വാഷിംഗ്ടണ്: യു കെയുടെ കുടിയേറ്റ നയങ്ങളെ യു എസ് പ്രസിഡന്റ് ഡൊണാള്ഡ് ട്രംപ് സ്കൈ ന്യൂസിന് നല്കിയ അഭിമുഖത്തില് നിശിതമായി വിമര്ശിച്ചു. യു കെ നയങ്ങളെയും കുടിയേറ്റക്കാരേയും 'ഭ്രാന്തന്' എന്ന് വിളിക്കുകയും ബ്രിട്ടനെ നിയമവിരുദ്ധ കുടിയേറ്റക്കാര് 'ആക്രമിക്കുന്നു' എന്ന് അവകാശപ്പെടുകയും ചെയ്തു.
യു കെയുടെ സമീപനത്തെക്കുറിച്ച് തന്നോട് പതിവായി ചോദിക്കാറുണ്ടെന്നും കുടിയേറ്റക്കാര് ഭ്രാന്തന്മാരാണെന്നാണ് താന് കരുതുന്നതെന്നും ജയിലുകളില് നിന്നുള്ളവര്, മയക്കുമരുന്ന് വ്യാപാരികള്, മാനസിക സ്ഥാപനങ്ങളില് നിന്നുള്ളവര് എന്നിവരുള്പ്പെടെ ലോകമെമ്പാടുമുള്ള അനധികൃത കുടിയേറ്റക്കാര് അവരുടെ രാജ്യത്തെ ആക്രമിക്കുകയാണെന്നും അദ്ദേഹം പറഞ്ഞു.
ഇക്കാര്യം ചോദ്യം ചെയ്തപ്പോള് ട്രംപ് തന്റെ പ്രസ്താവനയില് ഉറച്ചുനിന്നു. സ്വന്തം ഭരണകൂടത്തിന്റെ കുടിയേറ്റ നയങ്ങള് ഫലപ്രദമായിരുന്നുവെന്ന് അദ്ദേഹം ഉറപ്പിച്ചു പറഞ്ഞു. തങ്ങള് തങ്ങളുടെ അതിര്ത്തി അടച്ചതിനാല് ആരും വരുന്നില്ലെന്നും മോശം ആളുകളെ ഒഴിവാക്കുകയാണെന്നും ട്രംപ് പറഞ്ഞു.