വാഷിംഗ്ടണ്‍: പാഴ്‌ചെലവുകളിലൂടെ ഫെഡറല്‍ ഫണ്ട് വലിയതോതില്‍ ചോരുന്നുണ്ടെന്ന വാദമുയര്‍ത്തി രണ്ടാം ട്രംപ് ഭരണകൂടം ശതകോടീശ്വരന്‍ എലോണ്‍ മസ്‌കിന്റെ നേതൃത്വത്തില്‍ ആരംഭിച്ച ഗവണ്‍മെന്റ് എഫിഷ്യന്‍സി ഡിപ്പാര്‍ട്ട്‌മെന്റ് (ഡോഗ്) തങ്ങളുടെ പരിഹാര പ്രവര്‍ത്തനത്തിലൂടെ യുഎസ് സര്‍ക്കാരിന് 160 ബില്യണ്‍ ഡോളര്‍ ലാഭമുണ്ടാക്കിയെന്ന് അവകാശപ്പെടുന്നു. പാഴ്‌ചെലവുകള്‍ വെട്ടിക്കുറച്ചതിലൂടെയാണ് ഈ നേട്ടമെന്നും അവര്‍ പറയുന്നു.
അതേസമയം നോണ്‍പാര്‍ട്ടിസന്‍ പാര്‍ട്ണര്‍ഷിപ്പ് ഫോര്‍ പബ്ലിക് സര്‍വീസ് (പിപിഎസ്) യുടെ പുതിയ റിപ്പോര്‍ട്ട് സൂചിപ്പിക്കുന്നതു പ്രകാരം ഈ ശ്രമങ്ങള്‍ നടപ്പു സാമ്പത്തിക വര്‍ഷം നികുതിദായകര്‍ക്ക് വേണ്ടി 135 ബില്യണ്‍ ഡോളര്‍ അധികമായി ചെലവഴിക്കേണ്ടിവന്നുവെന്ന് സി ബി എസ് റിപ്പോര്‍ട്ട് ചെയ്തു.
പിപിഎസിന്റെ കണക്കനുസരിച്ച്, ഫെഡറല്‍ ജീവനക്കാര്‍ക്ക് ശമ്പളത്തോടുകൂടിയ അവധി, തെറ്റായി പിരിച്ചുവിട്ട ആയിരക്കണക്കിന് തൊഴിലാളികളെ വീണ്ടും നിയമിക്കല്‍, പുതിയ റിപ്പോര്‍ട്ടിംഗ് ആവശ്യകതകള്‍ കാരണം ഉല്‍പ്പാദനക്ഷമത കുറയല്‍ എന്നിവയുള്‍പ്പെടെ ഡോജിന്റെ നയങ്ങളുടെ നിരവധി അപ്രതീക്ഷിത പ്രത്യാഘാതങ്ങളില്‍ നിന്നാണ് കണക്കാക്കിയ ചെലവ് ഉണ്ടായിട്ടുള്ളത്.
ഈ പ്രവചനങ്ങള്‍ 270 ബില്യണ്‍ ഡോളര്‍ വാര്‍ഷിക ഫെഡറല്‍ വര്‍ക്ക്‌ഫോഴ്‌സ് നഷ്ടപരിഹാര ബില്ലിനെ അടിസ്ഥാനമാക്കിയുള്ളതാണ്. ശ്രദ്ധേയമായി, 135 ബില്യണ്‍ ഡോളറിന്റെ കണക്കില്‍ പരിഷ്‌കാരങ്ങളെ ചോദ്യം ചെയ്തുവന്ന നിയമപോരാട്ടങ്ങള്‍ അല്ലെങ്കില്‍ ഐആര്‍എസ് നികുതി പിരിവുകള്‍ കുറയ്ക്കല്‍ തുടങ്ങിയ മറ്റ് ചെലവുകള്‍ ഉള്‍പ്പെടുന്നില്ല.
ഡോജിന്റെ കൂടുതല്‍ വിവാദപരമായ സംരംഭങ്ങളിലൊന്ന് ജീവനക്കാര്‍ക്ക് സെപ്റ്റംബര്‍ വരെ ജോലിക്ക് റിപ്പോര്‍ട്ട് ചെയ്യാതെ തന്നെ മുഴുവന്‍ ശമ്പളവും സ്വീകരിക്കാന്‍ അനുവദിച്ച 'രാജിവയ്ക്കല്‍ ' പദ്ധതി മാറ്റിവച്ചതുമായി ബന്ധപ്പെട്ടായിരുന്നു. കൂടാതെ, മുമ്പ് പിരിച്ചുവിട്ട യുഎസ്ഡിഎ പക്ഷിപ്പനി വിദഗ്ധരെപ്പോലുള്ള 24,000 നിര്‍ണായക ജീവനക്കാരെ ഉള്‍പ്പെടെ കോടതി ഉത്തരവുകളെ തുടര്‍ന്ന് പുനഃസ്ഥാപിക്കേണ്ടിവന്നതും ബാധ്യത വര്‍ധിപ്പിച്ചു.
ജീവനക്കാര്‍ പ്രതിവാര നേട്ട റിപ്പോര്‍ട്ടുകള്‍ സമര്‍പ്പിക്കണം എന്നതുപോലുള്ള ബുദ്ധിമുട്ടുണ്ടാക്കുന്ന പുതിയ ആവശ്യകതകള്‍ കാരണം അവരുടെ മനോവീര്യവും ഉല്‍പ്പാദനക്ഷമതയും കുറഞ്ഞുവെന്ന് പിപിഎസ് പ്രസിഡന്റ് മാക്‌സ് സ്റ്റിയര്‍ അഭിപ്രായപ്പെട്ടു.
അതേസമയം, പിപിഎസ് വിശകലനം തള്ളി വൈറ്റ് ഹൗസ് വക്താവ് ഹാരിസണ്‍ ഫീല്‍ഡ്‌സ് രംഗത്തുവന്നു. വിശകലനം തെറ്റിദ്ധരിപ്പിക്കുന്നതാണെന്നും ഡോജിന്റെ നേട്ടങ്ങളെ ഇടിച്ചുകാണിക്കുന്നതാണെന്നും ഹാരിസണ്‍ ഫീല്‍ഡ്‌സ് പറഞ്ഞു.
എന്നാല്‍, ഐആര്‍എസില്‍ ഡോജിന്റെ ജീവനക്കാരെ വെട്ടിക്കുറയ്ക്കുന്നത് മാത്രം അടുത്ത ദശകത്തില്‍ 323 ബില്യണ്‍ ഡോളര്‍ നികുതി വരുമാന നഷ്ടത്തിലേക്ക് നയിച്ചേക്കാം എന്നാണ് യേലിന്റെ ബജറ്റ് ലാബില്‍ നിന്നുള്ള കണക്കുകള്‍ സൂചിപ്പിക്കുന്നത്.
ഡോജ് 38 ബില്യണ്‍ ഡോളര്‍ നേരിട്ടുള്ള ലാഭം ഉണ്ടാക്കിയേക്കാമെങ്കിലും ആ നേട്ടങ്ങള്‍ വിശാലമായ സാമ്പത്തിക പ്രത്യാഘാതങ്ങളാല്‍ നികത്തപ്പെടുമെന്നാണ് വിദഗ്ദ്ധര്‍ പറയുന്നത്. ഉദാഹരണത്തിന്:
ആരോഗ്യ ഗവേഷണ ഫണ്ടിംഗില്‍ വാര്‍ഷിക 16 ബില്യണ്‍ ഡോളര്‍ നഷ്ടവും ബാധിത മേഖലകളില്‍ 68,000 സാധ്യതയുള്ള തൊഴില്‍ നഷ്ടങ്ങളും സംഭവിക്കാം.
ടെസ്‌ലയുടെ ലാഭത്തില്‍ 71% ഇടിവുണ്ടായതിനെത്തുടര്‍ന്ന് ഡോജിലെ തന്റെ ഇടപെടല്‍ കുറയ്ക്കാനുള്ള പദ്ധതികള്‍ ഈ ആഴ്ച ആദ്യം മസ്‌ക് പ്രഖ്യാപിച്ചു. കഴിഞ്ഞ പാദത്തില്‍ വാഹന വില്‍പ്പനയില്‍ 20% ഇടിവ് സംഭവിച്ചതായും ഇ.വി നിര്‍മ്മാതാവ് പ്രഖ്യാപിച്ചു. ഈ നഷ്ടം മസ്‌കിന്റെ രാഷ്ട്രീയ ഇടപെടലിനോടുള്ള പൊതുജനങ്ങളുടെ എതിര്‍പ്പിന്റെ ഭാഗമായി സംഭവിച്ചാതണെന്ന് ആരോപിക്കപ്പെടുന്നു.
'അടുത്ത മാസം മുതല്‍, ഡോജിലേക്കുള്ള എന്റെ സമയ വിഹിതം ആഴ്ചയില്‍ ഒന്നോ രണ്ടോ ദിവസമായി ഗണ്യമായി കുറയും. പ്രസിഡന്റ് ട്രംപ് ആഗ്രഹിക്കുന്നിടത്തോളം കാലം സര്‍ക്കാര്‍ കാര്യങ്ങളില്‍ ഒന്നോ രണ്ടോ ദിവസം ചെലവഴിക്കുന്നത് തുടരുമെന്നും മസ്‌ക് പറഞ്ഞു.
മസ്‌കിന്റെ ഡോജ് 160 ബില്യണ്‍ ഡോളര്‍ ലാഭിച്ചുവെന്ന് അവകാശവാദം; പക്ഷേ 135 ബില്യണ്‍ ഡോളര്‍ വേറെ ചെലവാക്കേണ്ടിവന്നുവെന്ന് പിപിഎസ്
