ജെഫ്രീസിനെ സ്പീക്കർ സ്ഥാനത്തേക്ക് നാമനിർദ്ദേശം ചെയ്ത് ഡെമോക്രാറ്റുകൾ; പദവിയിലെത്തുന്നത് കറുത്ത വർ​​​​ഗ്​ഗക്കാരനെന്ന ചരിത്രപരമായ നീക്കം

ജെഫ്രീസിനെ സ്പീക്കർ സ്ഥാനത്തേക്ക് നാമനിർദ്ദേശം ചെയ്ത് ഡെമോക്രാറ്റുകൾ; പദവിയിലെത്തുന്നത് കറുത്ത വർ​​​​ഗ്​ഗക്കാരനെന്ന ചരിത്രപരമായ നീക്കം


ന്യൂയോർക്കിൽ നിന്നുള്ള ജനപ്രതിനിധി ഹക്കീം ജെഫ്രീസിനെ സ്പീക്കർ സ്ഥാനത്തേക്ക് ഹൗസ് ഡെമോക്രാറ്റുകൾ ബുധനാഴ്ച നാമനിർദ്ദേശം ചെയ്തു. പാർട്ടിയിലെ ഇടതുപക്ഷ വിഭാഗത്തിൽ നിന്നുള്ള എതിർപ്പുകളെ മറികടന്നുകൊണ്ട്, വൻ ഭൂരിപക്ഷത്തോടെയാണ് അദ്ദേഹത്തെ തിരഞ്ഞെടുത്തത്. ഈ സ്ഥാനത്തേക്ക് എത്തുന്ന ആദ്യത്തെ കറുത്ത വർഗക്കാരനായ നിയമനിർമ്മാതാവാകാൻ ജെഫ്രീസിന് ഇതിലൂടെ വഴിയൊരുങ്ങി. 2027 ജനുവരിയിൽ നടക്കുന്ന സഭയിലെ വോട്ടെടുപ്പിൽ വിജയിക്കുന്നതോടെ, അമേരിക്കൻ ചരിത്രത്തിൽ ഈ പദവിയിലെത്തുന്ന ആദ്യ കറുത്തവർഗ്ഗക്കാരൻ എന്ന ചരിത്രനേട്ടം 56-കാരനായ ജെഫ്രീസ് സ്വന്തമാക്കും.

രഹസ്യ ബാലറ്റിലൂടെയായിരുന്നു തിരഞ്ഞെടുപ്പ് നടത്തിയത്. 2022 മുതൽ ഹൗസ് ഡെമോക്രാറ്റുകളെ നയിക്കുന്ന 56-കാരനായ ജെഫ്രീസിന്റെ നേതൃത്വത്തിൽ, ഇടക്കാല തിരഞ്ഞെടുപ്പിൽ പാർട്ടി ചരിത്രപരമായ വലിയ വിജയം നേടിയിരുന്നു. ഇതിന് രണ്ടാഴ്ചയ്ക്ക് ശേഷമാണ് ഈ തിരഞ്ഞെടുപ്പ് നടന്നത്.

രഹസ്യ സ്വഭാവമുള്ള ഈ യോഗത്തിൽ പങ്കെടുത്ത ഒരാൾ നൽകിയ വിവരമനുസരിച്ച്, 251 വോട്ടുകൾ ജെഫ്രീസിന് അനുകൂലമായും 11 വോട്ടുകൾ എതിരായും ലഭിച്ചു. രണ്ട് ഡെമോക്രാറ്റുകൾ വോട്ടെടുപ്പിൽ നിന്ന് വിട്ടുനിന്നു. (വിവരങ്ങൾ വെളിപ്പെടുത്തിയ വ്യക്തി പേര് വെളിപ്പെടുത്താൻ ആഗ്രഹിച്ചില്ല). ആശയപരമായി വൈവിധ്യമാർന്നതും വലുതുമായ ഈ പാർട്ടി ഗ്രൂപ്പിൽ ജെഫ്രീസിന് എത്രത്തോളം ശക്തമായ പിന്തുണയുണ്ടെന്ന് ഈ വോട്ടെടുപ്പ് ഫലം വ്യക്തമാക്കുന്നു.  പാർട്ടിയിലെ തീവ്ര ഇടതുപക്ഷ-പുരോഗമന വിഭാഗത്തിൽ നിന്നുള്ള ഏതാനും പുതുമുഖ അംഗങ്ങൾ ജെഫ്രീസിനെതിരെ വോട്ട് ചെയ്തു. 'മെഡികെയർ ഫോർ ഓൾ', ഇസ്രായേലിനുള്ള ആയുധ വിൽപന നിരോധിക്കൽ തുടങ്ങിയ ആവശ്യങ്ങളിൽ ഉറപ്പ് ലഭിക്കാത്തതിനാലാണ് എതിർത്ത് വോട്ട് ചെയ്തതെന്ന് ഇവർ സംയുക്ത പ്രസ്താവനയിൽ വ്യക്തമാക്കി.

നാമനിർദ്ദേശം സ്വീകരിച്ചുകൊണ്ട് അദ്ദേഹം, പൗരാവകാശ പോരാളിയും ജോർജിയയിൽ നിന്നുള്ള ദീർഘകാല ജനപ്രതിനിധിയുമായിരുന്ന ജോൺ ലൂയിസിനെ അനുസ്മരിച്ചു. അനീതിക്കെതിരെ പോരാടുന്നതിനായി "നല്ല കുഴപ്പങ്ങളിൽ" (good trouble) ഏർപ്പെടാൻ ജനങ്ങളെ നിരന്തരം ആഹ്വാനം ചെയ്തിരുന്ന വ്യക്തിയായിരുന്നു ജോൺ ലൂയിസ്.

 ഈ മാസം നടന്ന ഇടക്കാല തിരഞ്ഞെടുപ്പിൽ ഡെമോക്രാറ്റിക് പാർട്ടിക്ക് 35 വർഷത്തിനിടയിലെ ഏറ്റവും വലിയ ഭൂരിപക്ഷം നേടിക്കൊടുക്കുന്നതിൽ ജെഫ്രീസ് നിർണ്ണായക പങ്കുവഹിച്ചിരുന്നു. നിലവിലെ കണക്കുകൾ പ്രകാരം സഭയിൽ ഡെമോക്രാറ്റുകൾക്ക് 257-ലധികം സീറ്റുകൾ ലഭിക്കുമെന്ന് ബിബിസി റിപ്പോർട്ട് ചെയ്യുന്നു. ജെഫ്രീസിനൊപ്പം മറ്റ് പ്രധാന പദവികളിലും ചരിത്രപരമായ മാറ്റങ്ങളാണ് ഡെമോക്രാറ്റുകൾ കൊണ്ടുവരുന്നത്. ഭൂരിപക്ഷ നേതാവായി തിരഞ്ഞെടുക്കപ്പെടുന്ന ആദ്യ വനിതയായി കാതറിൻ ക്ലാർക്കും , ആദ്യ ലാറ്റിനോ വിഭാഗക്കാരനായ മെജോറിറ്റി വിപ്പായി പീറ്റ് അഗ്വിലറും ചുമതലയേൽക്കും