ഹരിദ്വാര്: രാജ്യത്തെ ഞെട്ടിച്ച നിഥാരി കൊലപാതക കേസിലെ പ്രധാന പ്രതികളിലൊരാളായ സുരേന്ദ്ര കോലി ഹരിദ്വാറില് ആത്മഹത്യ ചെയ്തതായി റിപ്പോര്ട്ട്. ഹരിദ്വാറിലെ ഭൂപത്വാല മേഖലയില് വര്ഷങ്ങളായി ചായക്കട നടത്തിവരികയായിരുന്ന കോലിയെ വെള്ളിയാഴ്ച രാവിലെ കടയ്ക്കുള്ളില് തൂങ്ങിമരിച്ച നിലയില് കണ്ടെത്തിയതായാണ് റിപ്പോര്ട്ടുകള്.
വെള്ളിയാഴ്ച രാവിലെ 11.30ഓടെ മരണത്തെക്കുറിച്ച് പൊലീസിന് വിവരം ലഭിച്ചതായി എസ് എച്ച് ഒ കുന്ദന് സിങ് റാണയെ ഉദ്ധരിച്ച് ആജ് തക് റിപ്പോര്ട്ട് ചെയ്തു. സംഭവവുമായി ബന്ധപ്പെട്ട സാഹചര്യങ്ങള് സംബന്ധിച്ച് ഔദ്യോഗിക പൊലീസ് സ്ഥിരീകരണം ഇതുവരെ ലഭിച്ചിട്ടില്ല.
ഉത്തരാഖണ്ഡിലെ അല്മോറ ജില്ലയിലെ മഗ്രു ഖാല് സ്വദേശിയായ സുരേന്ദ്ര കോലി നോയിഡയിലെ വ്യവസായി മോനീന്ദര് സിങ് പന്ധേറിന്റെ വീട്ടില് വീട്ടുജോലിക്കാരനായി ജോലി ചെയ്തിരുന്നു. 2006ല് പന്ധേറിന്റെ നോയിഡയിലെ ഡി-5 വസതിക്ക് സമീപത്തെ ഓടയില് കാണാതായ കുട്ടികളുടെ മൃതദേഹാവശിഷ്ടങ്ങള് കണ്ടെത്തിയതോടെയാണ് നിഥാരി കൊലപാതക കേസ് രാജ്യശ്രദ്ധ നേടിയത്.
സുപ്രിം കോടതി കുറ്റവിമുക്തനാക്കിയിരുന്നു
നിഥാരി കേസുമായി ബന്ധപ്പെട്ട് ശേഷിച്ചിരുന്ന അവസാന കേസിലെ ശിക്ഷയും 2025 നവംബറില് സുപ്രിം കോടതി റദ്ദാക്കിയിരുന്നു. പ്രോസിക്യൂഷന് ഹാജരാക്കിയ തെളിവുകളില് ഗുരുതരമായ നിയമപരമായ പോരായ്മകളുണ്ടെന്നും കുറ്റം സംശയാതീതമായി തെളിയിക്കുന്നതില് പ്രോസിക്യൂഷന് പരാജയപ്പെട്ടെന്നും ചൂണ്ടിക്കാട്ടിയായിരുന്നു കോടതി നടപടി. തുടര്ന്ന് കോലിയെ വിട്ടയക്കാനും ഉത്തരവിട്ടു.
നിഥാരി കേസിലെ മറ്റ് നിരവധി കേസുകളിലും അലഹബാദ് ഹൈക്കോടതി നേരത്തെ കോലിയെ കുറ്റവിമുക്തനാക്കിയിരുന്നു. ഈ കുറ്റവിമുക്ത നടപടികള് പിന്നീട് സുപ്രിം കോടതിയും ശരിവച്ചു.
19 പേരുടെ മരണവുമായി ബന്ധപ്പെട്ട കേസ്
2006 ഡിസംബര് 29ന് നോയിഡയിലെ നിഥാരിയില് ഡി-5 വീടിന് സമീപത്തെ ഓടയില് മനുഷ്യരുടെ അസ്ഥികൂടങ്ങളും മറ്റ് മൃതദേഹാവശിഷ്ടങ്ങളും കണ്ടെത്തിയതോടെയാണ് കേസ് പുറത്തറിയുന്നത്. അന്വേഷണത്തില് കുട്ടികളും യുവതികളും ഉള്പ്പെടെ കുറഞ്ഞത് 19 പേരുടെ തിരോധാനവും മൃതദേഹാവശിഷ്ടങ്ങളും കേസുമായി ബന്ധപ്പെടുത്തി.
വ്യവസായി മോനീന്ദര് സിങ് പന്ധേറിന്റെ വീട്ടില് ജോലി ചെയ്തിരുന്ന സുരേന്ദ്ര കോലിക്കെതിരെ കൊലപാതകം, തട്ടിക്കൊണ്ടുപോകല്, ബലാത്സംഗം, തെളിവ് നശിപ്പിക്കല് തുടങ്ങിയ കുറ്റങ്ങളാണ് വിവിധ കേസുകളില് ചുമത്തിയത്. പന്ധേറിനെതിരെയും വിവിധ കേസുകളില് കുറ്റങ്ങള് ചുമത്തിയിരുന്നു.
നിരവധി കേസുകളില് വധശിക്ഷ
2009 മുതല് 2017 വരെയുള്ള കാലയളവില് നിഥാരി കേസുമായി ബന്ധപ്പെട്ട 13 കേസുകളില് കോലി കുറ്റക്കാരനാണെന്ന് വിവിധ കോടതികള് കണ്ടെത്തിയിരുന്നു. ഇതില് നിരവധി കേസുകളില് വധശിക്ഷ വിധിക്കുകയും ചെയ്തു.
റിംപ ഹല്ദാര് കൊലപാതക കേസില് 2011ല് സുപ്രിം കോടതി കോലിയുടെ വധശിക്ഷ ശരിവച്ചിരുന്നു. എന്നാല് ദയാഹര്ജി പരിഗണിക്കുന്നതിലെ ദീര്ഘകാല കാലതാമസം ചൂണ്ടിക്കാട്ടി 2015ല് അലഹബാദ് ഹൈക്കോടതി വധശിക്ഷ ജീവപര്യന്തം തടവായി കുറച്ചു.
പിന്നീട് ശിക്ഷകള് റദ്ദായി
2023 ഒക്ടോബറില് അലഹബാദ് ഹൈക്കോടതി പരിഗണിച്ചിരുന്ന ശേഷിച്ച കേസുകളില് സുരേന്ദ്ര കോലിയെയും മോനീന്ദര് സിങ് പന്ധേറിനെയും കുറ്റവിമുക്തരാക്കി. കുറ്റം സംശയാതീതമായി തെളിയിക്കുന്നതില് പ്രോസിക്യൂഷന് പരാജയപ്പെട്ടതായി കോടതി വിലയിരുത്തി. 2025 ജൂലൈയില് സുപ്രിം കോടതിയും ഈ കുറ്റവിമുക്ത നടപടികള് ശരിവച്ചു.
തുടര്ന്ന് 2025 നവംബറില് റിംപ ഹല്ദാര് കേസിലെ കോലിയുടെ അവസാനത്തെ ശിക്ഷയും സുപ്രിം കോടതി റദ്ദാക്കി. മറ്റ് കേസുകളില് വിശ്വാസയോഗ്യമല്ലെന്ന് കണ്ടെത്തിയ തെളിവുകളുടെ അടിസ്ഥാനത്തില് ഈ ശിക്ഷ നിലനിര്ത്തുന്നത് നീതിന്യായത്തിന്റെ പരാജയത്തിന് ഇടയാക്കുമെന്നായിരുന്നു കോടതിയുടെ നിരീക്ഷണം. ഇതോടെയാണ് നിഥാരി കേസുകളിലെ കോലിയുടെ എല്ലാ ശിക്ഷകളും നിയമപരമായി അവസാനിച്ചത്.