കൊച്ചി: സിഎംആർഎൽ-എക്സാലോജിക് സാമ്പത്തിക ഇടപാടുകളുമായി ബന്ധപ്പെട്ട കള്ളപ്പണക്കേസിൽ മുഖ്യമന്ത്രി പിണറായി വിജയന്റെ മകൾ ടി. വീണയെ എൻഫോഴ്സ്മെന്റ് ഡയറക്ടറേറ്റ് (ഇ.ഡി) 10 മണിക്കൂർ നീണ്ട ചോദ്യംചെയ്യലിന് ശേഷം വിട്ടയച്ചു. അടുത്ത ആഴ്ച വീണ്ടും ഹാജരാകാൻ ഇ.ഡി നിർദേശിച്ചിട്ടുണ്ട്. ഈ കേസിൽ രണ്ടാം തവണയാണ് വീണയെ ഇ.ഡി ചോദ്യം ചെയ്യുന്നത്.
ഈ മാസം 29ന് ഹാജരാകാൻ നേരത്തെ നോട്ടീസ് നൽകിയിരുന്നെങ്കിലും, സീരിയസ് ഫ്രോഡ് ഇൻവെസ്റ്റിഗേഷൻ ഓഫിസിന്റെ (എസ്എഫ്ഐഒ) കുറ്റപത്രവുമായി ബന്ധപ്പെട്ട 134 രേഖകൾ ഇന്നലെ ഇ.ഡിക്ക് ലഭിച്ചതിനെ തുടർന്നാണ് ചോദ്യംചെയ്യൽ ഇന്ന് നടത്തിയത്. രേഖകൾ ലഭിക്കുന്നതിൽ ഉണ്ടായ താമസം കാരണം നടപടികൾ വൈകിയിരുന്നുവെന്നാണ് വിവരം.
വീണ മാനേജിങ് ഡയറക്ടറായ എക്സാലോജിക് സൊല്യൂഷൻസ് കമ്പനി യാതൊരു സേവനവും നൽകാതെ സിഎംആർഎൽ കമ്പനിയിൽ നിന്ന് 2.78 കോടി രൂപ കൈപ്പറ്റിയെന്നും, സഹോദര സ്ഥാപനത്തിന്റെ അക്കൗണ്ടിൽ നിന്ന് 50 ലക്ഷം രൂപ വായ്പയായി ലഭിച്ചെന്നും ഇ.ഡി ആരോപിക്കുന്നു. ഈ തുക കള്ളപ്പണനിരോധന നിയമപ്രകാരം 'കുറ്റകൃത്യത്തിലൂടെ സമ്പാദിച്ച പണം' എന്ന വിഭാഗത്തിൽപ്പെടുന്നതാണെന്നാണ് അന്വേഷണ ഏജൻസിയുടെ നിലപാട്.
കേസിന്റെ ഭാഗമായി പ്രതികളുമായി ബന്ധപ്പെട്ട വീടുകളിലും സ്ഥാപനങ്ങളിലും നേരത്തെ ഇ.ഡി പരിശോധന നടത്തിയിരുന്നു. ഇ.ഡിയും എസ്എഫ്ഐഒയും ഇതുവരെ ശേഖരിച്ച രേഖകൾ, മൊഴികൾ, മറ്റ് തെളിവുകൾ എന്നിവ വിശദമായി പരിശോധിച്ച ശേഷമാണ് ചോദ്യംചെയ്യൽ നടപടികൾ ശക്തമാക്കിയിരിക്കുന്നത്. കേസിലെ തുടർനടപടികൾ അടുത്ത ദിവസങ്ങളിൽ നിർണായകമാകുമെന്നാണ് സൂചന.
സിഎംആർഎൽ-എക്സാലോജിക് കേസ്: 10 മണിക്കൂർ ചോദ്യം ചെയ്ത ശേഷം വീണ വിജയനെ വിട്ടയച്ചു; വീണ്ടും വിളിപ്പിക്കും
