ടെഹ്റാന്: യു എസിന്റെ വിമാനവാഹിനി കപ്പലായ യു എസ് എസ് എബ്രഹാം ലിങ്കണ് പശ്ചിമേഷ്യയിലെത്തിയത് അഭ്യൂഹങ്ങള് ശക്തമാക്കി. മറ്റ് മൂന്ന് യുദ്ധകപ്പലുകളും എബ്രഹാം ലിങ്കണിനൊപ്പമുണ്ട്. യു എസ്- ഇറാന് ബന്ധം അത്യന്തം വഷളായിരിക്കുന്ന പശ്ചാത്തലത്തിലാണ് പശ്ചിമേഷ്യയിലേക്കുള്ള യു എസ് യുദ്ധക്കപ്പലുകളുടെ വരവ്. ജീവിതച്ചെലവ് കുതിച്ചു ഉയര്ന്നതിനെതിരെ ഇറാനിലുണ്ടായ സമീപകാല പ്രതിഷേധങ്ങളില് അമേരിക്ക ഇടപെട്ടതോടെയാണ് സംഘര്ഷം വര്ധിച്ചത്.
രാജ്യത്തിന് നേരെയുള്ള ഏത് ആക്രമണത്തെയും നേരിടാന് തങ്ങള് എപ്പോഴത്തേക്കാളും സജ്ജരാണെന്ന് ഇറാന്. നിലവിലെ സാഹചര്യത്തെ ഹൈബ്രിഡ് യുദ്ധം എന്നാണ് ഇറാന് വിദേശകാര്യ മന്ത്രാലയ വക്താവ് ഇസ്മായില് ബഗായ് വിശേഷിപ്പിച്ചത്. അമേരിക്കയില് നിന്നും ഇസ്രായേലില് നിന്നുമുള്ള ഭീഷണികളും അടിസ്ഥാനരഹിതമായ അവകാശവാദങ്ങളും തുടരുകയാണെന്ന് അദ്ദേഹം പറഞ്ഞു.
യു എസ് പ്രസിഡന്റ് ഡൊണാള്ഡ് ട്രംപിന്റെ സമീപകാല പ്രസ്താവനകളും യു എസ് യുദ്ധക്കപ്പലുകള് ഗള്ഫ് മേഖലയിലേക്ക് നീങ്ങുന്നുവെന്ന സൂചനയും അദ്ദേഹം പങ്കുവെച്ചു.
ഇറാനിലെ പ്രതിഷേധക്കാരെ സഹായിക്കുന്ന നിലപാടാണ് അമേരിക്കയെടുത്തത്. പ്രതിഷേധക്കാര്ക്കെതിരെ നടപടി സ്വീകരിക്കില്ലെന്ന് ഇറാന് വ്യക്തമാക്കിയതോടെ യു എസ് നിലപാട് മാറ്റിയിരുന്നു.