ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവിന്റെ നിർദേശത്തെ തുടർന്ന് ജെറുസലേമിലെ ഹോളി സെപൾക്കർ ദേവാലയത്തിൽ ലാറ്റിൻ പാത്രിയാർക്ക് കാർഡിനാൾ പിയർബട്ടിസ്റ്റ പിസ്സബല്ലയ്ക്ക് പൂർണ്ണവും തൽക്ഷണവുമായ പ്രവേശനം അനുവദിക്കാൻ സർക്കാർ തീരുമാനിച്ചു. പാല്മ് സണ്ടേ ദിനത്തിൽ ദേവാലയത്തിൽ പ്രവേശനം നിഷേധിച്ചതിനെ തുടർന്ന് ലോകവ്യാപകമായി ഉയർന്ന ശക്തമായ വിമർശനങ്ങളുടെ പശ്ചാത്തലത്തിലാണ് തീരുമാനം മാറ്റിയത്.
ഇറാനുമായുള്ള യുദ്ധസാഹചര്യത്തിൽ സുരക്ഷാ ഭീഷണി ചൂണ്ടിക്കാട്ടി പിസ്സബല്ലയെയും സഹവികാരിയായ ഫാദർ ഫ്രാൻസെസ്കോ ഇൽപോയെയും ദേവാലയത്തിന് പുറത്തുവെച്ച് പൊലീസ് തടഞ്ഞിരുന്നു. യേശുക്രിസ്തുവിന്റെ കുരിശു മരണവും പുനരുത്ഥാനവും നടന്നതായി വിശ്വസിക്കുന്ന ഈ വിശുദ്ധ സ്ഥലത്ത് പാല്മ് സണ്ടേ ആരാധന നടത്താൻ എത്തിയപ്പോഴായിരുന്നു സംഭവം. നൂറ്റാണ്ടുകളായി തുടരുന്ന ആചാരത്തിൽ ആദ്യമായാണ് ലാറ്റിൻ പാത്രിയാർക്കിനെ ഇത്തരത്തിൽ തടയുന്നതെന്ന് സഭ അറിയിച്ചു.
“മതസ്വാതന്ത്ര്യത്തെയും യുക്തിബോധത്തെയും ലംഘിക്കുന്ന നടപടിയാണ് ഇത്” എന്ന് പാത്രിയാർക്കേറ്റ് പ്രസ്താവനയിൽ പറഞ്ഞു. എല്ലാ സുരക്ഷാനിബന്ധനകളും പാലിച്ചിട്ടുണ്ടെന്നും ചെറിയ സ്വകാര്യ പ്രാർത്ഥനയ്ക്ക് മാത്രമാണ് അനുമതി തേടിയതെന്നും അവർ വ്യക്തമാക്കി.
അമേരിക്കൻ സ്ഥാനപതി മൈക്ക് ഹക്കബി ഈ നടപടി “അവസരവാദപരമായ അതിരുവിട്ട തീരുമാനം” എന്ന് വിമർശിച്ചു. ഇറ്റലി പ്രധാനമന്ത്രി ജോർജിയ മെലോണിയും ഫ്രാൻസ് പ്രസിഡന്റ് ഇമ്മാനുവൽ മക്രോണും മതസ്വാതന്ത്ര്യ ലംഘനമാണെന്ന് പ്രതികരിച്ചു. റോമിൽ പ്രസംഗിച്ച പാപ്പ ലിയോ പതിനാലാമൻ മധ്യപൂർവേഷ്യയിലെ ക്രൈസ്തവരുടെ ദുരിതാവസ്ഥയും ചൂണ്ടിക്കാട്ടി.
സുരക്ഷാ കാരണങ്ങളാലാണ് ആദ്യം നിയന്ത്രണം ഏർപ്പെടുത്തിയതെന്ന് നെതന്യാഹു വിശദീകരിച്ചു. ഇറാൻ മിസൈൽ ആക്രമണങ്ങൾ ജെറുസലേമിലെ വിശുദ്ധ കേന്ദ്രങ്ങളെ ലക്ഷ്യമാക്കിയിരുന്നതായി അദ്ദേഹം പറഞ്ഞു. എന്നാൽ, സംഭവത്തിൽ ദോഷകരമായ ഉദ്ദേശമൊന്നുമില്ലായിരുന്നുവെന്നും ഇനി സഭാ നേതാക്കൾക്ക് ആവശ്യമായ രീതിയിൽ ആരാധന നടത്താൻ സൗകര്യം ഒരുക്കുമെന്നും അദ്ദേഹം കൂട്ടിച്ചേർത്തു.
വിമർശനങ്ങൾ ശക്തമായ സാഹചര്യത്തിൽ ഇസ്രായേൽ സർക്കാർ നിലപാട് തിരുത്തിയത് ശ്രദ്ധേയമാണ്.