മനില: മിഡില് ഈസ്റ്റ് മേഖലയിലെ സംഘര്ഷത്തിന്റെ പശ്ചാത്തലത്തില് ദേശീയ തലത്തില് ഊര്ജ അടിയന്തരാവസ്ഥ ഔദ്യോഗികമായി പ്രഖ്യാപിക്കുന്ന ലോകത്തിലെ ആദ്യ രാജ്യമായി ഫിലിപ്പൈന്സ്. എണ്ണ വിതരണത്തില് ഉണ്ടാകുന്ന തടസ്സങ്ങള്ക്ക് ഏറ്റവും കൂടുതല് ബാധ്യത നേരിടുന്ന രാജ്യങ്ങളില് ഒന്നാണ് ഫിലിപ്പൈന്സ്.
രാജ്യത്തിന് ആവശ്യമായ എണ്ണയുടെ 98 ശതമാനവും പേര്ഷ്യന് ഗള്ഫ് മേഖലയില് നിന്ന് ഇറക്കുമതി ചെയ്യുന്നതാണ്. കഴിഞ്ഞ മൂന്ന് ആഴ്ചകളായി ഇന്ധന വിലയില് പലതവണ വര്ധനവുണ്ടായി. യുദ്ധം ആരംഭിച്ചതിന് ശേഷം ഡീസല്, പെട്രോള് വിലകള് ഇരട്ടിയിലധികമായി ഉയര്ന്നിട്ടുണ്ട്.
പ്രസിഡന്റ് ഫെര്ഡിനാന്ഡ് മാര്ക്കോസ് ജൂനിയര് പുറത്തിറക്കിയ എക്സിക്യൂട്ടീവ് ഉത്തരവില് രാജ്യത്തിന്റെ ഊര്ജ വിതരണത്തിന് 'തല്ക്ഷണ ഭീഷണി' നിലനില്ക്കുന്നതായി വ്യക്തമാക്കിയിട്ടുണ്ട്. ഊര്ജ സ്ഥിരത ഉറപ്പാക്കാനും സമ്പദ്വ്യവസ്ഥ സംരക്ഷിക്കാനുമായി സര്ക്കാര് ആവശ്യമായ നടപടികള് കൈക്കൊള്ളാനുള്ള നിയമപരമായ അധികാരം ഈ പ്രഖ്യാപനം നല്കുന്നു.
ഉത്തരവിന്റെ അടിസ്ഥാനത്തില് ഇന്ധനം, ഭക്ഷണം, മരുന്നുകള് എന്നിവ ഉള്പ്പെടെയുള്ള അനിവാര്യ സാധനങ്ങളുടെ വിതരണ നിയന്ത്രണത്തിനായി പ്രത്യേക സമിതി രൂപീകരിച്ചു. കൂടാതെ, ഇന്ധനവും പെട്രോളിയം ഉത്പന്നങ്ങളും നേരിട്ട് വാങ്ങാനുള്ള അധികാരവും സര്ക്കാരിന് നല്കിയിട്ടുണ്ട്.
ഇപ്പോള് നിലവിലുള്ള ഉപയോഗ നിരക്കില് ഫിലിപ്പൈന്സിന് ഏകദേശം 45 ദിവസത്തേക്ക് മാത്രം ഇന്ധന ശേഖരം ശേഷിക്കുന്നതായി ഊര്ജമന്ത്രി ചൊവ്വാഴ്ച അറിയിച്ചു.
ഈ ഉത്തരവ് ഒരു വര്ഷത്തേക്ക് പ്രാബല്യത്തില് തുടരും. പ്രസിഡന്റിന്റെ തീരുമാനം അനുസരിച്ച് ഇത് ദീര്ഘിപ്പിക്കുകയോ റദ്ദാക്കുകയോ ചെയ്യാം.