ന്യൂഡല്ഹി: വനിതാ മാധ്യമ പ്രവര്ത്തകരെയും പൊതുപ്രവര്ത്തന രംഗത്തെ സ്ത്രീകളെയും ലക്ഷ്യമാക്കി ഓണ്ലൈനില് വര്ധിച്ചുവരുന്ന സംഘടിത അതിക്രമങ്ങളെക്കുറിച്ച് ആശങ്കയുണര്ത്തുന്ന പുതിയ റിപ്പോര്ട്ട് പുറത്തുവന്നു.
യുനൈറ്റഡ് നാഷന്സ് വിമന്, ദി നര്വ് ഉള്പ്പെടെയുള്ള പങ്കാളികള് ചേര്ന്ന് പുറത്തിറക്കിയ പുതിയ പഠനം നിര്മിത ബുദ്ധി കാലത്ത് സ്ത്രീകള് നേരിടുന്ന ഓണ്ലൈന് അതിക്രമങ്ങളുടെ വ്യാപ്തി വെളിപ്പെടുത്തുന്നു. ഡിജിറ്റല് മേഖലയിലെ ആക്രമണങ്ങള് കൂടുതല് സംഘടിതവും ലക്ഷ്യബദ്ധവുമായ രീതിയില് നടക്കുന്നതായാണ് വ്യക്തമാക്കുന്നത്.
റിപ്പോര്ട്ട് പ്രകാരം, പൊതുപ്രവര്ത്തനം നടത്തുന്ന സ്ത്രീകളില് 12 ശതമാനം പേരുടെ സമ്മതമില്ലാതെ വ്യക്തിഗത ചിത്രങ്ങള് ഓണ്ലൈനില് പങ്കുവെക്കപ്പെട്ട അനുഭവമുണ്ടായി. ഏകദേശം ആറ് ശതമാനം പേര്ക്ക് ഡീപ്ഫേക്ക് ആക്രമണങ്ങള് നേരിടേണ്ടി വന്നു. കൂടാതെ, മൂന്നിലൊന്ന് സ്ത്രീകള് അനാവശ്യമായ ലൈംഗിക സന്ദേശങ്ങള് ലഭിച്ചതായി അറിയിച്ചു.
ഏകദേശം 41 ശതമാനം പ്രതികരിച്ചവര് സോഷ്യല് മീഡിയയില് ആക്രമണം ഒഴിവാക്കാന് സ്വയം സെന്സര്ഷിപ്പ് പാലിക്കുന്നതായി പറഞ്ഞു. പ്രൊഫഷണല് പ്രവര്ത്തനങ്ങളില് പോലും 19 ശതമാനം പേര് സ്വയം നിയന്ത്രണം പാലിക്കുന്നുണ്ട്. വനിതാ മാധ്യമ പ്രവര്ത്തകരില് ഈ പ്രവണത കൂടുതല് രൂക്ഷമാണ് 2025ല് 45 ശതമാനം പേര് ഓണ്ലൈനില് സ്വയം സെന്സര്ഷിപ്പ് നടത്തുന്നതായി റിപ്പോര്ട്ട് ചെയ്തു. ഇത് 2020-നെ അപേക്ഷിച്ച് വലിയ വര്ധനയാണ്.
അതേസമയം, നിയമനടപടികള്ക്കായി പരാതി നല്കുന്നത് വര്ധിക്കുന്നതായും റിപ്പോര്ട്ട് വ്യക്തമാക്കുന്നു. ഏകദേശം 22 ശതമാനം വനിതാ മാധ്യമ പ്രവര്ത്തകര് ആക്രമണങ്ങള് നിയമപ്രവര്ത്തകര്ക്കു റിപ്പോര്ട്ട് ചെയ്യുന്നു. 2020നേക്കാള് ഇരട്ടിയിലധികമാണിത്. 14 ശതമാനം പേര് നിയമനടപടികള് തന്നെ സ്വീകരിക്കുന്നതായും പറയുന്നു.
ഈ അതിക്രമങ്ങളുടെ മാനസിക ആഘാതം ഗുരുതരമാണെന്നും പഠനം ചൂണ്ടിക്കാട്ടുന്നു. ഏകദേശം 25 ശതമാനം പേര്ക്ക് ഓണ്ലൈന് ആക്രമണത്തെ തുടര്ന്ന് ആശങ്കയും മാനസിക സമ്മര്ദ്ദവും അനുഭവപ്പെടുന്നു. 13 ശതമാനം പേര്ക്ക് പോസ്റ്റ്-ട്രോമാറ്റിക് സ്ട്രസ് ഡിസോര്ഡര് (പിടിഎസ്ഡി) നിര്ണയിച്ചിട്ടുണ്ടെന്നും റിപ്പോര്ട്ട് വ്യക്തമാക്കുന്നു.
എങ്കിലും, നിയമപരമായ സംരക്ഷണം പല രാജ്യങ്ങളിലും പര്യാപ്തമല്ലെന്ന് റിപ്പോര്ട്ട് പറയുന്നു. ലോകബാങ്ക് കണക്കുകള് പ്രകാരം, സൈബര് ഹരാസ്മെന്റ് സംബന്ധിച്ച നിയമങ്ങള് 40 ശതമാനത്തില് താഴെ രാജ്യങ്ങളില് മാത്രമേ നിലവിലുള്ളൂ. ഇതോടെ ഏകദേശം 1.8 ബില്യണ് സ്ത്രീകളും പെണ്കുട്ടികളും മതിയായ നിയമ സംരക്ഷണമില്ലാതെ തുടരുന്ന അവസ്ഥയാണെന്ന് റിപ്പോര്ട്ട് ചൂണ്ടിക്കാട്ടുന്നു.