ഷകാഹോള കൂട്ടക്കൊല: 190 കുട്ടികളെയും ഒരു മുതിർന്ന വ്യക്തിയെയും കൊലപ്പെടുത്തിയ കേസിൽ കെനിയയിലെ 'ലോകാവസാന' വിഭാഗം നേതാവ് പോൾ മക്കെൻസിക്ക് 200 വർഷം തടവുശിക്ഷ

---

കെനിയയിലെ ഷകാഹോള വനമേഖലയിൽ, ആളുകളെ പട്ടിണിക്കിട്ട് കൊലപ്പെടുത്തുന്ന ഒരു വിഭാഗത്തിന് നേതൃത്വം നൽകിയ, സ്വയം പാസ്റ്റർ എന്ന് വിശേഷിപ്പിക്കുന്ന പോൾ മക്കെൻസിക്ക്, 191 പേരെ കൊലപ്പെടുത്തിയ കുറ്റത്തിന് 200 വർഷം തടവുശിക്ഷ വിധിച്ചു. ഇദ്ദേഹത്തിന്റെ ഇരകളിൽ ഒരാളൊഴികെ ബാക്കിയെല്ലാവരും, അതായത് 190 പേരും കുട്ടികളായിരുന്നു എന്നതാണ് ശ്രദ്ധേയം. ഇദ്ദേഹത്തോടൊപ്പം മറ്റ് ഇരുപത്തിനാലിലധികം പ്രതികൾക്കും ശിക്ഷ വിധിച്ചു. നവംബർ 6 വെള്ളിയാഴ്ച കെനിയയിലെ മൊംബാസ ഹൈക്കോടതിയാണ് ഈ ചരിത്രപരമായ വിധി പ്രഖ്യാപിച്ചത്. 

പട്ടിണി മൂലം മരണപ്പെട്ട 183 പേരുടെ കൊലപാതകത്തിന് 100 വർഷവും, ശ്വാസം മുട്ടിച്ചും മർദ്ദിച്ചും നേരിട്ട് കൊലപ്പെടുത്തിയ 8 കുട്ടികളുടെ കൊലപാതകത്തിന് മറ്റൊരു 100 വർഷവുമാണ് കോടതി വിധിച്ചത്. ഈ രണ്ട് ശിക്ഷകളും ഒന്നിനുപുറകെ ഒന്നായി അനുഭവിക്കണം, അങ്ങനെയാണ് ആകെ തടവ് ശിക്ഷ 200 വർഷമായി മാറിയത്. പോൾ മക്കെൻസിയെ കൂടാതെ ഈ ക്രൂരതയ്ക്ക് കൂട്ടുനിന്ന മറ്റ് 28 സഹായികൾക്ക് 10 മുതൽ 160 വർഷം വരെ തടവുശിക്ഷ വിധിച്ചിട്ടുണ്ട്.

'ഗുഡ് ന്യൂസ് ഇന്റർനാഷണൽ ചർച്ച്' സ്ഥാപകനായ മക്കെൻസി, തന്റെ അനുയായികളെ വീടുകൾ ഉപേക്ഷിച്ച് കിഴക്കൻ കെനിയയിലെ ഷകാഹോള വനത്തിലേക്ക് മാറാൻ പ്രേരിപ്പിച്ചു. അവിടെ വെച്ച് ഉപവസിക്കുന്നത് അവരെ ദൈവത്തോട് കൂടുതൽ അടുപ്പിക്കുമെന്നും സ്വർഗ്ഗത്തിലേക്ക് പോകാൻ അവരെ സജ്ജരാക്കുമെന്നും അദ്ദേഹം അവർക്ക് വാഗ്ദാനം നൽകി. ലോകാവസാനം അടുത്തെത്തിയെന്നും, പട്ടിണി കിടന്ന് മരിച്ചാൽ നരകത്തിൽ പോകാതെ നേരിട്ട് 'യേശുവിനെ കാണാമെന്നും' വിശ്വസിപ്പിച്ചാണ് മക്കെൻസി ആളുകളെ കൂട്ടത്തോടെ പട്ടിണിക്കിട്ടത്. കുട്ടികളെ വെയിലത്ത് നിർത്തി ആദ്യം പട്ടിണിക്കിട്ട് കൊല്ലാൻ ഇയാൾ മാതാപിതാക്കളോട് നിർദ്ദേശിച്ചിരുന്നു.

2023-ലാണ് കെനിയയിലെ ഷകാഹോള വനമേഖലയിൽ നിന്ന് ഇത്തരത്തിൽ മരണപ്പെട്ടവരുടെ കൂട്ടക്കുഴികൾ കണ്ടെത്താൻ തുടങ്ങിയത്. വനത്തിൽ നിന്ന് ഇതുവരെ നാനൂറിലധികം മൃതദേഹങ്ങൾ കണ്ടെടുത്തിട്ടുണ്ട്. ഇതിൽ 191 മരണങ്ങൾ മാത്രമാണ് ഈ നിർദ്ദിഷ്ട കൊലപാതകക്കേസിന്റെ പരിധിയിൽ വിചാരണ ചെയ്തത്

ഗുഡ് ന്യൂസ് ഇന്റർനാഷണൽ ചർച്ച്: ഞെട്ടിക്കുന്ന കൊലപാതക പരമ്പര

2021 ജനുവരിക്കും 2023 സെപ്റ്റംബറിനും ഇടയിൽ 190 കുട്ടികളെയും ഒരു മുതിർന്ന വ്യക്തിയെയും കൊലപ്പെടുത്തിയ കേസിൽ, മക്കെൻസിയെയും കൂട്ടുപ്രതികളായ 28 പേരെയും കഴിഞ്ഞ മാസം കുറ്റക്കാരായി കണ്ടെത്തി. വിധിയിൽ അപ്പീൽ നൽകുമെന്ന് മക്കെൻസിയുടെ അഭിഭാഷകൻ അറിയിച്ചു. കൂടാതെ, നരഹത്യ, ഭീകരവാദം തുടങ്ങിയ കുറ്റങ്ങളും ഇദ്ദേഹത്തിനെതിരെ ചുമത്തിയിട്ടുണ്ട്; എന്നാൽ അദ്ദേഹം ഈ ആരോപണങ്ങൾ നിഷേധിച്ചു. തീരദേശ വിനോദസഞ്ചാര കേന്ദ്രമായ മാലിൻഡിക്ക് സമീപമുള്ള ഈ വിഭാഗത്തിന്റെ ആസ്ഥാനത്ത് നിന്ന് 2023 മുതൽ നൂറുകണക്കിന് മൃതദേഹങ്ങൾ കണ്ടെടുത്തു. 'ഷകാഹോള വന കൂട്ടക്കൊല' എന്നാണ് ഈ സംഭവം അറിയപ്പെടുന്നത്. കെനിയ നാഷണൽ കമ്മീഷൻ ഓൺ ഹ്യൂമൻ റൈറ്റ്‌സിന്റെ കണക്കനുസരിച്ച്, 2024-ൽ മരണസംഖ്യ 429 ആയി ഉയർന്നു. ഇതിൽ പല ഇരകളെയും ഇനിയും തിരിച്ചറിയാനായിട്ടില്ല.

വധശിക്ഷ ആവശ്യപ്പെട്ട് പ്രോസിക്യൂഷൻ 

ഉണ്ടായ ജീവഹാനിയുടെ വ്യാപ്തി ചൂണ്ടിക്കാട്ടി, പ്രതിക്ക് വധശിക്ഷ നൽകണമെന്ന് പബ്ലിക് പ്രോസിക്യൂഷൻ ഡയറക്ടറുടെ ഓഫീസ് കോടതിയിൽ ആവശ്യപ്പെട്ടു. "പ്രതിയുടെ പശ്ചാത്തലം, അദ്ദേഹം പ്രകടിപ്പിക്കുന്ന പശ്ചാത്താപം, കുറ്റബോധം, കൂടാതെ അദ്ദേഹത്തിന് തിരുത്തലിനും ജീവിതത്തിലേക്ക് തിരിച്ചുവരാനുമുള്ള സാധ്യതകൾ എന്നിവ പരിഗണിച്ചുകൊണ്ട്, മക്കെൻസിക്ക് വധശിക്ഷ നൽകുന്നതിനെ പ്രോസിക്യൂഷൻ പിന്തുണയ്ക്കുന്നു," എന്ന് ഡെപ്യൂട്ടി ഡയറക്ടർ ഓഫ് പബ്ലിക് പ്രോസിക്യൂഷൻസ് ജാമി യമിന ഈ ആഴ്ച വ്യക്തമാക്കി. മക്കെൻസിയുടെ ആശയങ്ങളാൽ പൂർണ്ണമായും സ്വാധീനിക്കപ്പെട്ടവരും, വീണ്ടും കുറ്റകൃത്യങ്ങളിൽ ഏർപ്പെടാൻ സാധ്യതയുള്ളവരുമാണ് കൂട്ടുപ്രതികളെന്ന് വാദിച്ച പ്രോസിക്യൂഷൻ, അവർക്ക് ജീവപര്യന്തം തടവുശിക്ഷ നൽകണമെന്നും ആവശ്യപ്പെട്ടു. കെനിയയിലെ നിയമപ്രകാരം വധശിക്ഷ നിലവിലുണ്ടെങ്കിലും, 1987-ന് ശേഷം രാജ്യത്ത് വധശിക്ഷ നടപ്പാക്കിയിട്ടില്ല.

ആൾദൈവ സംഘത്തിലെ ഞെട്ടിക്കുന്ന വിവരങ്ങൾ 

മക്കെൻസിക്കെതിരായ വിചാരണയ്ക്കിടെ ഏകദേശം 120 സാക്ഷികൾ മൊഴി നൽകി. ഇവരുടെ മൊഴികൾ പ്രകാരം, ഈ സംഘം ഔദ്യോഗിക വിദ്യാഭ്യാസത്തെ "സാത്താൻ്റെ സൃഷ്ടി" എന്ന് മുദ്രകുത്തുകയും, ആധുനിക വൈദ്യശാസ്ത്രത്തെയും ആശുപത്രികളെയും പിശാചിൻ്റെ ഉപകരണങ്ങളായി കാണുകയും ചെയ്തു. കൂടാതെ, അനുയായികൾ പുറംലോകവുമായുള്ള ബന്ധം പൂർണ്ണമായും വിച്ഛേദിക്കണമെന്നും ഇവർ നിർബന്ധിച്ചു. ഒരു മനുഷ്യാവകാശ സംഘടന അധികൃതർക്ക് വിവരം നൽകിയതിനെത്തുടർന്ന്, ഷകാഹോള വനപ്രദേശത്തുള്ള 325 ഹെക്ടർ വിസ്തൃതിയുള്ള ഫാമിൽ നിന്ന് ചില അനുയായികളെ രക്ഷപ്പെടുത്തുകയും, 2023 ഏപ്രിലിൽ മക്കെൻസിയെ അറസ്റ്റ് ചെയ്യുകയും ചെയ്തു. വെള്ളിയാഴ്ച കോടതിയിൽ ഹാജരായപ്പോൾ, പോളോ ഷർട്ട് ധരിച്ച് നേരിയ പുഞ്ചിരിയോടെ, യാതൊരു ഭാവഭേദവുമില്ലാത്ത രീതിയിലായിരുന്നു മുൻ ടാക്സി ഡ്രൈവർ കൂടിയായ ഇയാളുടെ പെരുമാറ്റം.