സനാ/ജെറുസലേം: യെമനിലെ ഹൂതി വിമതർ ഇസ്രയേലിനെതിരെ വീണ്ടും മിസൈൽഡ്രോൺ ആക്രമണം നടത്തിയതായി അറിയിച്ചു. 24 മണിക്കൂറിനുള്ളിൽ രണ്ടാമത്തെ ആക്രമണമാണിത്. പശ്ചിമേഷ്യയിലെ യുദ്ധം കൂടുതൽ വ്യാപിക്കുന്നതിനുള്ള സൂചനയാണിതെന്ന് വിലയിരുത്തപ്പെടുന്നു.
ഇറാനുമായി ബന്ധമുള്ള ഹൂത്തി മൂവ്മെന്റ്, ഇസ്രയേലിലെ സൈനിക കേന്ദ്രങ്ങൾ ലക്ഷ്യമാക്കി ബാലിസ്റ്റിക് മിസൈലുകൾ പ്രയോഗിച്ചതായി അവകാശപ്പെട്ടു. ഇറാൻ, ലെബനൻ, ഇറാഖ്, പലസ്തീൻ പ്രദേശങ്ങൾ എന്നിവിടങ്ങളിലെ ആക്രമണങ്ങൾക്ക് മറുപടിയായാണ് നടപടി എന്നും സംഘം അറിയിച്ചു.
അതേസമയം, യെമനിൽ നിന്ന് പ്രയോഗിച്ച മിസൈൽ തിരിച്ചറിഞ്ഞ് പ്രതിരോധ സംവിധാനങ്ങൾ ഉപയോഗിച്ച് തടഞ്ഞതായി ഇസ്രയേൽ സൈന്യം വ്യക്തമാക്കി. ജനങ്ങൾ സുരക്ഷാ നിർദേശങ്ങൾ പാലിക്കണമെന്നും അധികൃതർ അറിയിച്ചു.
ഫെബ്രുവരി 28ന് അമേരിക്കയും ഇസ്രായേലും ഇറാനിൽ നടത്തിയ വ്യോമാക്രമണങ്ങളോടെയാണ് സംഘർഷം ആരംഭിച്ചത്. തുടർന്ന് ഇറാന്റെ പരമോന്നത നേതാവ് അലി ഖമനെയി കൊല്ലപ്പെട്ടതായും റിപ്പോർട്ടുകളുണ്ട്.
സംഘർഷം രൂക്ഷമായതോടെ സമുദ്ര ഗതാഗതത്തിലും പ്രത്യാഘാതമുണ്ടായി. ഹോർമുസ് കടലിടുക്ക് ഒഴിവാക്കാൻ സൗദി അറേബ്യ എണ്ണ കയറ്റുമതി ചെങ്കടൽ തുറമുഖങ്ങളിലൂടെ തിരിച്ചുവിട്ടു. ഹൂതികളുടെ ഇടപെടൽ ചെങ്കടലിലും അറേബ്യൻ കടലിലും കപ്പൽഗതാഗതത്തിന് കൂടുതൽ ഭീഷണിയുണ്ടാക്കുമെന്നാണ് ആശങ്ക.
ഇതിനിടെ, പ്രസിഡന്റ് ട്രംപ് സമാധാന ചർച്ചകൾക്ക് തയ്യാറാണെന്ന സൂചന നൽകിയിട്ടുണ്ട്. പാകിസ്ഥാൻ മധ്യസ്ഥതയിൽ ചർച്ചകൾ നടക്കാനിടയുണ്ടെന്നും റിപ്പോർട്ടുകളുണ്ട്.
ഹൂതികളുടെ മിസൈൽ ആക്രമണം വീണ്ടും; ഇസ്രയേലിനെതിരെ യുദ്ധം വ്യാപിക്കുന്നു
