യുഎസിലെ പെൻസിൽവേനിയയിൽ ഉണ്ടായ വെടിവെപ്പിൽ മൂന്ന് പോലീസ് ഉദ്യോഗസ്ഥർ കൊല്ലപ്പെട്ടു

---

പെൻസിൽവേനിയ: യുഎസിലെ പെൻസിൽവേനിയയിൽ ഉണ്ടായ വെടിവെപ്പിൽ മൂന്ന് പോലീസ് ഉദ്യോഗസ്ഥർ കൊല്ലപ്പെട്ടു. രണ്ട് പേർക്ക് പരിക്കേറ്റു. ഇവരെ ആശുപത്രിയിൽ പ്രവേശിപ്പിച്ചു. അക്രമിയെന്ന് സംശയിക്കപ്പെടുന്നയാളും കൊല്ലപ്പെട്ടു.
ഗുരുതരാവസ്ഥയിലുള്ള രണ്ട് പേർ ചികിത്സിയിൽ തുടരുകയാണെന്ന് യോർക്ക് ആശുപത്രി അറിയിച്ചു.

തെക്കൻ പെൻസിൽവേനിയയിൽ ബുധനാഴ്ചയാണ് വെടിവെപ്പ് ഉണ്ടായത്. മേരിലാൻഡ് ലൈനിന് അടുത്ത് ഫിലാഡൽഫിയയ്ക്ക് പടിഞ്ഞാറ് 115 മൈൽ (185 കിലോമീറ്റർ) അകലെയുള്ള നോർത്ത് കോഡോറസ് ടൗൺഷിപ്പ് പ്രദേശത്താണ് വെടിവെപ്പ് ഉണ്ടായതെന്ന് പെൻസിൽവാനിയ സ്റ്റേറ്റ് പോലീസ് കമ്മീഷണർ ക്രിസ്റ്റഫർ പാരീസ് പറഞ്ഞു. പോലീസിന്റെ വെടിയേറ്റാണ് അക്രമി കൊല്ലപ്പെട്ടതെന്ന് സംസ്ഥാന പോലീസ് കമ്മീഷണർവാർത്താ സമ്മേളനത്തിൽ സ്ഥിരീകരിച്ചു.
ഗുരുതരാവസ്ഥയിലുള്ള രണ്ട് പേരെ ചികിത്സിക്കുന്നുണ്ടെന്നും മെച്ചപ്പെട്ട സുരക്ഷാ പ്രോട്ടോക്കോളുകൾ നിലവിലുണ്ടെന്നും യോർക്ക് ആശുപത്രി വ്യക്തമാക്കി. രണ്ട് പോലീസ് ഉദ്യോഗസ്ഥർ ചികിത്സയിൽ തുടരുകയാണെന്ന് ഡോ. ഡാനിയൽ കാർണി പറഞ്ഞു. വെടിവെപ്പിൽ മൂന്ന് പോലീസ് ഉദ്യോഗസ്ഥർക്കാണ് ജീവൻ നഷ്ടമായതെന്ന് ഗവർണർ ജോഷ് ഷാപ്പിറോ പറഞ്ഞു. സംഭവത്തിൽ പൂർണ്ണവും നീതിയുക്തവും കാര്യക്ഷമവുമായ അന്വേഷണം നടത്തുമെന്ന് പെൻസിൽവാനിയ സ്റ്റേറ്റ് പോലീസ് കമ്മീഷണർ ക്രിസ്റ്റഫർ പാരീസ് വാർത്താ സമ്മേളനത്തിൽ പറഞ്ഞു.

അക്രമിയുടെയും കൊല്ലപ്പെട്ട പോലീസ് ഉദ്യോഗസ്ഥരുടെ പേരുവിവരങ്ങൾ അധികൃതർ പുറത്തുവിട്ടിട്ടില്ല. അന്വേഷണം പുരോഗമിക്കുന്നതിനാൽ പോലീസിന് പല വിശദാംശങ്ങളും പങ്കിടാൻ സാധിക്കില്ലെന്ന് പാരീസ് പറഞ്ഞു. പോലീസിനെതിരായ അക്രമത്തെ സമൂഹത്തിന്മേലുള്ള ബാധ എന്നാണ് അറ്റോർണി ജനറൽ പമേല ബോണ്ടി വിശേഷിപ്പിച്ചത്. പ്രാദേശിക ഉദ്യോഗസ്ഥരെ പിന്തുണയ്ക്കാൻ ഫെഡറൽ ഏജന്റുമാർ സ്ഥലത്തുണ്ടെന്ന് അദ്ദേഹം പറഞ്ഞു. പെൻസിൽവാനിയ ഗവർണർ ജോഷ് ഷാപ്പിറോ സംഭവസ്ഥലത്ത് എത്തിയിരുന്നു.

പെൻസിൽവാനിയ സ്റ്റേറ്റ് പോലീസ്, നോർത്തേൺ റീജിയണൽ പോലീസ്, മറ്റ് അടിയന്തര സംവിധാനങ്ങൾ എന്നീ സൗകര്യങ്ങൾ സംഭവസ്ഥലത്തെത്തി. സ്ഥിതിഗതികൾ സൂക്ഷ്മമായി നിരീക്ഷിക്കുകയാണെന്ന് യോർക്ക് കൗണ്ടി കമ്മീഷണർമാർ അറിയിച്ചു. വെടിവെപ്പിന് പിന്നാലെ പ്രദേശത്ത് നിന്ന് ജനങ്ങളെ മാറ്റുകയും സുരക്ഷിതരായിരിക്കാൻ നിർദേശിക്കുകയും ചെയ്തു. റോഡുകളിൽ പോലീസ് ഉദ്യോഗസ്ഥരുടെ വലിയ സാന്നിധ്യമുണ്ടായിരുന്നു. തെക്കൻ മധ്യ പെൻസിൽവാനിയയിലെ ഒരു കാർഷിക മേഖലയാണ്.

വെടിവെപ്പുമായി ബന്ധപ്പെട്ട് വിശദമായ അന്വേഷണമാണ് പോലീസ് നടത്തുന്നത്. കൊല്ലപ്പെട്ട പോലീസ് ഉദ്യോഗസ്ഥരുടെ സ്മരണയ്ക്കായി സംസ്ഥാനത്തുടനീളമുള്ള എല്ലാ പൊതു കെട്ടിടങ്ങളിലെയും യുഎസ്, പെൻസിൽവാനിയ പതാകകളും പകുതി താഴ്ത്തിക്കെട്ടാൻ ഗവർണർ നിർദേശിച്ചു.