വാഷിങ്ടൺ: അമേരിക്കൻ വൈസ് പ്രസിഡന്റ് ജെ.ഡി. വാൻസിനും ഭാര്യയും ഇന്ത്യൻ വംശജയുമായ സെക്കൻഡ് ലേഡി ഉഷ വാൻസിനും നാലാമത്തെ കുഞ്ഞ് പിറന്നു. അലക് നീൽ വാൻസ് എന്ന ആൺകുഞ്ഞാണ് ജനിച്ചതെന്ന് ജെ.ഡി. വാൻസ് സമൂഹമാധ്യമമായ എക്സിലൂടെ അറിയിച്ചു. അമ്മയും കുഞ്ഞും സുഖമായിരിക്കുന്നുവെന്നും മൂത്ത മൂന്ന് മക്കൾക്ക് കുഞ്ഞനുജനെ സ്വീകരിക്കാൻ വലിയ സന്തോഷമാണെന്നും അദ്ദേഹം കുറിച്ചു.
പ്രസവശുശ്രൂഷ നൽകിയ വാൾട്ടർ റീഡ് മെഡിക്കൽ സെന്ററിലെയും വൈറ്റ് ഹൗസ് മെഡിക്കൽ യൂണിറ്റിലെയും ഡോക്ടർമാർക്കും ജീവനക്കാർക്കും വാൻസ് നന്ദി അറിയിച്ചു. 2014ലാണ് ജെ.ഡി. വാൻസും ഉഷ വാൻസും വിവാഹിതരായത്. ഇവർക്ക് ഇതിനുമുമ്പ് മൂന്ന് മക്കളുണ്ട്.
ഉഷ വാൻസ് ഇന്ത്യൻ വംശജയാണ്. അമേരിക്കയിലെ കാലിഫോർണിയയിലെ സാൻ ഡിയാഗോയിലാണ് അവർ ജനിച്ച് വളർന്നത്. ഇന്ത്യയിൽ നിന്ന് അമേരിക്കയിലേക്ക് കുടിയേറിയ മാതാപിതാക്കളുടെ മകളാണ് ഉഷ. നിയമരംഗത്ത് ശ്രദ്ധേയമായ കരിയർ നേടിയ അവർ, ജെ.ഡി. വാൻസ് അമേരിക്കൻ വൈസ് പ്രസിഡന്റായതിന് പിന്നാലെ രാജ്യത്തിന്റെ സെക്കൻഡ് ലേഡിയായി ചുമതലയേറ്റു.
കുടുംബത്തോടൊപ്പം കുറച്ചുകാലം ചെലവഴിക്കുന്നതിനായി വാൻസ് ദമ്പതികൾ വിർജീനിയയിലെ ഗ്രാമപ്രദേശത്തുള്ള വസതിയിലേക്ക് മാറുമെന്നാണ് അമേരിക്കൻ മാധ്യമങ്ങൾ റിപ്പോർട്ട് ചെയ്യുന്നത്.
അതേസമയം, ഉഷ വാൻസിന്റെ ഇന്ത്യൻ വംശപരമായ പശ്ചാത്തലവും ജെ.ഡി. വാൻസിന്റെ ചില രാഷ്ട്രീയവ്യക്തിപരമായ ബന്ധങ്ങളും നേരത്തേ അമേരിക്കൻ മാധ്യമങ്ങളിൽ ചർച്ചയായിരുന്നു. അന്തരിച്ച കൺസർവേറ്റീവ് രാഷ്ട്രീയ പ്രവർത്തകൻ ചാർലി കർക്കിന്റെ ഭാര്യ എറിക്ക കിർക്കുമായുള്ള സംഭാഷണമാണ് നാലാമത്തെ കുഞ്ഞിനെക്കുറിച്ച് തീരുമാനമെടുക്കാൻ പ്രചോദനമായതെന്ന് ജെ.ഡി. വാൻസ് മുൻപ് വെളിപ്പെടുത്തിയിരുന്നു. കുറച്ച് മക്കൾ മാത്രമുള്ളതിൽ പിന്നീട് ഖേദം തോന്നിയതായി എറിക്ക പറഞ്ഞത് തങ്ങളെയും സ്വാധീനിച്ചുവെന്നാണ് അദ്ദേഹം വ്യക്തമാക്കിയത്.
നാലാമത്തെ കുഞ്ഞിന് ജന്മം നൽകി ഉഷ വാൻസ്; സന്തോഷവാർത്ത പങ്കുവെച്ച് അമേരിക്കൻ വൈസ് പ്രസിഡന്റ് ജെ.ഡി. വാൻസ്
