വാഷിംഗ്ടൺ: ഇന്ത്യയുടെ റിപ്പബ്ലിക് ദിനത്തോടനുബന്ധിച്ച് അമേരിക്കൻ വിദേശകാര്യ സെക്രട്ടറി മാർക്കോ റൂബിയോ ഇന്ത്യയ്ക്ക് ആശംസകൾ നേർന്നു. ക്വാഡ് സഹകരണം ഉൾപ്പെടെ നിരവധി വിഷയങ്ങളെ കുറിച്ചാണ് അദ്ദേഹം പരാമർശിച്ചത്. പ്രതിരോധം, ഊർജം, നിർണായക ഖനിജങ്ങൾ, നവോത്ഥാന സാങ്കേതികവിദ്യകൾ എന്നിവയിൽ അടുത്ത സഹകരണത്തിലൂടെ ഇരുരാജ്യങ്ങൾക്കും ‘യഥാർത്ഥ ഫലങ്ങൾ കൈവരിക്കാനാകുമെന്ന് അദ്ദേഹം പറഞ്ഞു.
ന്യൂഡൽഹി ആഭ്യന്തര താത്പര്യങ്ങളിൽ വിട്ടുവീഴ്ച ചെയ്യില്ലെന്ന് അറിയിക്കുകയും, അമേരിക്ക ഫസ്റ്റ് എന്ന വലിയ ആശയത്തിന്റെ ചട്ടക്കൂടിനുള്ളിലായിരിക്കും കരാറെന്ന നിലപാട് വാഷിങ്ടൺ സ്വീകരിക്കുകയും ചെയ്യുന്ന സാഹചര്യത്തിൽ, ഇന്ത്യ– യു എസ് വ്യാപാര കരാർ അനിശ്ചിതത്വത്തിലായിരിക്കെയാണ് റൂബിയോയുടെ പ്രസ്താവന.
അമേരിക്കക്കും ഇന്ത്യക്കും ചരിത്രപരമായ ബന്ധമുണ്ടെന്നും പ്രതിരോധം, ഊർജം, നിർണായക ഖനിജങ്ങൾ, നവോത്ഥാന സാങ്കേതികവിദ്യകൾ എന്നിവയിലുളള അടുത്ത സഹകരണം മുതൽ ക്വാഡ് വഴിയുള്ള ബഹുതല പങ്കാളിത്തം വരെ, യു എസ്– ഇന്ത്യ ബന്ധം നമ്മുടെ രാജ്യങ്ങൾക്കും ഇൻഡോ-പസഫിക് മേഖലയ്ക്കും യഥാർത്ഥ ഫലങ്ങൾ നൽകുന്നുവെന്ന് തന്റെ പ്രസ്താവനയിൽ റൂബിയോ പറഞ്ഞു.
ഇരുരാജ്യങ്ങളും തമ്മിലുള്ള ലക്ഷ്യങ്ങൾ മുന്നോട്ട് കൊണ്ടുപോകാൻ ഒരുമിച്ച് പ്രവർത്തിക്കാൻ താൻ ആഗ്രഹിക്കുന്നുവെന്നും അദ്ദേഹം കൂട്ടിച്ചേർത്തു.
റൂബിയോ തന്റെ പ്രസ്താവനയിൽ നേരിട്ട് ‘വ്യാപാര കരാർ’ എന്ന് പരാമർശിച്ചില്ലെങ്കിലും, അതിന് ഏതാനും ആഴ്ചകൾ മുമ്പ് അദ്ദേഹം ഇന്ത്യൻ വിദേശകാര്യ മന്ത്രി എസ് ജയ്ശങ്കറുമായി ഉയർന്നതല ഫോൺസംഭാഷണം നടത്തിയിരുന്നു. വ്യാപാര ചർച്ചകളും സാമ്പത്തിക ബന്ധങ്ങളും ആ സംഭാഷണത്തിന്റെ പ്രധാന വിഷയങ്ങളായിരുന്നു.
യു എസിലെ ഇന്ത്യൻ അംബാസഡർ സെർജിയോ ഗോർ അടുത്തിടെ പറഞ്ഞത്, ട്രംപ് ഇന്ത്യ ഇറാനുമായി വ്യാപാരം നടത്തുന്നതിന്റെ പേരിൽ വീണ്ടും തീരുവകൾ ഏർപ്പെടുത്തുമെന്ന് ഭീഷണി ഉയർത്തിയിട്ടുണ്ടെങ്കിലും, ഇരുരാജ്യങ്ങളും വ്യാപാര കരാർ ഉറപ്പാക്കുന്നതിനായി സജീവമായി പ്രവർത്തിച്ചുകൊണ്ടിരിക്കുകയാണ് എന്നായിരുന്നു.