VOTEലെ അക്ഷരങ്ങള്‍ മാറ്റിയാല്‍ VETO
വാഷിംഗ്ടണ്‍: ഇടക്കാല തെരഞ്ഞെടുപ്പില്‍ വന്‍ മുന്നേറ്റം നേടിയതോടെ നിയമനിര്‍മാണ രംഗത്ത് ഡെമോക്രാറ്റുകള്‍ക്കുണ്ടായത് ഗണ്യമായ ശക്തി. ഈ മുന്നേറ്റത്തിനിടയിലും പ്രസിഡന്റ് ഡൊണാള്‍ഡ് ട്രംപിന്റെ വീറ്റോ അധികാരം ഉയര്‍ത്തുന്ന ഭരണഘടനാപരമായ വെല്ലുവിളി മറികടക്കുകയെന്നതായിരിക്കും കോണ്‍ഗ്രസില്‍ ഡെമോക്രാറ്റുകള്‍ക്ക് നേരിടാനുണ്ടാവുന്ന പ്രധാനവും നിര്‍ണായകവുമായ വെല്ലുവിളി.
കോണ്‍ഗ്രസ് പാസാക്കുന്ന ഒരു ബില്‍ പ്രസിഡന്റിന് ലഭിച്ചാല്‍ ഞായറാഴ്ചകള്‍ ഒഴികെ 10 ദിവസത്തിനുള്ളില്‍ അതില്‍ ഒപ്പുവെക്കുകയോ വീറ്റോ ചെയ്യുകയോ ചെയ്യാം. പ്രസിഡന്റ് വീറ്റോ ചെയ്താല്‍ ബില്‍ നിയമമാകില്ല. എന്നാല്‍ കോണ്‍ഗ്രസിന്റെ ഇരുസഭകളിലും മൂന്നില്‍ രണ്ട് ഭൂരിപക്ഷത്തോടെ വീണ്ടും പാസാക്കാന്‍ കഴിഞ്ഞാല്‍ പ്രസിഡന്റിന്റെ വീറ്റോ മറികടക്കാനുമാകും. ഉയര്‍ന്ന ഭൂരിപക്ഷം ആവശ്യമായ ഈ നടപടി ട്രംപിന്റെ ആദ്യ ഭരണകാലത്ത് കോണ്‍ഗ്രസ് വിജയകരമായി നടപ്പാക്കിയിട്ടുണ്ട്.
ഇതിനേക്കാള്‍ ശക്തമായ മറ്റൊരു നടപടിയാണ് 'പോക്കറ്റ് വീറ്റോ'. ഒരു ബില്‍ ലഭിച്ചശേഷം 10 ദിവസത്തിനുള്ളില്‍ പ്രസിഡന്റ് അതില്‍ ഒപ്പുവെക്കാതിരിക്കുകയും ഈ കാലയളവില്‍ കോണ്‍ഗ്രസ് സമ്മേളനം അവസാനിപ്പിക്കുകയും ചെയ്താല്‍ ബില്‍ സ്വമേധയാ നിയമമാകാതെ പോകും. ഇത്തരം സാഹചര്യത്തില്‍ പ്രസിഡന്റിന്റെ നടപടി മറികടക്കാന്‍ കോണ്‍ഗ്രസിന് സാധിക്കില്ല.
കഴിഞ്ഞ ദിവസത്തെ തzരഞ്ഞെടുപ്പില്‍ ഡെമോക്രാറ്റുകള്‍ക്ക് വലിയ മുന്നേറ്റമുണ്ടാക്കാനായെങ്കിലും പുതിയ കോണ്‍ഗ്രസില്‍ ഇരുസഭകളിലും മൂന്നില്‍ രണ്ട് ഭൂരിപക്ഷം നേടാന്‍ അവര്‍ക്ക് കഴിയില്ലെന്നാണ് നിലവിലെ കണക്കുകൂട്ടല്‍. അതിനാല്‍ ട്രംപിന്റെ വീറ്റോ അധികാരം നിയമനിര്‍മാണ നടപടികളില്‍ നിര്‍ണായക സ്വാധീനം ചെലുത്തും.
അടുത്ത കോണ്‍ഗ്രസില്‍ തന്റെ വീറ്റോ അധികാരം പ്രയോഗിക്കുമെന്ന് ട്രംപ് നേരത്തെ വ്യക്തമാക്കിയിട്ടുണ്ട്. തzരഞ്ഞെടുപ്പില്‍ ഡെമോക്രാറ്റുകളുടെ മുന്നേറ്റം വ്യക്തമായതിനു പിന്നാലെ, 'വീറ്റോ' എന്ന് രേഖപ്പെടുത്തിയ ചുവന്ന ബേസ്‌ബോള്‍ തൊപ്പിയുടെ ചിത്രം അദ്ദേഹം തന്റെ സോഷ്യല്‍ മീഡിയ പ്ലാറ്റ്ഫോമായ ട്രൂത്ത് സോഷ്യലില്‍ പങ്കുവെച്ചിരുന്നു.
അതേസമയം, നിയമനിര്‍മാണത്തിനപ്പുറവും കോണ്‍ഗ്രസിന് പ്രസിഡന്റിനുമേല്‍ സമ്മര്‍ദം ചെലുത്താനുള്ള വിവിധ അധികാരങ്ങളുണ്ട്. പ്രസിഡന്റ് വീറ്റോ ചെയ്യുമെന്ന് ഉറപ്പുള്ളതും എന്നാല്‍ പൊതുജനപിന്തുണയുള്ളതുമായ ബില്ലുകള്‍ രാഷ്ട്രീയ സമ്മര്‍ദ്ദം സൃഷ്ടിക്കുന്നതിനായി കോണ്‍ഗ്രസിന് പാസാക്കി പ്രസിഡന്റിന് അയക്കാം. കൂടാതെ, ഭൂരിപക്ഷമുള്ള പാര്‍ട്ടിക്ക് ഭരണകൂടത്തിന്റെ പ്രവര്‍ത്തനങ്ങള്‍ നിരീക്ഷിക്കാനും വിവിധ വിഷയങ്ങളില്‍ വിശദീകരണം തേടാനും ഉള്‍പ്പെടെയുള്ള വിപുലമായ മേല്‍നോട്ട അധികാരങ്ങളും ലഭ്യമാണ്.
അതിനാല്‍, പ്രസിഡന്റിന്റെ വീറ്റോ അധികാരം നിയമനിര്‍മാണത്തിന് തടസ്സമാകാമെങ്കിലും കോണ്‍ഗ്രസിന്റെ രാഷ്ട്രീയവും ഭരണഘടനാപരവുമായ മറ്റു അധികാരങ്ങള്‍ ഡെമോക്രാറ്റുകള്‍ക്ക് പ്രയോജനപ്പെടുത്താനാകും.