വാഷിംഗ്ടണ്‍: വധശിക്ഷയ്ക്ക് വിധിക്കപ്പെട്ട് ജയിലില്‍ കഴിയുന്ന 37 പേരുടെ ശിക്ഷ ജീവപര്യന്തമായി ഇളവ് വരുത്തിയ പ്രസിഡന്റ് ജോ ബൈഡനെതിരെ വിമര്‍ശനവുമായി നിയുക്ത പ്രസിഡന്റ് ഡോണള്‍ഡ് ട്രംപ്.
താന്‍ വൈറ്റ് ഹൗസിലെത്തിയാലുടന്‍ 'വധശിക്ഷ ശക്തമായി പിന്തുടരാന്‍' നീതിന്യായ വകുപ്പിന് നിര്‍ദ്ദേശം നല്‍കുമെന്ന് നിയുക്ത പ്രസിഡന്റ് ഡോണള്‍ഡ് ട്രംപ് ചൊവ്വാഴ്ച പറഞ്ഞു.
'ഉദ്ഘാടനം ചെയ്താലുടന്‍, അക്രമാസക്തരായ ബലാത്സംഗികളില്‍ നിന്നും കൊലപാതകികളില്‍ നിന്നും രാക്ഷസന്മാരില്‍ നിന്നും അമേരിക്കന്‍ കുടുംബങ്ങളെയും കുട്ടികളെയും സംരക്ഷിക്കുന്നതിനായി വധശിക്ഷ ശക്തമായി നടപ്പാക്കാന്‍ ഞാന്‍ നീതിന്യായ വകുപ്പിന് നിര്‍ദ്ദേശം നല്‍കും. നമ്മള്‍ വീണ്ടും ക്രമസമാധാനത്തിന്റെ രാജ്യമാകും! '. ട്രൂത്ത് സോഷ്യലില്‍ ട്രംപ് എഴുതി.
എന്നാല്‍ ഫെഡറല്‍ വധശിക്ഷയ്ക്ക് വിധിക്കപ്പെട്ട മിക്ക തടവുകാരെയും ബൈഡന് ഒഴിവാക്കിയതിനാല്‍ ട്രൂത്ത് സോഷ്യലില്‍ ട്രംപ് പറഞ്ഞതില്‍ അര്‍ത്ഥമില്ല. ജനുവരിയില്‍ ട്രംപ് അധികാരമേല്‍ക്കുമ്പോള്‍ ഫെഡറല്‍ ജയിലില്‍ വധശിക്ഷ നേരിടുന്ന മൂന്ന് വ്യക്തികള്‍ മാത്രമേ ഉണ്ടാകൂ.
ഈ മൂന്ന് പേരും കൂട്ട വെടിവയ്‌പ്പോ തീവ്രവാദ ആക്രമണങ്ങളോ നടത്തിയ വ്യക്തികളാണ്. 2018 ല്‍ പിറ്റ്‌സ്ബര്‍ഗിലെ ട്രീ ഓഫ് ലൈഫ് സിനഗോഗില്‍ 11 പേരെ കൊലപ്പെടുത്തിയ റോബര്‍ട്ട് ബോവേഴ്‌സ്; 2015 ല്‍ സൗത്ത് കരോലിനയിലെ ചാള്‍സ്റ്റണിലെ ബ്ലാക്ക് ചര്‍ച്ചില്‍ ഒമ്പത് പേരെ കൊലപ്പെടുത്തിയ വെള്ളക്കാരനും ദേശീയവാദിയുമായ ഡൈലാന്‍ റൂഫ്; 2013 ലെ ബോസ്റ്റണ്‍ മാരത്തണ്‍ ബോംബാക്രമണത്തിന് ഉത്തരവാദികളായ രണ്ട് സഹോദരന്മാരില്‍ ഒരാളായ സോഖാര്‍ സര്‍നേവ് എന്നിവരാണ് അവശേഷിക്കുന്ന കുറ്റവാളികള്‍.
ട്രംപ് അധികാരമേല്‍ക്കുമ്പോള്‍ ബൈഡന്റെ മാപ്പ് പിന്‍വലിക്കാന്‍ കഴിയില്ലെങ്കിലും ഭാവിയിലെ കേസുകളില്‍ നിയുക്തപ്രസിഡന്റിന് വധശിക്ഷ ആവശ്യപ്പെട്ട് നീതിന്യായ വകുപ്പിന് നിര്‍ദ്ദേശം നല്‍കാം.
തന്റെ പ്രചാരണത്തിലുടനീളം, വധശിക്ഷ കൂടുതല്‍ ഉപയോഗപ്പെടുത്തുന്നതിനുള്ള ട്രംപിന്റെ വാദങ്ങള്‍ അക്രമാസക്തമായ കുറ്റകൃത്യങ്ങളും മയക്കുമരുന്നും മനുഷ്യക്കടത്തും കുറയ്ക്കുന്നതിനുള്ള അദ്ദേഹത്തിന്റെ കര്‍ക്കശമായ പ്രതിബദ്ധതയുടെ ഭാഗമായിരുന്നു. 2024 ലെ പ്രസിഡന്‍ഷ്യല്‍ പ്രചാരണത്തിന് തുടക്കം കുറിച്ചുകൊണ്ട് നടത്തിയ പ്രസംഗത്തില്‍ മയക്കുമരുന്ന് വ്യാപാരികള്‍ക്ക് വധശിക്ഷ നല്‍കുകയാണ് വേണ്ടതെന്ന് അദ്ദേഹം പറഞ്ഞു. 'നമ്മുടെ അതിര്‍ത്തി കടന്ന് കുട്ടികളെ കടത്തുന്ന ആര്‍ക്കും' വധശിക്ഷ ലഭിക്കണമെന്ന് ഒരു നിയമം പാസാക്കാന്‍ കോണ്‍ഗ്രസിനോട് ആവശ്യപ്പെടുമെന്ന് കഴിഞ്ഞ വര്‍ഷം അദ്ദേഹം പറഞ്ഞു.
ഒരു യുഎസ് പൗരനെയോ നിയമ നിര്‍വ്വഹണ ഉദ്യോഗസ്ഥനെയോ കൊല്ലുന്ന ഏതൊരു കുടിയേറ്റക്കാരനും വധശിക്ഷ നല്‍കുമെന്ന് 2024 ലെ പ്രചാരണത്തിന്റെ അവസാന ആഴ്ചകളില്‍, ട്രംപ് ആവര്‍ത്തിച്ച് പ്രതിജ്ഞയെടുത്തു.
വധശിക്ഷ ഇളവുചെയ്ത ബൈഡന്റെ നടപടിയെക്കുറിച്ച് സമ്മിശ്ര പ്രതികരണമാണ് ഉണ്ടായത്. ശിക്ഷ ഇളവ് ചെയ്തവരുടെ ചില കുടുംബങ്ങള്‍ ആശ്വാസം പ്രകടിപ്പിച്ചപ്പോള്‍ ഇരകളുടെ ചില കുടുംബങ്ങള്‍ രോഷാകുലരാണ്. 2005 ല്‍ ഡാരില്‍ ലോറന്‍സ് കൊലപ്പെടുത്തിയ ഒഹായോ പോലീസ് ഉദ്യോഗസ്ഥനായ ബ്രയാന്‍ ഹര്‍സ്റ്റിന്റെ വിധവ, തിങ്കളാഴ്ച ശിക്ഷ ലഘൂകരിച്ച, ബൈഡന്റെ തീരുമാനത്തില്‍ തന്റെ കുടുംബം നിരാശരാണെന്ന് സിഎന്‍എന്‍ അനുബന്ധ ഡബ്ല്യുബിഎന്‍എസിന് നല്‍കിയ പ്രസ്താവനയില്‍ പറഞ്ഞു.
ട്രംപിന്റെ ആദ്യ ഭരണകാലത്തിന് മുമ്പ് യുഎസ് ഗവണ്‍മെന്റിന്റെ വധശിക്ഷ അസാധാരണമായിരുന്നു. ട്രംപിന്റെ അന്നത്തെ അറ്റോര്‍ണി ജനറല്‍ വില്യം ബാര്‍ 2019 ല്‍ ഫെഡറല്‍ സര്‍ക്കാര്‍ വധശിക്ഷ പുനരാരംഭിക്കുമെന്ന് പ്രഖ്യാപിക്കുന്നതിന് മുമ്പ് 1988 മുതല്‍ മൂന്ന് ഫെഡറല്‍ വധശിക്ഷകള്‍ മാത്രമേ നടന്നിട്ടുള്ളൂ.
2020 ല്‍, ട്രംപിന്റെ ആദ്യ ടേമിന്റെ അവസാന വര്‍ഷത്തില്‍, ഫെഡറല്‍ സര്‍ക്കാര്‍ 10 പേരുടെ വധശിക്ഷ നടപ്പാക്കി. 1896 ന് ശേഷം ഫെഡറല്‍ സര്‍ക്കാര്‍ നടത്തിയ ഏറ്റവും കൂടുതല്‍ വധശിക്ഷകളും ആ വര്‍ഷമാണ് നടപ്പാക്കിയത്.
ഫെഡറല്‍ സംവിധാനത്തിന് പുറത്ത്, യുണൈറ്റഡ് സ്റ്റേറ്റ്‌സില്‍ 2,000-ത്തിലധികം ആളുകള്‍ സംസ്ഥാന കോടതികളില്‍ ശിക്ഷിക്കപ്പെടുകയും വധശിക്ഷയ്ക്ക് വിധിക്കപ്പെടുകയും ചെയ്തതായി ഡെത്ത് പെനാല്‍റ്റി ഇന്‍ഫര്‍മേഷന്‍ സെന്റര്‍ പറയുന്നു. ആ വധശിക്ഷ നിര്‍ത്തലാക്കാന്‍ ബൈഡന് അധികാരമില്ല.
അധികാരമേറ്റാലുടന്‍ വധശിക്ഷ തുടരാന്‍ ഉത്തരവ് നല്‍കുമെന്ന് ട്രംപ് ; 37 പേരുടെ വധശിക്ഷ ഇളവ്‌ചെയ്ത ബൈഡന് വിമര്‍ശനം
