ന്യൂഡല്‍ഹി: സ്‌പെഷ്യല്‍ ഇന്റന്‍സീവ് റിവിഷന്‍ (എസ് ഐ ആര്‍) നടപടിക്കെതിരെ പ്രതിപക്ഷത്തിന്റെയും കോക്രോച്ച് ജനതാ പാര്‍ട്ടിയുടെയും പ്രതിഷേധം തുടരുന്നതിനിടെ 17 സംസ്ഥാനങ്ങളിലും കേന്ദ്രഭരണ പ്രദേശങ്ങളിലും വോട്ടര്‍പട്ടികയുടെ സ്‌പെഷ്യല്‍ സമ്മറി റിവിഷന്‍ (എസ് എസ് ആര്‍) നടത്താന്‍ ഉത്തരവിട്ട് തെരഞ്ഞെടുപ്പ് കമ്മീഷന്‍. രാജ്യത്തിന്റെ മറ്റ് ഭാഗങ്ങളില്‍ എസ് ഐ ആര്‍ നടപടികള്‍ തുടരുന്നതിനിടെയാണ് പുതിയ നീക്കം.
വോട്ടര്‍പട്ടികയിലെ കൃത്യത ഉറപ്പാക്കുകയും പട്ടികയിലെ പിഴവുകള്‍ തിരുത്തുകയും ചെയ്യുക എന്നതാണ് രണ്ട് നടപടികളുടെയും പൊതുവായ ലക്ഷ്യം. എന്നാല്‍ പരിശോധനയുടെ രീതിയിലും വ്യാപ്തിയിലും ഇവ തമ്മില്‍ വ്യത്യാസമുണ്ട്.
സ്‌പെഷ്യല്‍ ഇന്റന്‍സീവ് റിവിഷന്‍ (എസ് ഐ ആര്‍)
ജനപ്രാതിനിധ്യ നിയമം, 1950 പ്രകാരം തെരഞ്ഞെടുപ്പ് കമ്മീഷന്‍ നടത്തുന്ന വിപുലമായ വോട്ടര്‍പട്ടിക പുനഃപരിശോധനാ നടപടിയാണ് എസ് ഐ ആര്‍. വോട്ടര്‍പട്ടിക സമഗ്രമായി പരിശോധിച്ച് അര്‍ഹരായവരുടെ പേരുകള്‍ ഉള്‍പ്പെടുത്തുകയും അനര്‍ഹമായതോ തെറ്റായതോ ആയ എന്‍ട്രികള്‍ നീക്കം ചെയ്യുകയും ചെയ്യുകയാണ് പ്രധാന ലക്ഷ്യം.
വീടുതോറുമുള്ള പരിശോധന: തെരഞ്ഞെടുപ്പ് രജിസ്‌ട്രേഷന്‍ ഉദ്യോഗസ്ഥരുടെ നേതൃത്വത്തില്‍ വീടുകള്‍ സന്ദര്‍ശിച്ച് വോട്ടര്‍മാരുടെ വിവരങ്ങള്‍ പരിശോധിക്കുന്നതാണ് നടപടിയുടെ പ്രധാന ഭാഗം.
പുതിയ പേരുകള്‍ ഉള്‍പ്പെടുത്തല്‍: പട്ടികയില്‍ ഉള്‍പ്പെടാതെ പോയ അര്‍ഹരായ വോട്ടര്‍മാരുടെ പേരുകള്‍ ചേര്‍ക്കാന്‍ അവസരമൊരുക്കുന്നു.
അനര്‍ഹമായ എന്‍ട്രികള്‍ നീക്കം ചെയ്യല്‍: നടപടിക്രമങ്ങള്‍ പാലിച്ച് ഇരട്ട എന്‍ട്രികള്‍, മരിച്ചവരുടെ പേരുകള്‍, വോട്ടവകാശത്തിന് അര്‍ഹതയില്ലാത്തവരുടെ പേരുകള്‍ എന്നിവ നീക്കം ചെയ്യാം.
വിവരങ്ങള്‍ തിരുത്തല്‍: പേര്, വിലാസം, മറ്റ് വോട്ടര്‍ വിവരങ്ങള്‍ എന്നിവയിലെ പിഴവുകള്‍ തിരുത്താനും സഹായിക്കുന്നു.
സ്‌പെഷ്യല്‍ സമ്മറി റിവിഷന്‍ (എസ് എസ് ആര്‍)
വോട്ടര്‍പട്ടിക പുതുക്കുകയും അതിലെ പിഴവുകള്‍ തിരുത്തുകയും ചെയ്യുക എന്നതാണ് എസ് എസ് ആറിന്റെയും ലക്ഷ്യം. എന്നാല്‍ നിലവിലുള്ള വോട്ടര്‍പട്ടികയും അനുബന്ധ രേഖകളും അടിസ്ഥാനമാക്കിയുള്ള പരിശോധനയ്ക്കാണ് ഇതില്‍ പ്രധാന്യം നല്‍കുന്നത്.
നിലവിലുള്ള പട്ടികയുടെ പുനഃപരിശോധന: നിലവിലെ വോട്ടര്‍പട്ടിക പരിശോധിച്ച് ആവശ്യമായ തിരുത്തലുകള്‍ വരുത്തുകയാണ് പ്രധാനമായും ചെയ്യുന്നത്.
രേഖകള്‍ക്ക് മുന്‍ഗണന: നിലവിലുള്ള രേഖകള്‍, അപേക്ഷകള്‍, അവകാശവാദങ്ങള്‍ എന്നിവയുടെ അടിസ്ഥാനത്തിലാണ് നടപടികള്‍ മുന്നോട്ടുപോകുന്നത്. ആവശ്യമായ സാഹചര്യങ്ങളില്‍ കൂടുതല്‍ പരിശോധനയും നടത്തും.
പേരുകള്‍ ചേര്‍ക്കലും തിരുത്തലും: നിശ്ചിത ഫോമുകള്‍ സമര്‍പ്പിച്ച് പുതിയ പേരുകള്‍ ഉള്‍പ്പെടുത്താനും നിലവിലുള്ള വിവരങ്ങള്‍ തിരുത്താനും അര്‍ഹതയില്ലാത്ത എന്‍ട്രികള്‍ നീക്കം ചെയ്യാനും അപേക്ഷിക്കാം.
താരതമ്യേന പതിവ് നടപടി: എസ് ഐ ആറിനെ അപേക്ഷിച്ച് സാധാരണഗതിയില്‍ കുറഞ്ഞ വ്യാപ്തിയിലുള്ളതും നിലവിലുള്ള പട്ടികയിലെ തിരുത്തലുകള്‍ക്ക് പ്രാധാന്യം നല്‍കുന്നതുമായ നടപടിയാണ് എസ് എസ് ആര്‍.
പ്രധാന വ്യത്യാസം എന്താണ്?
എസ് ഐ ആര്‍ കൂടുതല്‍ സമഗ്രമായ പരിശോധനയും വീടുതോറുമുള്ള വിവരശേഖരണവും ഉള്‍ക്കൊള്ളുന്ന നടപടിയാണ്. എസ് എസ് ആര്‍ ആകട്ടെ, നിലവിലുള്ള വോട്ടര്‍പട്ടികയും രേഖകളും അടിസ്ഥാനമാക്കി ആവശ്യമായ കൂട്ടിച്ചേര്‍ക്കലുകളും തിരുത്തലുകളും നീക്കംചെയ്യലുകളും നടത്തുന്നതിന് പ്രാധാന്യം നല്‍കുന്നു.
രണ്ട് നടപടികളുടെയും ലക്ഷ്യം വോട്ടര്‍പട്ടികയുടെ കൃത്യത ഉറപ്പാക്കുക എന്നതാണെങ്കിലും, പരിശോധനയുടെ ആഴത്തിലും നടപടികളുടെ വ്യാപ്തിയിലുമാണ് പ്രധാന വ്യത്യാസം.