയ്ക്ക് ഒരു ജോലി ഓഫറോ, തൊഴില്‍ദാതാവിന്റെ പിന്തുണയോ, ശമ്പള സര്‍ട്ടിഫിക്കറ്റുകളോ ആവശ്യമാണ്. എന്നാല്‍ ഇബി 5 വിസയ്ക്ക് ഇതൊന്നും ആവശ്യമില്ല. അപേക്ഷകന്റെ ഭാര്യയ്ക്കും 21 വയസ്സില്‍ താഴെയുള്ള കുട്ടികള്‍ക്കും ഗ്രീന്‍ കാര്‍ഡ് ലഭിക്കും. കൂടാതെ, അമേരിക്കയില്‍ എവിടെ വേണമെങ്കിലും താമസിക്കാം, ജോലി ചെയ്യാം, പഠിക്കാം.