മുംബൈ: ബോളിവുഡ് താരം ടൈഗര്‍ ഷ്രോഫിനെ ലക്ഷ്യമിട്ട് മുംബൈയില്‍ വെടിവയ്പ് നടത്തിയ സംഭവത്തില്‍ കൂടുതല്‍ വിവരങ്ങള്‍ പുറത്ത്. ആക്രമണവുമായി ബന്ധപ്പെട്ട് രാജസ്ഥാനിലെ കോട്ട റെയില്‍വേ സ്റ്റേഷനില്‍നിന്ന് അറസ്റ്റിലായ മൂന്ന് പ്രതികള്‍ക്ക് 50,000 രൂപ മുന്‍കൂറായി നല്‍കിയിരുന്നുവെന്നാണ് റിപ്പോര്‍ട്ടുകള്‍. ആക്രമണം വിജയിച്ചാല്‍ കൂടുതല്‍ പണം നല്‍കാമെന്നും വാഗ്ദാനം ചെയ്തിരുന്നതായാണ് വിവരം.
18 മുതല്‍ 22 വയസ്സുവരെ പ്രായമുള്ള മൂന്ന് പ്രതികളെയും മുംബൈയിലെത്തിച്ചിട്ടുണ്ട്. ആക്രമണത്തിന് മുമ്പും ശേഷവും ഇവര്‍ നിര്‍ദേശങ്ങള്‍ നല്‍കിയിരുന്നവരുമായി നിരന്തരം ബന്ധപ്പെട്ടിരുന്നതായി എന്‍ ഡി ടി വി റിപ്പോര്‍ട്ട് ചെയ്തു. വെടിവയ്പിന് മുമ്പ് ടൈഗര്‍ ഷ്രോഫ് ഫുട്‌ബോള്‍ കളിക്കുന്നതിന്റെ ദൃശ്യങ്ങള്‍ പകര്‍ത്തി മേലധികാരികള്‍ക്ക് അയച്ചശേഷം ആക്രമണത്തിന് അനുമതി തേടിയതായും അന്വേഷണസംഘത്തിന് സംശയമുണ്ട്.
വെടിവയ്പിനു പിന്നാലെ മോട്ടോര്‍സൈക്കിളില്‍ രക്ഷപ്പെട്ട പ്രതികള്‍ ആക്രമണം പൂര്‍ത്തിയായ വിവരം ഉടന്‍ ബന്ധപ്പെട്ടവര്‍ക്ക് കൈമാറിയതായാണ് അന്വേഷണ ഉദ്യോഗസ്ഥരെ ഉദ്ധരിച്ചുള്ള റിപ്പോര്‍ട്ട്.
ആക്രമണത്തിന്റെ ഉത്തരവാദിത്തം ഏറ്റെടുത്തുകൊണ്ടുള്ള ഫെയ്‌സ്ബുക്ക് പോസ്റ്റും ഓഡിയോ സന്ദേശവും നേരത്തേ തയ്യാറാക്കിയിരുന്നതായും റിപ്പോര്‍ട്ടില്‍ പറയുന്നു. വെടിവയ്പിന്റെ വാര്‍ത്ത മാധ്യമങ്ങളില്‍ വന്നതിനു പിന്നാലെ അനില്‍ പണ്ഡിറ്റും കൂട്ടാളികളും ഈ സന്ദേശങ്ങള്‍ പുറത്തുവിട്ടതായാണ് വിവരം.
ഒക്ടോബര്‍ 19നാണ് രാജസ്ഥാനിലെ കോട്ട റെയില്‍വേ സ്റ്റേഷനില്‍നിന്ന് മൂന്ന് പ്രതികളെ അറസ്റ്റ് ചെയ്തത്. ഹരിയാന സ്വദേശികളായ രണ്ടുപേരും മഹാരാഷ്ട്ര സ്വദേശിയായ ഒരാളുമാണ് അറസ്റ്റിലായതെന്നാണ് റിപ്പോര്‍ട്ടുകള്‍.
ബേഗുസരായില്‍ നിന്നുള്ള ഹൃതിക് എന്ന റോഷന്‍ (22), സോനിപത്തില്‍ നിന്നുള്ള റേഹാന്‍ (18), ഹരിയാന സ്വദേശിയായ ഫൂല്‍ സിങ് (18) എന്നിവരാണ് പ്രതികളെന്ന് റിപ്പോര്‍ട്ടില്‍ പറയുന്നു. ടൈഗര്‍ ഷ്രോഫ് സഞ്ചരിച്ചിരുന്ന കാറിനുനേരെ ഒന്നിലധികം തവണ വെടിയുതിര്‍ത്ത സംഭവത്തില്‍ ഇവര്‍ക്കെതിരെ കൊലപാതകശ്രമത്തിന് കേസെടുത്തിട്ടുണ്ട്.
സംഭവത്തില്‍ മുംബൈ പൊലീസിന്റെ ആന്റി എക്‌സ്റ്റോര്‍ഷന്‍ സെല്ലാണ് അന്വേഷണം നടത്തുന്നത്. വൈദ്യപരിശോധനയ്ക്കുശേഷം പ്രതികളെ കോടതിയില്‍ ഹാജരാക്കുമെന്നാണ് റിപ്പോര്‍ട്ട്.