ന്യൂഡല്‍ഹി: ഇന്ത്യയുടെ വിദേശ ഇടപാടുകളിലെ മൊത്തം നില മെച്ചപ്പെടുന്നതോടെ രൂപയുടെ മൂല്യത്തില്‍ കൂടുതല്‍ സ്ഥിരതയുണ്ടാകുമെന്ന് ഐസിഐസിഐ ബാങ്കിന്റെ ഗവേഷണ റിപ്പോര്‍ട്ട്. 2026-27 സാമ്പത്തിക വര്‍ഷത്തില്‍ രാജ്യത്തിന്റെ പേയ്‌മെന്റ് ബാലന്‍സ് (BoP) മിച്ചം 97 ബില്യണ്‍ മുതല്‍ 100 ബില്യണ്‍ ഡോളര്‍ വരെയാകുമെന്നാണ് റിപ്പോര്‍ട്ടിലെ വിലയിരുത്തല്‍.
മൂലധന വരവിലെ സ്ഥിരത, നിയന്ത്രണവിധേയമായ വ്യാപാരക്കമ്മി, വിദേശനാണ്യ ശേഖരത്തിലെ വര്‍ധന എന്നിവ ആഗോള സാമ്പത്തിക അനിശ്ചിതത്വങ്ങളെ നേരിടാന്‍ ഇന്ത്യയ്ക്ക് കരുത്തേകും. വര്‍ഷത്തിന്റെ തുടക്കത്തില്‍ രൂപയിലുണ്ടായ കനത്ത ഇടിവിന് വിപരീതമായി ഇപ്പോള്‍ കൂടുതല്‍ സ്ഥിരത പ്രകടമാണെന്നും റിപ്പോര്‍ട്ട് ചൂണ്ടിക്കാട്ടുന്നു.
നടപ്പു അക്കൗണ്ട് കമ്മി നിയന്ത്രിക്കുന്നതില്‍ പ്രവാസിപ്പണത്തിന്റെ വരവും സേവന കയറ്റുമതിയിലെ വളര്‍ച്ചയും നിര്‍ണായകമാണ്. ഏപ്രില്‍-ജൂലൈ കാലയളവില്‍ പ്രവാസിപ്പണത്തിന്റെ വരവ് മുന്‍വര്‍ഷത്തെ അപേക്ഷിച്ച് 24 ശതമാനം വര്‍ധിച്ചു. ഏപ്രില്‍-ഓഗസ്റ്റ് കാലയളവില്‍ സേവന കയറ്റുമതി 8.5 ശതമാനവും ഉയര്‍ന്നു.
ക്രൂഡ് ഓയിലിന്റെ ശരാശരി വില ബാരലിന് 94 ഡോളറിനടുത്ത് തുടരുന്ന സാഹചര്യത്തില്‍ ചരക്കുവ്യാപാരക്കമ്മി 387-400 ബില്യണ്‍ ഡോളറായിരിക്കുമെന്നാണ് കണക്ക്. ഇതോടെ നടപ്പു അക്കൗണ്ട് കമ്മി മൊത്ത ആഭ്യന്തര ഉല്‍പാദനത്തിന്റെ (ജിഡിപി) 1.2-1.6 ശതമാനത്തിനുള്ളില്‍ നില്‍ക്കുമെന്നാണ് പ്രതീക്ഷ.
2026-27 സാമ്പത്തിക വര്‍ഷത്തിന്റെ ആദ്യ പാദത്തില്‍ ഇന്ത്യയുടെ സാമ്പത്തിക വളര്‍ച്ച 7.8 ശതമാനമായിരുന്നു. കയറ്റുമതി, നിക്ഷേപം, ഉല്‍പാദന മേഖല എന്നിവയാണ് വളര്‍ച്ചയ്ക്ക് പിന്തുണയേകിയത്. വാര്‍ഷിക വളര്‍ച്ച 7.1 ശതമാനമായിരിക്കുമെന്നാണ് റിപ്പോര്‍ട്ടിന്റെ വിലയിരുത്തല്‍.
അതേസമയം, മഴയുടെ കുറവും വിതയ്ക്കലിലെ ഇടിവും പണപ്പെരുപ്പ സമ്മര്‍ദം വര്‍ധിപ്പിച്ചേക്കാം. പണപ്പെരുപ്പം അഞ്ചു ശതമാനത്തിലെത്തുമെന്നാണ് പ്രതീക്ഷ. ഇത് പണനയത്തില്‍ കൂടുതല്‍ കടുപ്പമുള്ള നടപടികള്‍ക്ക് വഴിയൊരുക്കാനും സാധ്യതയുണ്ട്.
ഡോളറിന്റെ ശക്തിയും ഉയര്‍ന്ന എണ്ണവിലയും സമീപകാലത്ത് രൂപയ്ക്ക് സമ്മര്‍ദം സൃഷ്ടിച്ചേക്കാം. എന്നാല്‍ റിസര്‍വ് ബാങ്കിന്റെ ഇടപെടലുകള്‍ രൂപയുടെ അമിതമായ മൂല്യത്തകര്‍ച്ച നിയന്ത്രിക്കാന്‍ സഹായിക്കുമെന്ന് റിപ്പോര്‍ട്ട് വിലയിരുത്തുന്നു. ഇന്ത്യയുടെ വിദേശനാണ്യ ശേഖരം 780 ബില്യണ്‍ ഡോളറാണ്. ജൂലൈ അവസാനത്തെ കണക്കനുസരിച്ച് റിസര്‍വ് ബാങ്കിന്റെ ഫോര്‍വേഡ് ഡോളര്‍ ബുക്ക് 137 ബില്യണ്‍ ഡോളറാണ്.
40 കറന്‍സികളെ അടിസ്ഥാനമാക്കിയുള്ള യഥാര്‍ഥ ഫലപ്രദ വിനിമയ നിരക്കിന്റെ കണക്കില്‍ രൂപയുടെ മൂല്യം ഇപ്പോഴും കുറവാണെന്നും റിപ്പോര്‍ട്ട് ചൂണ്ടിക്കാട്ടുന്നു. സമീപകാലത്ത് ഡോളറിനെതിരെ രൂപ 94-96 നിലവാരത്തിനുള്ളില്‍ വ്യാപാരം നടത്തുമെന്നാണ് പ്രവചനം.
രൂപയ്ക്ക് കരുത്തേകി വിദേശനാണ്യ വരവ് ; 2026-27ല്‍ ഇന്ത്യയുടെ ബാലന്‍സ് പേയ്‌മെന്റ്‌സ് മിച്ചം 100 ബില്യണ്‍ ഡോളറിലെത്തുമെന്ന് റിപ്പോര്‍ട്ട്
