വാഷിംഗ്ടണ്: പണപ്പെരുപ്പം വീണ്ടും ശക്തമാകുന്നതിനിടെ മൂന്ന് വര്ഷത്തിനിടെ ആദ്യമായി അടിസ്ഥാന പലിശനിരക്ക് ഉയര്ത്തി യു എസ് ഫെഡറല് റിസര്വ്. ബുധനാഴ്ച നടന്ന യോഗത്തിലാണ് നിരക്ക് 0.25 ശതമാനം ഉയര്ത്തിയത്. ഇതോടെ ഫെഡിന്റെ പ്രധാന പലിശനിരക്ക് 3.75 മുതല് 4 ശതമാനം വരെയായി.
2023ന് ശേഷം ഇതാദ്യമായാണ് ഫെഡറല് ഓപ്പണ് മാര്ക്കറ്റ് കമ്മിറ്റി (എഫ് ഒ എം സി) ഹ്രസ്വകാല പലിശനിരക്കിന്റെ ലക്ഷ്യപരിധി ഉയര്ത്തുന്നത്. ലോകത്തെ ഏറ്റവും കുറഞ്ഞ പലിശനിരക്കാണ് അമേരിക്കയ്ക്ക് വേണ്ടതെന്ന് പ്രസിഡന്റ് ഡൊണാള്ഡ് ട്രംപ് പറഞ്ഞതിന് ദിവസങ്ങള്ക്കകമാണ് ഫെഡിന്റെ തീരുമാനമെന്നത് ശ്രദ്ധേയമാണ്.
പലിശനിരക്ക് ഉയര്ത്താനുള്ള തീരുമാനത്തെ എഫ് ഒ എം സിയിലെ വോട്ടവകാശമുള്ള 12 അംഗങ്ങളും ഏകകണ്ഠമായി പിന്തുണച്ചു. ഈ വര്ഷം അവസാനിക്കുന്നതിന് മുമ്പ് ഒരിക്കല് കൂടി പലിശനിരക്ക് ഉയര്ത്തിയേക്കുമെന്ന സൂചനയും ഫെഡ് നല്കി.
ഭൗമരാഷ്ട്രീയ സാഹചര്യങ്ങളിലെ മാറ്റങ്ങള് ഉള്പ്പെടെയുള്ള കാരണങ്ങളാല് അനിശ്ചിതത്വം ഉയര്ന്ന നിലയില് തുടരുകയാണെന്ന് ഫെഡറല് റിസര്വ് പ്രസ്താവനയില് പറഞ്ഞു. പണപ്പെരുപ്പം 2 ശതമാനം എന്ന ലക്ഷ്യത്തിലേക്ക് കൂടുതല് വേഗത്തില് തിരിച്ചെത്താന് ഇന്നത്തെ നയതീരുമാനം സഹായിക്കുമെന്നും അധികൃതര് വ്യക്തമാക്കി.
എണ്ണവില വര്ധനയും പണപ്പെരുപ്പവും
ഈ വര്ഷം എണ്ണവിലയില് 75 ശതമാനത്തിലധികം വര്ധനയുണ്ടായതും ഇന്ധനവില കുതിച്ചുയരാന് കാരണമായി. ഇറാന് യുദ്ധം ആരംഭിച്ചതിന് ശേഷം അമേരിക്കയിലെ ഗ്യാസോലിന് വിലയില് 45 ശതമാനത്തിലധികം വര്ധനയുണ്ടായതായാണ് റിപ്പോര്ട്ട്.
ഇന്ധനവില വര്ധിച്ചതോടെ ഓഗസ്റ്റിലെ യു എസ് പണപ്പെരുപ്പ നിരക്ക് 3.4 ശതമാനമായി ഉയര്ന്നു. ഇതേസമയം ശരാശരി വേതനവളര്ച്ച 3.1 ശതമാനമായിരുന്നു.
ഈ ആഴ്ച പുറത്തുവന്ന കണക്കുകള് പ്രകാരം എഫ് ഒ എം സി അംഗങ്ങളില് രണ്ടുപേരൊഴികെ എല്ലാവരും ഈ വര്ഷം അവസാനം വീണ്ടും പലിശനിരക്ക് ഉയര്ത്തുമെന്നാണ് പ്രവചിക്കുന്നത്.
ട്രംപിന്റെ സമ്മര്ദത്തിനിടെ നിരക്ക് വര്ധന
കുറഞ്ഞ പലിശനിരക്ക് വേണമെന്ന പ്രസിഡന്റ് ഡൊണാള്ഡ് ട്രംപിന്റെ ആവശ്യം നിലനില്ക്കെയാണ് ഫെഡിന്റെ പുതിയ തീരുമാനം. ഫെഡറല് റിസര്വ് ചെയര്മാന് കെവിന് വാര്ഷിനെ ഫെബ്രുവരിയില് നാമനിര്ദേശം ചെയ്തപ്പോള്, പലിശനിരക്ക് കുറയ്ക്കാന് താത്പര്യമില്ലായിരുന്നെങ്കില് വാര്ഷിന് നാമനിര്ദേശം ലഭിക്കുമായിരുന്നില്ലെന്ന് ട്രംപ് പറഞ്ഞിരുന്നു.
എന്നാല് ഇറാനുമായുള്ള യുദ്ധത്തിന്റെ പശ്ചാത്തലത്തില് സാമ്പത്തിക സാഹചര്യങ്ങള് മാറിയതോടെ സ്ഥിതിഗതികള് വ്യത്യസ്തമായി. ചുമതലയേറ്റ് നാല് മാസം തികയുന്നതിന് മുമ്പുതന്നെ പലിശനിരക്ക് ഉയര്ത്തുന്ന ഫെഡറലിന് നേതൃത്വം നല്കേണ്ട സാഹചര്യമാണിപ്പോള് വാര്ഷിനുണ്ടായത്.
പണപ്പെരുപ്പം നിയന്ത്രിക്കുന്നതിനാണ് ഫെഡറല് റിസര്വ് സാധാരണയായി പലിശനിരക്ക് ഉയര്ത്തുന്നത്. പലിശ ഉയരുന്നതോടെ വായ്പയെടുക്കുന്നതിനുള്ള ചെലവ് വര്ധിക്കുകയും ആവശ്യകത കുറയുകയും അതുവഴി വിലക്കയറ്റം നിയന്ത്രിക്കപ്പെടുകയും ചെയ്യുമെന്നാണ് സാമ്പത്തിക നയം.
എന്നാല് താരിഫുകള്, യുദ്ധങ്ങള്, നിര്മിത ബുദ്ധി മേഖലയിലെ വന് നിക്ഷേപം തുടങ്ങിയ പണപ്പെരുപ്പത്തെ സ്വാധീനിക്കുന്ന എല്ലാ ഘടകങ്ങളിലും ഫെഡറല് റിസര്വിന് നേരിട്ട് നിയന്ത്രണമില്ല.
'പണപ്പെരുപ്പം ഉയര്ന്ന നിലയില് തുടരുകയാണ്. ഇന്നത്തെ നയതീരുമാനം കമ്മിറ്റിയുടെ 2 ശതമാനം ലക്ഷ്യത്തിലേക്ക് കൂടുതല് സമയോചിതമായി തിരിച്ചെത്താന് സഹായിക്കും. വിലസ്ഥിരത ഉറപ്പാക്കാന് കമ്മിറ്റി നടപടികള് തുടരും' എന്ന് തീരുമാനത്തോടനുബന്ധിച്ച് പുറത്തിറക്കിയ പ്രസ്താവനയില് ഫെഡ് അധികൃതര് വ്യക്തമാക്കി.