മുംബൈ: തൃശൂര്‍ ആസ്ഥാനമായ സ്വകാര്യ ബാങ്കായ സി എസ് ബി ബാങ്കിന്റെ (പഴയ കാത്തലിക്ക് സിറിയന്‍ ബാങ്ക്) ഓഹരികള്‍ ഒക്ടോബര്‍ 15 വ്യാഴാഴ്ച നിക്ഷേപകരുടെ ശ്രദ്ധാകേന്ദ്രമാകും. ബാങ്കിന്റെ പ്രമോട്ടറായ ഫെയര്ഫാക്സ് ഫിനാന്‍ഷ്യല്‍ മറ്റൊരു ബാങ്കായ ഐ ഡി ബി ഐ ബാങ്കില്‍ നിയന്ത്രണ ഓഹരി ഏറ്റെടുക്കാന്‍ തെരഞ്ഞെടുക്കപ്പെട്ടതാണ് ഇതിന് കാരണം.
ഐ ഡി ബി ഐ ബാങ്കിലെ 60.72 ശതമാനം ഓഹരികള്‍ 52,878 കോടി രൂപയ്ക്ക് ഏറ്റെടുക്കാനാണ് ഫെയര്ഫാക്സ് ഫിനാന്‍ഷ്യല്‍ ഒരുങ്ങുന്നത്. ഇടപാട് പൂര്‍ത്തിയായാല്‍ ധനകാര്യ സേവന മേഖലയിലെ ഇന്ത്യയിലെ ഏറ്റവും വലിയ നേരിട്ടുള്ള വിദേശ നിക്ഷേപ (എഫ് ഡി ഐ) ഇടപാടായി ഇത് മാറും.
എന്നാല്‍, ഈ നീക്കം വിപണിയില്‍ ഒരു പ്രധാന ചോദ്യവും ഉയര്‍ത്തുന്നുണ്ട്- സി എസ് ബി ബാങ്കിലെ നിലവിലെ ഓഹരി പങ്കാളിത്തവുമായി ഫെയര്ഫാക്സ് എന്തുചെയ്യും?
ബാങ്കുകളുടെ ഉടമസ്ഥാവകാശവും നിയന്ത്രണവും സംബന്ധിച്ച റിസര്‍വ് ബാങ്ക് ഓഫ് ഇന്ത്യയുടെ (ആര്‍ ബി ഐ) ചട്ടങ്ങള്‍ പ്രകാരം, ഒരേ പ്രമോട്ടര്‍ സ്ഥാപനത്തിന് പരസ്പരം മത്സരിക്കുന്ന രണ്ട് ബാങ്കുകളുടെ നിയന്ത്രണം ഒരേസമയം കൈവശം വയ്ക്കുന്നതിന് നിയന്ത്രണങ്ങളുണ്ട്. റെഗുലേറ്ററി അനുമതികള്‍ക്ക് വിധേയമായി ഫെയര്‍ഫാക്സിന് സി എസ് ബി ബാങ്കിലെ ഓഹരിപങ്കാളിത്തം നിലനിര്‍ത്താനോ ഐ ഡി ബി ഐ ബാങ്കുമായി ലയനസാധ്യത പരിശോധിക്കാനോ കഴിയുമെന്നാണ് വിലയിരുത്തല്‍. എന്നാല്‍, ലയനനടപടികള്‍ കൂടുതല്‍ സങ്കീര്‍ണമാകാനും സാധ്യതയുണ്ട്.
സി എസ് ബി ബാങ്കിലെ ഏക പ്രമോട്ടര്‍ സ്ഥാപനമായ ഫെയര്‍ഫാക്സിന് ഏകദേശം 40 ശതമാനം ഓഹരി പങ്കാളിത്തമാണുള്ളത്. ബാക്കി ഓഹരികള്‍ പൊതുനിക്ഷേപകരുടെ കൈവശമാണ്.
സെപ്റ്റംബര്‍ പാദത്തിന്റെ അവസാനത്തില്‍ ഇന്ത്യന്‍ മ്യൂച്വല്‍ ഫണ്ടുകള്‍ക്ക് ബാങ്കില്‍ 13.15 ശതമാനം ഓഹരി പങ്കാളിത്തമുണ്ടായിരുന്നു. ഇതില്‍ എസ് ബി ഐ സ്‌മോള്‍ക്യാപ് ഫണ്ടിന് 6.34 ശതമാനവും സുന്ദരം മ്യൂച്വല്‍ ഫണ്ടിന് 2.29 ശതമാനവും ഐ സി ഐ സി ഐ പ്രുഡന്‍ഷ്യല്‍ മള്‍ട്ടിക്യാപ് ഫണ്ടിന് 1.80 ശതമാനവും ബന്ധന്‍ സ്‌മോള്‍ക്യാപ് ഫണ്ടിന് 1.60 ശതമാനവും ഓഹരികളുണ്ടായിരുന്നു.
ബി എസ് ഇയില്‍ ലഭ്യമായ സെപ്റ്റംബര്‍ 30-ലെ ഓഹരി പങ്കാളിത്ത വിവരങ്ങള്‍ പ്രകാരം, വിദേശ പോര്‍ട്ട്ഫോളിയോ നിക്ഷേപകരായ അമന്‍സ ഹോള്‍ഡിങ്സിന് 4.58 ശതമാനവും തെലെം ഇന്ത്യ മാസ്റ്റര്‍ ഫണ്ടിന് 3.29 ശതമാനവും ഓഹരി പങ്കാളിത്തമുണ്ടായിരുന്നു.
രണ്ട് ലക്ഷം രൂപ വരെ അംഗീകൃത ഓഹരി മൂലധനമുള്ള ചെറുകിട നിക്ഷേപകരുടെ വിഭാഗത്തില്‍പ്പെട്ട ഏകദേശം 63,000 നിക്ഷേപകര്‍ക്ക് ബാങ്കില്‍ 12.56 ശതമാനം ഓഹരികളുണ്ടായിരുന്നു. രണ്ട് ലക്ഷം രൂപയ്ക്ക് മുകളില്‍ അംഗീകൃത ഓഹരിമൂലധനമുള്ള വലിയ റീട്ടെയില്‍ നിക്ഷേപകരുടെ പങ്ക് 6.55 ശതമാനമായിരുന്നു.
സ്വര്‍ണവായ്പാ ബിസിനസില്‍ 36 ശതമാനം വളര്‍ച്ച
ജൂലൈ- സെപ്റ്റംബര്‍ കാലയളവിലെ ബിസിനസ് പുരോഗതി സംബന്ധിച്ച് സി എസ് ബി ബാങ്ക് അടുത്തിടെ പുറത്തുവിട്ട കണക്കുകള്‍ പ്രകാരം, മുന്‍വര്‍ഷത്തെ ഇതേ കാലയളവിനെ അപേക്ഷിച്ച് മൊത്തം അഡ്വാന്‍സുകളില്‍ 22 ശതമാനം വളര്‍ച്ച രേഖപ്പെടുത്തി. നിക്ഷേപങ്ങളില്‍ 18 ശതമാനം വര്‍ധനയുണ്ടായി.
ടേം ഡെപ്പോസിറ്റുകളില്‍ 22 ശതമാനം വളര്‍ച്ച രേഖപ്പെടുത്തിയപ്പോള്‍ സ്വര്‍ണവായ്പാ ബിസിനസിലെ വളര്‍ച്ച 36 ശതമാനമായി.
ബുധനാഴ്ചത്തെ വ്യാപാരത്തില്‍ സി എസ് ബി ബാങ്ക് ഓഹരികള്‍ 5.5 ശതമാനം ഉയര്‍ന്ന് 325 രൂപയില്‍ ക്ലോസ് ചെയ്തു. വ്യാപാരത്തിന്റെ അവസാനഘട്ടത്തിലാണ് ഓഹരിയില്‍ കുത്തനെയുള്ള മുന്നേറ്റമുണ്ടായത്.
എന്നാല്‍, 2026-ന്റെ തുടക്കം മുതല്‍ ഓഹരി ഏകദേശം 33 ശതമാനം ഇടിവിലാണ്. 52 ആഴ്ചയിലെ ഉയര്‍ന്ന നിരക്കായ 574 രൂപയില്‍നിന്ന് ഓഹരി ഏകദേശം 44 ശതമാനം താഴെയുമാണ്.
ഇത്രയും ഇടിവുണ്ടായിട്ടും, ഓഹരി ഇപ്പോഴും പ്രാരംഭ ഓഹരി വില്‍പ്പനയുടെ (ഐ പി ഒ) വിലയായ 197 രൂപയ്ക്ക് മുകളിലാണ് വ്യാപാരം നടത്തുന്നത്.
ഐ ഡി ബി ഐ ബാങ്കിലെ ഫെയര്‍ഫാക്സിന്റെ നിര്‍ദിഷ്ട ഏറ്റെടുക്കല്‍ സി എസ് ബി ബാങ്കിന്റെ ഭാവി ഉടമസ്ഥാവകാശ ഘടനയെ എങ്ങനെ ബാധിക്കുമെന്നതും റെഗുലേറ്ററി അനുമതികളുമായി ബന്ധപ്പെട്ട് എന്ത് തീരുമാനങ്ങളുണ്ടാകുമെന്നതുമാണ് ഇനി വിപണി ഉറ്റുനോക്കുന്നത്.