യോങ്കേഴ്സ് (ന്യൂയോര്‍ക്ക്): മലങ്കര ഓര്‍ത്തഡോക്‌സ് സഭയുടെ നോര്‍ത്ത് ഈസ്റ്റ് അമേരിക്കന്‍ ഭദ്രാസന ഫാമിലി ആന്റ് യൂത്ത് കോണ്‍ഫറന്‍സിനായി ജനുവരി 12ന് സെന്റ് തോമസ് ഇന്ത്യന്‍ ഓര്‍ത്തഡോക്‌സ് പള്ളിയില്‍ വിജയകരമായ കിക്കോഫ് മീറ്റിംഗ് നടന്നു. ഭദ്രാസനത്തിലെ വിവിധ ഇടവകകളില്‍ നിന്നുള്ള വിശ്വാസികള്‍ ഒത്തുകൂടുന്ന സുപ്രധാന ആത്മീയ സമ്മേളനമാണ് നാല് ദിവസം നീളുന്ന ഫാമിലി ആന്റ് യൂത്ത് കോണ്‍ഫറന്‍സ്.
ഫാ. ജോബ് സണ്‍ കോട്ടപ്പുറത്ത് (വികാരി) കുര്‍ബാനയ്ക്ക് നേതൃത്വം നല്‍കി. അതിനുശേഷം കോണ്‍ഫറന്‍സ് ടീമിനെ വികാരി സ്വാഗതം ചെയ്തു. ഭദ്രാസനത്തിന്റെയും കോണ്‍ഫറന്‍സ് കമ്മിറ്റിയുടെയും പുരോഗമനപരമായ സംരംഭങ്ങള്‍ക്ക് വികാരി പിന്തുണ അറിയിക്കുകയും ഫാമിലി/ യൂത്ത് കോണ്‍ഫറന്‍സില്‍ പങ്കെടുക്കാന്‍ എല്ലാവരെയും പ്രോത്സാഹിപ്പിക്കുകയും ചെയ്തു.
ജെയ്സണ്‍ തോമസ് (കോണ്‍ഫറന്‍സ് സെക്രട്ടറി), രാജന്‍ പടിയറ (കോണ്‍ഫറന്‍സ് പ്രൊസഷന്‍ കോര്‍ഡിനേറ്റര്‍), അജു എബ്രഹാം (ഫിനാന്‍സ് കമ്മിറ്റി അംഗം), ജേക്കബ് തോമസ് ജൂനിയര്‍ (രജിസ്ട്രേഷന് കമ്മിറ്റി അംഗം) എന്നിവരടങ്ങുന്ന കോണ്‍ഫറന്‍സ് ടീമിനെ ഉമ്മന്‍ കാപ്പില്‍ പരിചയപ്പെടുത്തി. മാത്യു ജോര്‍ജ് (ഇടവക ട്രസ്റ്റി), ജോസി മാത്യു (ഇടവക സെക്രട്ടറി), എം എം എബ്രഹാം (ഭദ്രാസന അസംബ്ലി അംഗം) എന്നിവര്‍ വേദിയില്‍ സന്നിഹിതരായിരുന്നു.
വിവിധ ആത്മീയ പ്രസ്ഥാനങ്ങളുടെ വളര്‍ച്ചയ്ക്കും വികസനത്തിനുമായുള്ള ഭദ്രാസനത്തിന്റെ പുതിയ സംരംഭങ്ങളെക്കുറിച്ച് ഉമ്മന്‍ കാപ്പില്‍ പ്രതിഫലിപ്പിച്ചു. ജീവിതകാലം മുഴുവന്‍ നിലനില്‍ക്കുന്ന ഓര്‍മ്മകള്‍ സൃഷ്ടിക്കുന്നതിനായി കോണ്‍ഫറന്‍സ് നല്‍കുന്ന അവസരങ്ങള്‍ ഉപയോഗപ്പെടുത്താന്‍ അദ്ദേഹം കൊച്ചുകുട്ടികളുടെയും കൗമാരക്കാരുടെയും മാതാപിതാക്കളെ പ്രോത്സാഹിപ്പിച്ചു. സമ്പന്നമായ ആത്മീയ അനുഭവവും വിശ്രമവും സമന്വയിപ്പിക്കുന്ന കോണ്‍ഫറന്‍സില്‍ പങ്കെടുക്കാന്‍ മുതിര്‍ന്നവരെയും അദ്ദേഹം പ്രോത്സാഹിപ്പിച്ചു.
കോണ്‍ഫറന്‍സിന്റെ വേദി, പ്രാസംഗികര്‍, രജിസ്ട്രേഷന്, പൊതു ക്രമീകരണങ്ങള്‍ എന്നിവയെക്കുറിച്ചുള്ള വിശദാംശങ്ങള്‍ ജയ്സണ്‍ തോമസ് നല്‍കി. യുവതി യുവാക്കള്‍ക്ക് പഠിക്കാനും ഇടപഴകുവാനും അവിസ്മരണീയമായ ഒരു അനുഭവം നേടാനും നിരവധി അവസരങ്ങള്‍ നല്‍കുന്ന വൈവിധ്യമാര്‍ന്ന കാര്യപരിപാടികളെപ്പറ്റിയും അദ്ദേഹം ഓര്‍മ്മിപ്പിച്ചു. സമ്മേളനത്തെ പിന്തുണയ്ക്കാനുള്ള ആകര്‍ഷകമായ സ്‌പോണ്‍സര്‍ഷിപ്പ് ഓപ്ഷനുകളെക്കുറിച്ച് ഉമ്മന്‍ കാപ്പില്‍ വിശദീകരിച്ചു. സമ്മേളനത്തിന്റെ സ്മരണയ്ക്കായി പ്രസിദ്ധീകരിക്കുന്ന സുവനീറിനെക്കുറിച്ച് അജു എബ്രഹാം സംസാരിച്ചു. സുവനീറില്‍ ലേഖനങ്ങള്‍, കഥകള്‍, ചിത്രങ്ങള്‍, പരസ്യങ്ങള്‍, അഭിനന്ദനങ്ങള്‍ എന്നിവ ഉള്‍പ്പെടുത്താനുള്ള അവസരം ഉണ്ടായിരിക്കും.
ഇടവകയെ പ്രതിനിധീകരിച്ച് വികാരി സുവനീറിനുള്ള സംഭാവന സമര്‍പ്പിച്ചു. സമ്മേളനത്തില്‍ പങ്കെടുക്കുന്നതിനുള്ള ആദ്യ രജിസ്ട്രേഷന് സണ്ണി എബ്രഹാം കൈമാറി. സാമുവല്‍ ആന്റ് ലീലാമ്മ തോമസ്, ജോയ് എബ്രഹാം, ജോസഫ് ആന്റ് ഡോ. ആലീസ് വെട്ടിച്ചിറ എന്നിവര്‍ സുവനീറില്‍ അഭിനന്ദനങ്ങള്‍ ഉള്‍പ്പെടുത്തിക്കൊണ്ട് പിന്തുണ പ്രഖ്യാപിച്ചു. കുടുംബത്തോടൊപ്പം സമ്മേളനത്തില്‍ പങ്കെടുക്കുമെന്ന് ആഞ്ചല ജോര്‍ജും ബ്ലെസി വര്‍ഗീസും അറിയിച്ചു.
ഫാമിലി കോണ്‍ഫറന്‍സിന് നല്‍കിയ ഉദാരമായ പിന്തുണയ്ക്ക് വികാരിക്കും ഇടവക അംഗങ്ങള്‍ക്കും കോണ്‍ഫറന്‍സ് ടീമിനുവേണ്ടി ജെയ്സണ്‍ തോമസ് നന്ദി അറിയിച്ചു.
2025 ജൂലൈ 9 മുതല്‍ 12 വരെ കണക്ടിക്കട് ഹില്‍ട്ടണ്‍ സ്റ്റാംഫര്‍ഡ് ഹോട്ടല്‍ ആന്റ് എക്സിക്യൂട്ടീവ് മീറ്റിംഗ് സെന്ററിലാണ് കോണ്‍ഫറന്‍സ് നടക്കുന്നത്. റവ. ഡോ. നൈനാന്‍ വി ജോര്‍ജ് (ഓര്‍ത്തഡോക്‌സ് വൈദിക സംഘം ജനറല്‍ സെക്രട്ടറി, റവ. ഡോ. റ്റിമത്തി (ടെന്നി) തോമസ് (നോര്‍ത്ത് ഈസ്റ്റ് അമേരിക്കന്‍ ഭദ്രാസന സണ്‍ഡേ സ്‌കൂള്‍ ഡയറക്ടര്‍), ഫാ. ജോണ്‍ (ജോഷ്വ) വര്‍ഗീസ്, (സൗത്ത് വെസ്റ്റ് അമേരിക്കന്‍ ഭദ്രാസന യൂത്ത് മിനിസ്റ്റര്‍), റവ. ഡീക്കന്‍ അന്തോണിയോസ് (റോബി), ആന്റണി (ടാല്‍മീഡോ- നോര്‍ത്ത് ഈസ്റ്റ് അമേരിക്കന്‍ ഭദ്രാസന മെന്‍സ് മിനിസ്ട്രി ഡയറക്ടര്‍) എന്നിവരാണ് മുഖ്യ പ്രാസംഗികര്‍. 'നമ്മുടെ പൗരത്വം സ്വര്‍ഗത്തിലാണ്, അവിടെനിന്നുള്ള ഒരു രക്ഷകനായ കര്‍ത്താവായ യേശുക്രിസ്തുവിനെ ഞങ്ങള്‍ ആകാംക്ഷയോടെ കാത്തിരിക്കുന്നു''(ഫിലിപ്പിയര്‍ 3:20) എന്ന ബൈബിള്‍ വാക്യത്തെ അടിസ്ഥാനമാക്കിയുള്ള 'The Way of the Pilgrim' (പരദേശിയുടെ വഴി) എന്നതാണ് കോണ്‍ഫറന്‍സിന്റെ പ്രമേയം. ബൈബിള്‍, വിശ്വാസം, പാരമ്പര്യം, സമകാലിക വിഷയങ്ങള്‍ എന്നിവയെ അടിസ്ഥാനമാക്കി കുട്ടികള്‍ക്കും യുവജനങ്ങള്‍ക്കും മുതിര്‍ന്നവര്‍ക്കും പ്രത്യേകം സംവേദനാത്മക സെഷനുകള്‍ ഉണ്ടായിരിക്കും.
രജിസ്‌ട്രേഷനും വിശദാംശങ്ങള്‍ക്കും www.fycnead.org സന്ദര്‍ശിക്കുക.
കൂടുതല്‍ വിവരങ്ങള്‍ക്ക് ഫാ. അബു വര്‍ഗീസ് പീറ്റര്‍, കോണ്‍ഫറന്‍സ് കോര്‍ഡിനേറ്റര്‍ (ഫോണ്‍: 914-806-4595), ജെയ്സണ്‍ തോമസ്, കോണ്‍ഫറന്‍സ് സെക്രട്ടറി (ഫോണ്‍: 917.612.8832), ജോണ്‍ താമരവേലില്‍, കോണ്‍ഫറന്‍സ് ട്രഷറര്‍) (ഫോണ്‍: 917.533.3566) എന്നിവരുമായി ബന്ധപ്പെടുക.