ന്യൂഡല്‍ഹി: 2027ലെ സിബിഎസ്ഇ പത്ത്, പന്ത്രണ്ട് ക്ലാസ് ബോര്‍ഡ് പരീക്ഷകളുടെ ഡേറ്റ് ഷീറ്റ് പ്രസിദ്ധീകരിച്ചു. പരീക്ഷകള്‍ ഫെബ്രുവരി 16ന് ആരംഭിക്കും. പത്താം ക്ലാസ് പരീക്ഷകള്‍ 2027 മാര്‍ച്ച് ഒന്‍പതിന് അവസാനിക്കും. പന്ത്രണ്ടാം ക്ലാസ് പരീക്ഷകള്‍ ഏപ്രില്‍ ഒമ്പത് വരെയാണ് നടക്കുക. എല്ലാ പരീക്ഷകളും രാവിലെ 10.30നാണ് ആരംഭിക്കുന്നത്.
പത്താം ക്ലാസ് പരീക്ഷ ഫെബ്രുവരി 16ന് പെയിന്റിങ് വിഷയത്തോടെയാണ് ആരംഭിക്കുന്നത്. ഫെബ്രുവരി 17ന് ഗണിതം (സ്റ്റാന്‍ഡേര്‍ഡ്, ബേസിക്), 19ന് ഹോം സയന്‍സും 22ന് സയന്‍സ് പരീക്ഷയും നടക്കും. 24ന് കമ്പ്യൂട്ടര്‍ ആപ്ലിക്കേഷന്‍സ്, ഇന്‍ഫര്‍മേഷന്‍ ടെക്‌നോളജി, ആര്‍ട്ടിഫിഷ്യല്‍ ഇന്റലിജന്‍സ് വിഷയങ്ങളുടെ പരീക്ഷ നടക്കും. ഫെബ്രുവരി 26ന് ഇംഗ്ലീഷ് പരീക്ഷയും ഫെബ്രുവരി 27ന് മലയാളം ഉള്‍പ്പെടെയുള്ള പ്രാദേശിക ഭാഷാ പരീക്ഷകളും നടത്തും. മാര്‍ച്ച് മൂന്നിനാണ് ഹിന്ദി പരീക്ഷ. മാര്‍ച്ച് നാലിന് ഉറുദു, പഞ്ചാബി, ബംഗാളി, തമിഴ്, മറാഠി, ഗുജറാത്തി, മണിപ്പൂരി, തെലുങ്ക് തുടങ്ങിയ ഭാഷാ വിഷയങ്ങളിലും പരീക്ഷ നടക്കും.
2026-27 അധ്യയന വര്‍ഷത്തെ പത്ത്, പന്ത്രണ്ട് ക്ലാസുകളിലെ പ്രായോഗിക പരീക്ഷകളും ഇന്റേണല്‍ അസസ്‌മെന്റുകളും ജനുവരി ഒന്ന് മുതല്‍ ഫെബ്രുവരി 13 വരെ നടത്തും. ഇന്ത്യയിലും വിദേശത്തുമുള്ള അഫിലിയേറ്റഡ് സ്‌കൂളുകള്‍ക്ക് ഈ സമയക്രമം ബാധകമാണ്. അതേസമയം, ശൈത്യകാല അവധിയുള്ള മേഖലകളിലെ സ്‌കൂളുകളില്‍ പ്രായോഗിക പരീക്ഷകള്‍ നവംബര്‍ ഒന്‍പത് മുതല്‍ ഡിസംബര്‍ 19 വരെ നടത്തും.
വിഷയങ്ങള്‍ തിരിച്ചുള്ള പരീക്ഷാ തീയതികള്‍, സമയക്രമം, മറ്റ് നിര്‍ദേശങ്ങള്‍ എന്നിവ വിദ്യാര്‍ഥികള്‍ ഔദ്യോഗിക വിജ്ഞാപനത്തില്‍ പരിശോധിക്കണം. സിബിഎസ്ഇയുടെ ഔദ്യോഗിക വെബ്‌സൈറ്റായ cbse.gov.in വഴി ഡേറ്റ് ഷീറ്റ് ഡൗണ്‍ലോഡ് ചെയ്യാം. രാജ്യത്തിനകത്തും വിദേശത്തുമുള്ള വിവിധ കേന്ദ്രങ്ങളിലായി എഴുത്തുപരീക്ഷാ രീതിയിലാണ് ബോർഡ് പരീക്ഷകൾ നടക്കുക. വിദ്യാർഥികൾക്ക് പരീക്ഷാ രീതിയും മാർക്കിംഗ് രീതിയും മനസ്സിലാക്കുന്നതിനായി സിബിഎസ്ഇ അക്കാദമിക് പോർട്ടലിൽ നിന്ന് മാതൃകാ ചോദ്യപേപ്പറുകൾ ഡൗൺലോഡ് ചെയ്യാം.
സിബിഎസ്ഇ 10, 12 ക്ലാസുകളിലെ വിദ്യാർഥികളുടെ പ്രാക്ടിക്കൽ പരീക്ഷകൾ, പ്രൊജക്ട് മൂല്യനിർണയം, ഇൻ്റേണൽ അസസ്മെൻ്റ് എന്നിവയുടെ തീയതികൾ നേരത്തെ തന്നെ പ്രഖ്യാപിച്ചിരുന്നു. ശൈത്യകാല മേഖലകളിലെ സ്കൂളുകളിൽ 2026 നവംബർ ഒൻപത് മുതൽ ഡിസംബർ ആറ് വരെയാണ് പ്രാക്ടിക്കൽ പരീക്ഷകൾ നടക്കുക. ഇന്ത്യയിലെ മറ്റ് സിബിഎസ്ഇ സ്കൂളുകളിലും വിദേശത്തുള്ള സ്കൂളുകളിലും 2027 ജനുവരി ഒന്ന് മുതലായിരിക്കും പ്രാക്ടിക്കൽ പരീക്ഷകൾ ആരംഭിക്കുക. വിദ്യാർഥികൾക്ക് തങ്ങളുടെ സ്കൂളുകളിൽ നിന്ന് ഇത് സംബന്ധിച്ച കൂടുതൽ വിവരങ്ങൾ ലഭിക്കും.
പരീക്ഷാ കേന്ദ്രങ്ങളിലെ അടിസ്ഥാന സൗകര്യങ്ങൾ ഉറപ്പാക്കുന്നതിനും സുഗമമായ നടത്തിപ്പിനുമുള്ള ക്രമീകരണങ്ങൾ സിബിഎസ്ഇ ഇതിനകം തന്നെ ആരംഭിച്ചിട്ടുണ്ട്. പരീക്ഷാ ക്രമക്കേടുകൾ തടയുന്നതിനായി കർശനമായ നിരീക്ഷണ സംവിധാനങ്ങളും ഇത്തവണ ഏർപ്പെടുത്തും. വിദ്യാർഥികളുടെ മാനസിക സമ്മർദം കുറയ്ക്കുന്നതിനായി സ്കൂളുകൾ കേന്ദ്രീകരിച്ച് പ്രത്യേക കൗൺസലിങ് ക്ലാസുകളും സംഘടിപ്പിക്കാൻ ബോർഡ് നിർദേശം നൽകിയിട്ടുണ്ട്.
സിബിഎസ്ഇ 10, 12 ബോര്‍ഡ് പരീക്ഷകള്‍ ഫെബ്രുവരി 16 മുതല്‍; ഡേറ്റ് ഷീറ്റ് പ്രസിദ്ധീകരിച്ചു
