സാവോ പോളോ: ബ്രസീലില്‍ പ്രസിഡന്റ് തെരഞ്ഞെടുപ്പില്‍ പരാജയപ്പെട്ട ഫ്‌ളാവിയോ ബോള്‍സൊനാരോ കുടുംബത്തോടൊപ്പം അര്‍ജന്റീനയിലേക്ക് കടന്നശേഷം സ്വകാര്യ വിമാനത്തില്‍ അമേരിക്കയിലെ മയാമിയിലെത്തി. ബുധനാഴ്ച രാവിലെയാണ് അദ്ദേഹം മയാമിയില്‍ ഇറങ്ങിയത്. ബ്രസീലില്‍നിന്ന് കുടുംബത്തോടൊപ്പം രാജ്യം വിട്ട് അര്‍ജന്റീനയിലെത്തിയ ശേഷം അവിടെനിന്ന് അമേരിക്കയിലേക്ക് യാത്ര തിരിക്കുകയായിരുന്നു.
അര്‍ജന്റീനയില്‍നിന്ന് ചൊവ്വാഴ്ച രാത്രി പുറപ്പെട്ട സ്വകാര്യ വിമാനത്തില്‍നിന്ന് ഫ്‌ളാവിയോ ബോള്‍സൊനാരോയും കുടുംബാംഗങ്ങളും ഇറങ്ങിവരുന്ന ദൃശ്യങ്ങള്‍ ടെലിവിഷന്‍ ചാനലുകള്‍ പുറത്തുവിട്ടു. ബോള്‍സൊനാരോയ്ക്കും കുടുംബത്തിനും അമേരിക്കയില്‍ നിയമപരമായി പ്രവേശിക്കാന്‍ ആവശ്യമായ വിസ അനുവദിക്കുമെന്ന് ഡൊണള്‍ഡ് ട്രംപ് ഭരണകൂടം നേരത്തേ അറിയിച്ചിരുന്നു.
ബ്രസീല്‍ പ്രസിഡന്റ് ലൂയിസ് ഇനാസിയോ ലുല ഡ സില്‍വയോട് ഞായറാഴ്ച നടന്ന തെരഞ്ഞെടുപ്പില്‍ പരാജയപ്പെട്ടതിനു പിന്നാലെയാണ് ബോള്‍സൊനാരോയുടെ യാത്ര. തെരഞ്ഞെടുപ്പില്‍ വ്യക്തമായ ഭൂരിപക്ഷത്തോടെയാണ് ഡ സില്‍വ വിജയിച്ചത്. തെരഞ്ഞെടുപ്പ് ഫലം പുറത്തുവന്നതിനു പിന്നാലെ സാമ്പത്തിക കുറ്റകൃത്യങ്ങളുമായി ബന്ധപ്പെട്ട ആരോപണങ്ങളില്‍ അന്വേഷണം നേരിടുന്ന ബോള്‍സൊനാരോയോട് പാസ്പോര്‍ട്ടുകള്‍ കൈമാറാനും രാജ്യത്ത് തുടരാനും ബ്രസീല്‍ അധികൃതര്‍ ആവശ്യപ്പെട്ടിരുന്നു.
മുന്‍ പ്രസിഡന്റ് ജൈര്‍ ബോള്‍സൊനാരോയുടെ മകനായ ഫ്‌ളാവിയോ ആരോപണങ്ങള്‍ നിഷേധിച്ചു. ബ്രസീല്‍ സുപ്രിം കോടതിയുടെ നേതൃത്വത്തില്‍ തനിക്കും കുടുംബത്തിനുമെതിരെ രാഷ്ട്രീയ പകപോക്കലാണ് നടക്കുന്നതെന്നാണ് അദ്ദേഹത്തിന്റെ ആരോപണം. ഞായറാഴ്ചത്തെ തെരഞ്ഞെടുപ്പ് ഫലം അംഗീകരിക്കാനും അദ്ദേഹം തയ്യാറായിട്ടില്ല. തെരഞ്ഞെടുപ്പില്‍ ക്രമക്കേട് നടന്നിരിക്കാമെന്ന ബോള്‍സൊനാരോയുടെ വാദത്തെ ട്രംപും പിന്തുണച്ചിരുന്നു. തിങ്കളാഴ്ച മാധ്യമ പ്രവര്‍ത്തകരോട് സംസാരിക്കവെ തെരഞ്ഞെടുപ്പ് കൃത്രിമം നടന്നതുപോലെയാണ് തോന്നുന്നതെന്ന് ട്രംപ് അഭിപ്രായപ്പെട്ടതായി റിപ്പോര്‍ട്ടില്‍ പറയുന്നു.
ഭാര്യ ഫെര്‍ണാണ്ടയും മക്കളായ കരോലിനയും ലൂയിസയും ഒപ്പമുണ്ടായിരുന്ന ബോള്‍സൊനാരോ ചൊവ്വാഴ്ച രാത്രി പ്രാദേശിക സമയം 10.50ന് ബ്രസീലില്‍നിന്ന് അര്‍ജന്റീനയിലേക്ക് കടന്നതായി അര്‍ജന്റീന അധികൃതര്‍ അറിയിച്ചു.
അര്‍ജന്റീന, ബ്രസീല്‍, പരാഗ്വേ എന്നീ രാജ്യങ്ങളുടെ അതിര്‍ത്തികള്‍ സംഗമിക്കുന്ന മിസിയോനെസ് പ്രവിശ്യയിലെ ടാന്‍ക്രെഡോ നെവസ് അന്താരാഷ്ട്ര പാലം വഴിയാണ് കുടുംബം അര്‍ജന്റീനയിലെത്തിയത്.
അര്‍ജന്റീന പ്രസിഡന്റ് ഹാവിയര്‍ മിലെയ് ബോള്‍സൊനാരോയുടെ ശക്തമായ പിന്തുണക്കാരിലൊരാളാണ്. സാധുവായ യാത്രാരേഖകളുമായാണ് കുടുംബം രാജ്യത്ത് പ്രവേശിച്ചതെന്നും പ്രവേശനത്തിന് നിയമപരമായ തടസ്സങ്ങളൊന്നും ഉണ്ടായിരുന്നില്ലെന്നും അര്‍ജന്റീന അധികൃതര്‍ വ്യക്തമാക്കി.
രാത്രി 11.30-ഓടെ, അതിര്‍ത്തി കടന്ന് ഏകദേശം 40 മിനിറ്റിനുശേഷം, ബോള്‍സൊനാരോയും കുടുംബവും ബെയ്‌റസ് ഫ്‌ളൈ എന്ന അര്‍ജന്റീനിയന്‍ ചാര്‍ട്ടര്‍ കമ്പനിയുടെ സ്വകാര്യ വിമാനത്തില്‍ കയറി. വിമാനത്തിന്റെ യാത്രാപദ്ധതിയില്‍ ഇക്വഡോറിലെ ഗ്വായാക്വിലായിരുന്നു ആദ്യ ലക്ഷ്യസ്ഥാനമായി രേഖപ്പെടുത്തിയിരുന്നതെന്ന് അര്‍ജന്റീന പ്രസിഡന്റ് വക്താവ് ഫാബിയന്‍ ഫെര്‍ണാണ്ടസ് അറിയിച്ചു. വിമാനത്തിന്റെ രജിസ്‌ട്രേഷന്‍ നമ്പര്‍ എല്‍വി-ജെക്യുഡബ്ല്യു എന്നാണ്.
വിമാനയാത്ര നിരീക്ഷണ വിവരങ്ങള്‍ പ്രകാരം ബുധനാഴ്ച പുലര്‍ച്ചെ 12.21-ന് അര്‍ജന്റീനയിലെ പ്യൂര്‍ട്ടോ ഇഗ്വാസുവില്‍നിന്ന് വിമാനം പുറപ്പെട്ടു. തുടര്‍ന്ന് ഇക്വഡോറിലെ ഗ്വായാക്വിലില്‍ അല്‍പ്പസമയം നിര്‍ത്തിയശേഷം മയാമിയിലേക്ക് യാത്ര തുടര്‍ന്നു. രാവിലെ ഏകദേശം 9.25-ന് മയാമിയിലെ ഒപാ-ലോക്ക എക്‌സിക്യൂട്ടീവ് വിമാനത്താവളത്തില്‍ വിമാനം ഇറങ്ങി.
ബോള്‍സൊനാരോ വിമാനത്തിലുണ്ടാകാമെന്ന റിപ്പോര്‍ട്ടുകളെത്തുടര്‍ന്ന് ചൊവ്വാഴ്ച പുലര്‍ച്ചെ ബെയ്‌റസ് ഫ്‌ളൈയുടെ സ്വകാര്യ വിമാനം അര്‍ജന്റീന അധികൃതര്‍ പരിശോധിച്ചിരുന്നു. എന്നാല്‍ ബോള്‍സൊനാരോ അതില്‍ യാത്ര ചെയ്യാന്‍ പദ്ധതിയിട്ടിരുന്നതായി തെളിവുകളൊന്നും അന്ന് കണ്ടെത്താനായില്ലെന്നാണ് അധികൃതര്‍ അറിയിച്ചത്.
തെരഞ്ഞെടുപ്പില്‍ പരാജയപ്പെട്ടശേഷം ഫ്‌ളാവിയോ ബോള്‍സൊനാരോയുടെ അവസാന പൊതുപ്രസ്താവന തിങ്കളാഴ്ച രാത്രിയായിരുന്നു. ഇന്‍സ്റ്റഗ്രാമില്‍ പങ്കുവെച്ച വീഡിയോയില്‍ വോട്ടര്‍മാര്‍ക്ക് നന്ദി അറിയിച്ച അദ്ദേഹം തെരഞ്ഞെടുപ്പില്‍ ക്രമക്കേടുകള്‍ നടന്നിരിക്കാമെന്ന ആരോപണം ആവര്‍ത്തിച്ചു.
താന്‍ തെറ്റൊന്നും ചെയ്തിട്ടില്ലെന്നും പാസ്പോര്‍ട്ടുകള്‍ കൈമാറാന്‍ തയ്യാറാണെന്നും വീഡിയോയില്‍ അദ്ദേഹം വ്യക്തമാക്കി.
ബ്രസീലിലെ സാമ്പത്തിക കുറ്റകൃത്യങ്ങളുമായി ബന്ധപ്പെട്ട ആരോപണങ്ങളില്‍ അന്വേഷണം തുടരുന്നതിനിടെയാണ് ബോള്‍സൊനാരോ കുടുംബത്തോടൊപ്പം അമേരിക്കയിലെത്തിയിരിക്കുന്നത്.