പാരീസ്: വനിതകളുടെ 10 മീറ്റര്‍ എയര്‍ പിസ്റ്റള്‍ ഇനത്തില്‍ ഇന്ത്യയുടെ മനു ഭാക്കറിന് വെങ്കല മെഡല്‍. 2024 പാരീസ് ഒളിമ്പിക്സില് രാജ്യത്തിനായി ആദ്യ മെഡല്‍ നേടുന്ന താരമായി മനു.
10 മീറ്റര്‍ എയര്‍ പിസ്റ്റളില്‍ വെങ്കലം നേടിയതോടെ ഒളിമ്പിക്സ് മെഡല്‍ നേടുന്ന ആദ്യ ഇന്ത്യന്‍ വനിതാ ഷൂട്ടര്‍ കൂടിയായി ഭാക്കര്‍.
മനു ഭാക്കര്‍ 580 പോയിന്റുമായാണ് ഫൈനലിലേക്ക് യോഗ്യത നേടിയത്. ആദ്യ എട്ട് സ്ഥാനക്കാരാണ് ഞായറാഴ്ച ഫൈനലിലേക്ക് കടന്നത്.
ഇന്ത്യയുടെ അഞ്ചാമത്തെ ഷൂട്ടിംഗ് മെഡലാണിത്. നേരത്തെ 2004 ഏഥന്‍സ് ഒളിംപിക്‌സില്‍ രാജ്യവര്‍ധന്‍ സിംഗ് റാത്തോഡിന് വെള്ളി, 2008 ബീജിംഗില്‍ ബിന്ദ്രയ്ക്ക് സ്വര്‍ണം, 2012 ലണ്ടനില്‍ ഗഗന്‍ നാരംഗിന് വെങ്കലം, വിജയ് കുമാറിന് വെള്ളി എന്നിങ്ങനെയാണ് ഇന്ത്യന്‍ താരങ്ങള്‍ നേടിയത്.
22കാരിയായ മനു ഭാക്കര്‍ ഹരിയാനയിലെ ഝജ്ജര്‍ സ്വദേശിയാണ്. 221.7 സ്‌കോറോടെയാണ് വെങ്കലം നേടിയത്.
കൊറിയയുടെ കിം യെജി 241.3 സ്‌കോറുമായി വെള്ളിയും 243.2 എന്ന ഗെയിംസ് റെക്കോര്‍ഡോടെ കൊറിയയില്‍ നിന്നുതന്നെയുള്ള ജിന്‍ യെ ഓ സ്വര്‍ണവും നേടി.