ഡെട്രോയിറ്റ്: അമേരിക്കന്‍ മുന്‍ പ്രസിഡന്റ് ബറാക് ഒബാമ മിഷിഗണ്‍ ഡെമോക്രാറ്റിക് സെനറ്റ് സ്ഥാനാര്‍ഥി അബ്ദുല്‍ എല്‍-സയീദിനായി പ്രചാരണത്തിനിറങ്ങുമെന്ന് പ്രഖ്യാപിച്ചതിന് പിന്നാലെ, ഒബാമയുടെ ഭരണകാലത്തെ വിമര്‍ശിച്ച് എല്‍-സയീദ് മുമ്പ് നടത്തിയ പരാമര്‍ശങ്ങള്‍ വീണ്ടും ചര്‍ച്ചയാകുന്നു.
ഒക്ടോബര്‍ 24ന് ഡെട്രോയിറ്റില്‍ എല്‍-സയീദിനൊപ്പം ഒബാമ പ്രചാരണ പരിപാടിയില്‍ പങ്കെടുക്കും. മുന്‍ വൈസ് പ്രസിഡന്റ് കമല ഹാരിസും കഴിഞ്ഞ മാസം എല്‍-സയീദിനായി പ്രചാരണത്തില്‍ പങ്കെടുത്തിരുന്നു.
2012 മുതല്‍ 2020 വരെയുള്ള കാലയളവില്‍ ഒബാമയുടെ ഭരണത്തെ എല്‍-സയീദ് പലതവണ വിമര്‍ശിച്ചിരുന്നു. ഒബാമയുടെ ഭരണകാലം രാജ്യത്തിന് കാര്യമായ പുരോഗതി കൊണ്ടുവന്നില്ലെന്നും അദ്ദേഹം അഭിപ്രായപ്പെട്ടിരുന്നു. യുദ്ധം തുടരുന്നതിന് ഒബാമയെ കുറ്റപ്പെടുത്തിയ എല്‍-സയീദ്, ഒബാമയുടെ അഫോര്‍ഡബിള്‍ കെയര്‍ ആക്ട് (ഒബാമകെയര്‍) പര്യാപ്തമല്ലെന്നും പറഞ്ഞിരുന്നു.
ഒബാമ സ്വീകരിച്ച ഘട്ടംഘട്ടമായ സമീപനമാണ് പിന്നീട് ഡൊണള്‍ഡ് ട്രംപിന്റെ രാഷ്ട്രീയ ഉയര്‍ച്ചയ്ക്ക് സാഹചര്യമൊരുക്കിയതെന്നും എല്‍-സയീദ് വാദിച്ചിരുന്നു.
മിഷിഗണ്‍ സെനറ്റ് തെരഞ്ഞെടുപ്പില്‍ റിപ്പബ്ലിക്കന്‍ സ്ഥാനാര്‍ഥി മൈക്ക് റോജേഴ്‌സിനെയാണ് എല്‍-സയീദ് നേരിടുന്നത്. സെനറ്റിലെ നിയന്ത്രണം ഏത് പാര്‍ട്ടിക്കെന്നതില്‍ നിര്‍ണായകമാകാവുന്ന മത്സരമായാണ് തെരഞ്ഞെടുപ്പിനെ വിലയിരുത്തുന്നത്.
2012-ല്‍ ഒബാമ വീണ്ടും പ്രസിഡന്റായി തെരഞ്ഞെടുക്കപ്പെട്ടതിന് പിന്നാലെ ഹഫ്‌പോസ്റ്റില്‍ എഴുതിയ ലേഖനത്തില്‍, താന്‍ ഒബാമയ്ക്ക് വോട്ട് ചെയ്തതായി എല്‍-സയീദ് വ്യക്തമാക്കിയിരുന്നു. എന്നാല്‍ 2008ലെ പ്രചാരണത്തിന്റെ മുഖ്യ സന്ദേശമായ 'പ്രതീക്ഷയും മാറ്റവും' അദ്ദേഹം നടപ്പാക്കിയില്ലെന്ന് എല്‍-സയീദ് വിമര്‍ശിച്ചു.
'ഈ നേതാവ് യുദ്ധം തുടരാന്‍ ഇടയാക്കി, പൗരസ്വാതന്ത്ര്യങ്ങള്‍ ലംഘിച്ചു, മുന്‍ പ്രസിഡന്റുമാരെക്കാള്‍ കൂടുതല്‍ ആളുകളെ രാജ്യത്തുനിന്ന് നാടുകടത്തി,' എന്നിങ്ങനെയായിരുന്നു അന്നത്തെ ലേഖനത്തിലെ എല്‍-സയീദിന്റെ വിമര്‍ശനം. രണ്ട് പ്രധാന സ്ഥാനാര്‍ഥികളില്‍ താരതമ്യേന കുറവ് ദോഷമുള്ളയാളെ തെരഞ്ഞെടുക്കുക എന്ന നിലയിലാണ് താന്‍ ഒബാമയ്ക്ക് വോട്ട് ചെയ്തതെന്നും അദ്ദേഹം അഭിപ്രായപ്പെട്ടിരുന്നു.
ഒബാമയുടെ പല തീരുമാനങ്ങളോടും തനിക്ക് വിയോജിപ്പുണ്ടായിരുന്നുവെന്നും അദ്ദേഹത്തിന്റെ ഭരണത്തിന് ശേഷം രാജ്യം 'മെച്ചപ്പെട്ട നിലയിലായിട്ടില്ല' എന്നായിരുന്നു തന്റെ വിലയിരുത്തലെന്നും എല്‍-സയീദ് പിന്നീട് നീക്കം ചെയ്ത ഒരു ട്വീറ്റില്‍ പറഞ്ഞിരുന്നു. അതേസമയം, ഒബാമയെ കഴിവുള്ളവനും വ്യക്തമായ നിലപാടുള്ളവനും അമേരിക്കക്കാരോട് പ്രതിബദ്ധതയുള്ള നേതാവുമായി താന്‍ ഇപ്പോഴും കാണുന്നുവെന്നും അദ്ദേഹം വ്യക്തമാക്കിയിരുന്നു.
2020ല്‍ മിഷിഗണ്‍ ഗവര്‍ണര്‍ സ്ഥാനത്തേക്ക് മത്സരിച്ചിരുന്ന സമയത്തും എല്‍-സയീദ് ഒബാമയില്‍ നിന്ന് തന്റെ രാഷ്ട്രീയ നിലപാടുകള്‍ വ്യത്യസ്തമാണെന്ന് വ്യക്തമാക്കിയിരുന്നു.
2017ല്‍ വോക്‌സിന് നല്‍കിയ അഭിമുഖത്തില്‍ തന്നെ 'അടുത്ത ഒബാമ' എന്ന് വിശേഷിപ്പിക്കരുതെന്ന് എല്‍-സയീദ് ആവശ്യപ്പെട്ടിരുന്നു. ആഭ്യന്തര- വിദേശ നയങ്ങളില്‍ ഒബാമയുമായി തനിക്ക് നിരവധി കാര്യങ്ങളില്‍ വിയോജിപ്പുണ്ടെന്ന് അദ്ദേഹം പറഞ്ഞു.
ഒബാമയുടെ രാഷ്ട്രീയ നിലപാടുകളെ താരതമ്യേന മിതവാദപരവും മധ്യനിരയിലുള്ളതുമായ ഡെമോക്രാറ്റിക് നയങ്ങള്‍ എന്നാണ് അന്ന് എല്‍-സയീദ് വിശേഷിപ്പിച്ചത്.