മിനസോട്ട: പ്രശസ്ത ഷോപ്പിങ് കേന്ദ്രമായ മാള്‍ ഓഫ് അമേരിക്കയില്‍ കൂട്ടക്കൊല നടത്താന്‍ പദ്ധതിയിട്ടെന്നാരോപിച്ച് മിനസോട്ട സ്വദേശിയെ എഫ് ബി ഐ അറസ്റ്റ് ചെയ്തു. പുതുതായി പുറത്തുവിട്ട കോടതി രേഖകളിലാണ് കേസുമായി ബന്ധപ്പെട്ട വിവരങ്ങള്‍ വ്യക്തമാക്കുന്നത്.
ഷെയ്ഖ്ദൂന്‍ മൊഹമുദിനെയാണ് അറസ്റ്റ് ചെയ്തത്. ഇയാള്‍ക്ക് ഐ എസിന്റെ ആശയങ്ങളില്‍ പ്രചോദനമുണ്ടായിരുന്നു എന്നാണ് കരുതുന്നത്.
എഫ് ബി ഐയുടെ രഹസ്യവിവരദാതാവില്‍ നിന്ന് എകെ-47 തോക്കും 200 റൗണ്ട് വെടിയുണ്ടകളും വാങ്ങിയതായാണ് ഇയാള്‍ക്കെതിരെയുള്ള പ്രധാന ആരോപണം. മാള്‍ ഓഫ് അമേരിക്കയില്‍ നടക്കുന്ന ഒരു പരിപാടിക്കിടെ ആക്രമണം നടത്തുന്നതിനാണ് ആയുധങ്ങള്‍ ഉപയോഗിക്കാന്‍ ഉദ്ദേശിച്ചതെന്ന് പ്രോസിക്യൂഷന്‍ ആരോപിച്ചു.
2024 ഡിസംബര്‍ മുതല്‍ മൊഹമുദിനെ എഫ് ബി ഐ നിരീക്ഷിച്ചുവരികയായിരുന്നു. സൊമാലിയയിലേക്ക് പോയി അല്‍-ഷബാബിനൊപ്പം പോരാടുകയോ അമേരിക്കയില്‍ വന്‍തോതില്‍ ആളപായമുണ്ടാക്കുന്ന ആക്രമണം നടത്തുകയോ ചെയ്യുന്നതിനെക്കുറിച്ച് എഫ് ബി ഐയുടെ രഹസ്യവിവരദാതാവ് ഇയാളുമായി ആശയവിനിമയം നടത്തിയതായി കോടതി രേഖകള്‍ പറയുന്നു.
മൊഹമുദ് രക്തസാക്ഷിത്വം നേടാനുള്ള ആഗ്രഹം പ്രകടിപ്പിച്ചുകൊണ്ട് നിരവധി സന്ദേശങ്ങള്‍ അയച്ചിരുന്നുവെന്നാണ് പ്രോസിക്യൂഷന്റെ ആരോപണം. അമേരിക്കയില്‍ തോക്ക് വാങ്ങി നിരവധി വെള്ളക്കാരെ കൊലപ്പെടുത്തുന്നതിനെക്കുറിച്ചും ഇയാള്‍ സന്ദേശങ്ങളില്‍ സംസാരിച്ചിരുന്നതായി അധികൃതര്‍ പറയുന്നു.
2025 ഡിസംബറോടെ ഐ എസിനെ പിന്തുണയ്ക്കുന്നതില്‍ മൊഹമുദ് താത്പര്യം പ്രകടിപ്പിച്ചതായും പ്രോസിക്യൂഷന്‍ പറയുന്നു. വിദേശത്തേക്ക് പോയി ആക്രമണസംഘത്തില്‍ ചേരുന്നതിനുപകരം പിന്നീട് അമേരിക്കയ്ക്കുള്ളില്‍ തന്നെ ആക്രമണം നടത്തുന്നതിലേക്ക് ഇയാളുടെ ശ്രദ്ധ മാറിയെന്നാണ് അന്വേഷണ രേഖകളിലുള്ളത്.
ന്യൂ ഓര്‍ലിയന്‍സില്‍ പുതുവത്സരാഘോഷത്തിനിടെ ആക്രമണം നടത്തിയ വ്യക്തിയെയും പള്‍സ് നൈറ്റ്ക്ലബ്ബിലെ വെടിവയ്പിന് ഉത്തരവാദിയായ ഒമര്‍ മതീനെയും തന്റെ ആക്രമണത്തിന് പ്രചോദനമായവരായി മൊഹമുദ് പരാമര്‍ശിച്ചിരുന്നതായി പ്രോസിക്യൂഷന്‍ ആരോപിച്ചു.
മാള്‍ ഓഫ് അമേരിക്ക യഹൂദരുടെ ഉടമസ്ഥതയിലുള്ളതാണെന്ന് വിശ്വസിച്ചിരുന്നതിനാലാണ് അതിനെ ലക്ഷ്യമിട്ടതെന്നും അവിടെ 30 പേരെ കൊലപ്പെടുത്തിയാല്‍ പോലും പിന്നീട് ആളുകള്‍ അവിടേക്ക് പോകില്ലെന്നും ഇയാള്‍ എഫ് ബി ഐയുടെ രഹസ്യവിവരദാതാവിനോട് പറഞ്ഞതായി അന്വേഷണ രേഖകളില്‍ പറയുന്നു.
ഓഗസ്റ്റില്‍ എകെ-47 തോക്കും വെടിയുണ്ടകളും കൈപ്പറ്റുന്നതിനായി രഹസ്യവിവരദാതാവുമായി കൂടിക്കാഴ്ച നടത്താനുള്ള നീക്കങ്ങള്‍ മൊഹമുദ് ആരംഭിച്ചതായാണ് ആരോപണം. തിരിച്ചറിയുന്നതിനായി ഇയാള്‍ സ്വന്തം ചിത്രങ്ങളും അയച്ചിരുന്നു.
ഒക്ടോബര്‍ ആറിന് ആയുധ ഇടപാട് പൂര്‍ത്തിയാക്കുന്നതിനായി കൂടിക്കാഴ്ച നടത്താന്‍ ഇരുവരും തീരുമാനിച്ചതായി കോടതി രേഖകള്‍ വ്യക്തമാക്കുന്നു. ഒക്ടോബര്‍ 24-ന് മാള്‍ ഓഫ് അമേരിക്കയില്‍ നടക്കുന്ന പരിപാടിയില്‍ ആക്രമണം നടത്താനാണ് പദ്ധതിയിട്ടിരുന്നതെന്നും പ്രോസിക്യൂഷന്‍ ആരോപിക്കുന്നു.
കൂടിക്കാഴ്ചയ്ക്കിടെ രഹസ്യവേഷത്തില്‍ എത്തിയ എഫ് ബി ഐ ഉദ്യോഗസ്ഥന്‍ വലിയ ഡഫിള്‍ ബാഗില്‍ എകെ-47 തോക്കും നാല് മാഗസിനുകളും 200 റൗണ്ട് വെടിയുണ്ടകളും മൊഹമുദിന് കൈമാറിയതായി അധികൃതര്‍ പറയുന്നു.
താന്‍ ഐ എസ് അംഗമാണെന്ന് ഉദ്യോഗസ്ഥന്‍ മൊഹമുദിനോട് പറഞ്ഞതായും തുടര്‍ന്ന് ആക്രമണപദ്ധതിയെക്കുറിച്ച് ചോദിച്ചതായും പ്രോസിക്യൂഷന്‍ പറയുന്നു. മാള്‍ ഓഫ് അമേരിക്കയിലെ പരിപാടി ലക്ഷ്യമിട്ട് ആക്രമണം നടത്താനുള്ള പദ്ധതി മൊഹമുദ് വീണ്ടും വിശദീകരിച്ചെന്നാണ് ആരോപണം.
മാള്‍ യഹൂദരുടെ ഉടമസ്ഥതയിലുള്ളതാണെന്ന് താന്‍ വിശ്വസിക്കുന്നതായും സാന്‍ ഡിയാഗോയിലെ ഇസ്ലാമിക കേന്ദ്രത്തിന് നേരെയുണ്ടായ മെയ് മാസത്തെ ആക്രമണത്തിന് പിന്നാലെ മുസ്ലിംകള്‍ക്ക് നേരെയുണ്ടായ മോശം പെരുമാറ്റത്തില്‍ തനിക്ക് അമര്‍ഷമുണ്ടെന്നും മൊഹമുദ് പറഞ്ഞതായി അഫിഡവിറ്റില്‍ പറയുന്നു.
വാഹനത്തില്‍ നിന്ന് പുറത്തിറങ്ങിയതിന് പിന്നാലെ എഫ് ബി ഐ ഉദ്യോഗസ്ഥര്‍ തോക്ക് ചൂണ്ടി മൊഹമുദിനെ അറസ്റ്റ് ചെയ്തതായും രേഖകളില്‍ പറയുന്നു.
ആക്രമണം നടക്കുന്നതിന് മുമ്പ് തന്നെ ഭീഷണി കണ്ടെത്തി തടയാന്‍ ഫെഡറല്‍ നിയമപാലകര്‍ക്ക് കഴിഞ്ഞതായി മിനസോട്ട യു എസ് അറ്റോര്‍ണി ഡാന്‍ റോസന്‍ പറഞ്ഞു.
അറസ്റ്റ് വിപുലമായ നിയമപാലന- ഇന്റലിജന്‍സ് നടപടികളുടെ ഫലമാണെന്നും പ്രതി ആക്രമണം നടത്തുന്നതിന് മുമ്പ് തന്നെ ഭീഷണി തിരിച്ചറിഞ്ഞ് തടയാന്‍ ഉദ്യോഗസ്ഥര്‍ക്ക് കഴിഞ്ഞെന്നും റോസന്‍ വ്യക്തമാക്കി.
30 മുതല്‍ 60 വരെ ആളുകളെ കൊലപ്പെടുത്താന്‍ സാധ്യതയുണ്ടെന്ന് മൊഹമുദ് പറഞ്ഞിരുന്നതായി പരാതിയില്‍ ആരോപിക്കുന്നതായും റോസന്‍ പറഞ്ഞു.
മൊഹമുദും എഫ് ബി ഐയുടെ രഹസ്യവിവരദാതാവും തമ്മില്‍ നടന്ന വിപുലമായ ആശയവിനിമയങ്ങള്‍ അന്വേഷണ ഉദ്യോഗസ്ഥര്‍ ചൂണ്ടിക്കാട്ടി. ആക്രമണം നടത്താനുള്ള പ്രതിയുടെ ഉറച്ച തീരുമാനമാണ് സന്ദേശങ്ങളില്‍ നിന്ന് വ്യക്തമാകുന്നതെന്നാണ് അധികൃതരുടെ വാദം.
മൊഹമുദ് മറ്റുള്ളവര്‍ക്ക് അയച്ചതായി പറയപ്പെടുന്ന സന്ദേശങ്ങള്‍ അതീവ ആശങ്കാജനകമാണെന്ന് എഫ് ബി ഐ സ്‌പെഷ്യല്‍ ഏജന്റ് ക്രിസ്റ്റഫര്‍ ഡോഡ്‌സണ്‍ പറഞ്ഞു. ആശയപരമായ അക്രമത്തെ പിന്തുണയ്ക്കുന്ന നിലപാടുകളും സമൂഹത്തില്‍ അക്രമം നടത്താനുള്ള ആഗ്രഹവും സന്ദേശങ്ങളില്‍ പ്രകടമായിരുന്നുവെന്നാണ് അദ്ദേഹത്തിന്റെ ആരോപണം.
മൊഹമുദ് അമേരിക്കയില്‍ ജനിച്ച അമേരിക്കന്‍ പൗരനാണെന്നാണ് കരുതുന്നതെന്ന് ഡാന്‍ റോസന്‍ പറഞ്ഞു. ഇയാളുടെ മാതാപിതാക്കളുടെ സ്വദേശമായി സൊമാലിയയെയാണ് പരാതിയില്‍ രേഖപ്പെടുത്തിയിരിക്കുന്നത്.
2025-ല്‍ മൊഹമുദ് ഓണ്‍ലൈനില്‍ തീവ്രവാദപരമായ ഉള്ളടക്കങ്ങള്‍ പങ്കുവെച്ചതായി അധികൃതര്‍ക്ക് വിവരം ലഭിച്ചതിനെ തുടര്‍ന്ന് എഫ് ബി ഐ നേരത്തെ തന്നെ ഇടപെടാന്‍ ശ്രമിച്ചിരുന്നുവെന്നും റോസന്‍ പറഞ്ഞു.
മൊഹമുദിന്റെ മാതാപിതാക്കളുമായി സംസാരിക്കുന്നതിനായി ഫെഡറല്‍ ഉദ്യോഗസ്ഥര്‍ വീട്ടിലെത്തിയെങ്കിലും അന്വേഷണ ഉദ്യോഗസ്ഥരുമായി സംസാരിക്കാന്‍ അവര്‍ തയ്യാറായില്ലെന്നും അദ്ദേഹം വ്യക്തമാക്കി.
കുട്ടികള്‍ തീവ്രവാദ ആശയങ്ങളിലേക്ക് വഴുതിപ്പോകുന്നതായി ഫെഡറല്‍ നിയമപാലകരില്‍ നിന്ന് മുന്നറിയിപ്പ് ലഭിച്ചാല്‍ മാതാപിതാക്കള്‍ അത് ഗൗരവത്തോടെ പരിഗണിക്കണമെന്നും റോസന്‍ അഭ്യര്‍ഥിച്ചു.