തിരുവനന്തപുരം: നാലു ദിവസത്തെ സന്ദര്‍ശനത്തിന് രാഷ്ട്രപതി ദ്രൗപതി മുര്‍മു കേരളത്തിലെത്തി. തിരുവനന്തപുരം വിമാനത്താവളത്തിലെത്തിയ രാഷ്ട്രപതി ചൊവ്വാഴ്ച രാത്രി രാജ്ഭവനില്‍ താമസിച്ച ശേഷം ബുധനാഴ്ച ഹെലികോപ്റ്ററില്‍ ഗവര്‍ണര്‍ രാജേന്ദ്ര വിശ്വനാഥ് അര്‍ലേക്കര്‍, അദ്ദേഹത്തിന്റെ പത്‌നി എന്നിവര്‍ക്കൊപ്പം നിലയ്ക്കലേയ്ക്കു പോകും.
അവിടെ നിന്ന് വാഹനത്തില്‍ പമ്പയിലെത്തി ഗണപതീക്ഷേത്ര ദര്‍ശനം നടത്തി കെട്ടുനിറച്ച ശേഷം വനം വകുപ്പിന്റെ പ്രത്യേക ഫോഴ്‌സ് ഗൂര്‍ഖ വാഹനത്തില്‍ സന്നിധാനത്തേക്ക്. തുടര്‍ന്ന് ആചാരപരമായി പതിനെട്ടാം പടി ചവിട്ടി ശബരീശ ദര്‍ശനവും ആരതിയും നടത്തും.
ദേവസ്വം ഗസ്റ്റ് ഹൗസിലെ വിശ്രമത്തിനും ഭക്ഷണത്തിനും ശേഷം തിരുവനന്തപുരത്ത് രാജ്ഭവനില്‍ തിരിച്ചെത്തുന്ന രാഷ്ട്രപതി വ്യാഴാഴ്ച രാവിലെ അവിടെ മുന്‍ രാഷ്ട്രപതി കെ ആര്‍ നാരായണന്റെ അര്‍ധകായ പ്രതിമ അനാച്ഛാദനം ചെയ്യും. പിന്നീട് വര്‍ക്കല ശിവഗിരി മഠത്തിലെത്തി ശ്രീനാരായണ ഗുരുദേവന്റെ മഹാസമാധി ശതാബ്ദി ആഘോഷം ഉദ്ഘാടനം ചെയ്യും.
അന്നു തന്നെ പാലാ സെന്റ് തോമസ് കോളെജിന്റെ പ്ലാറ്റിനം ജൂബിലി ആഘോഷങ്ങളുടെ സമാപന ചടങ്ങിലും പങ്കെടുക്കും. അതിനുശേഷം കോട്ടയം കുമരകത്തു താമസിക്കുന്ന ദ്രൗപദി മുര്‍മു 24ന് എറണാകുളം സെ്ന്റ് തെരേസാസ് കോളെജിന്റെ ശതാബ്ദി ആഘോഷ പരിപാടിയില്‍ സംബന്ധിക്കും. വൈകുന്നേരം വ്യോമസേനാ വിമാനത്തില്‍ ഡല്‍ഹിയിലേക്ക് മടങ്ങും.