കോഴിക്കോട്: വനനിയമങ്ങള്‍ക്കെതിരെ വിമര്‍ശനവുമായി ഇ.പി. ജയരാജന്‍. വന നിയമത്തില്‍ മാറ്റങ്ങള്‍ വരുത്തിയില്ലെങ്കില്‍ നിയമം കൈയ്യിലെടുക്കാന്‍ ജനങ്ങളോട് പറയുമെന്നായിരുന്നു സിപിഐഎം നേതാവിന്റെ പ്രസ്താവന. കര്‍ഷക മുന്നേറ്റ ജാഥയ്ക്ക് കോഴിക്കോട് തൊട്ടില്‍പ്പാലത്ത് നല്‍കിയ സ്വീകരണ യോഗത്തിലാണ് ഇ.പിയുടെ പ്രസംഗം.
'ഈ നിയമത്തില്‍ കാലോചിതമായ മാറ്റങ്ങള്‍ വരുത്തൂ. ജീവന്‍ നഷ്ടപ്പെട്ടവരുടെ കുടുംബത്തെ രക്ഷപ്പെടുത്താനുള്ള നടപടി സ്വീകരിക്കൂ. ഈ ആവശ്യങ്ങള്‍ അംഗീകരിക്കുന്നില്ലെങ്കില്‍ കേരള കര്‍ഷക സംഘം നിയമം കയ്യിലെടുക്കാന്‍ ജനങ്ങളോട് പറയും. 1972ലെ കോണ്‍ഗ്രസിന്റെ ഈ നിയമം നിങ്ങള്‍ അം?ഗീകരിക്കണ്ട. ഇത് ജനങ്ങള്‍ക്ക് വേണ്ടി കോണ്‍?ഗ്രസ് കൊണ്ടുവന്ന നിയമമല്ല,' ഇ.പി. ജയരാജന്‍ പറഞ്ഞു.
ജനങ്ങളുടെയും കൃഷിക്കാരുടെയും സംരക്ഷണത്തിനായി വന്യമൃഗങ്ങളെ വേട്ടയാടാമെന്നും ഇ.പി. ജയരാജന്‍ പ്രസംഗത്തില്‍ പറയുന്നു. അമ്പും വില്ലും മറ്റായുധങ്ങളും നാടന്‍ തോക്കും ഒക്കെ ഉപയോഗിച്ച് കര്‍ഷകര്‍ക്ക് വന്യമൃഗങ്ങളെ കൊല്ലേണ്ട സാഹചര്യമുണ്ടാവും. നിയമം കയ്യിലെടുക്കാന്‍ ജനങ്ങളോട് കര്‍ഷക സംഘത്തിന് ആഹ്വാനം ചെയ്യേണ്ടിവരുമെന്നും ഇ.പി പറഞ്ഞു.
വനനിയമത്തില്‍ മാറ്റങ്ങള്‍ കൊണ്ടുവരണമെന്ന് ആവശ്യപ്പെട്ടാണ് കാസര്‍ഗോഡ് നിന്ന് തിരുവനന്തപുരം വരെയുള്ള കര്‍ഷക മുന്നേറ്റ ജാഥ. തിരുവനന്തപുരത്ത് എത്തുന്ന ജാഥ 30, 31 തീയതികളില്‍ വനം വകുപ്പിന്റെ ആസ്ഥാന മന്ദിരം വളയും.
വന നിയമങ്ങളില്‍മാറ്റം വരുത്തിയില്ലെങ്കില്‍ നിയമം കൈയ്യിലെടുക്കാന്‍ ജനങ്ങളോട് പറയേണ്ടിവരും-ഇ.പി ജയരാജന്‍
