ന്യൂയോര്‍ക്ക്: ഹോളിവുഡ് വിനോദലോകത്തെ വന്‍ കൈമാറ്റങ്ങളിലൊന്നായ വാര്‍ണര്‍ ബ്രദേഴ്‌സ് ഡിസ്‌കവറിയുടെ ഏറ്റെടുക്കല്‍ പാരമൗണ്ട് സ്‌കൈഡാന്‍സ് പൂര്‍ത്തിയാക്കി. കടം ഉള്‍പ്പെടെ ഏകദേശം 110 ബില്യണ്‍ ഡോളര്‍ മൂല്യമുള്ള ഇടപാടാണ് ഒക്ടോബര്‍ 6ന് ഔദ്യോഗികമായി പൂര്‍ത്തിയായത്.
ഇതോടെ പാരമൗണ്ട് സ്‌കൈഡാന്‍സിന്റെ കീഴില്‍ രണ്ട് പ്രമുഖ ഹോളിവുഡ് സ്റ്റുഡിയോകള്‍ ഒന്നിക്കുകയാണ്. സിനിമ, ടെലിവിഷന്‍, സ്ട്രീമിങ്, വാര്‍ത്താ മാധ്യമ മേഖലകളിലെ നിരവധി പ്രമുഖ ബ്രാന്‍ഡുകളും ഫ്രാഞ്ചൈസികളും ഇനി ഒരേ കമ്പനിയുടെ കീഴിലാകും.
പാരമൗണ്ട്, വാര്‍ണര്‍ ബ്രദേഴ്‌സ്, എച്ച് ബി ഒ മാക്‌സ്, പാരമൗണ്ട് പ്ലസ്, സി ബി എസ്, സി എന്‍ എന്‍ എന്നിവയ്‌ക്കൊപ്പം ഹാരി പോട്ടര്‍, മിഷന്‍ ഇംപോസിബ്ള്‍, ടോപ് ഗണ്‍, സ്റ്റാര്‍ ട്രക്, ഡിസി തുടങ്ങിയ ജനപ്രിയ ഫ്രാഞ്ചൈസികളും പുതിയ കമ്പനിയുടെ ഭാഗമാകും.
പുതുതായി വിപുലീകരിച്ച കമ്പനിയുടെ തലവനായ ഡേവിഡ് എലിസണ്‍, ഏറ്റെടുക്കല്‍ പൂര്‍ത്തിയായതിനെ വിനോദമേഖലയിലെ ചരിത്രനിമിഷമെന്ന് വിശേഷിപ്പിച്ചു.
രണ്ട് പ്രമുഖ സ്റ്റുഡിയോകളെ ഒന്നിപ്പിച്ച് കൂടുതല്‍ ശക്തമായ ഒരു മത്സരശേഷിയുള്ള വിനോദ കമ്പനി സൃഷ്ടിക്കുകയായിരുന്നു ലക്ഷ്യമെന്നും എല്ലാ വിഭാഗങ്ങളിലെയും പ്രേക്ഷകര്‍ക്കായി വിവിധ പ്ലാറ്റ്‌ഫോമുകളിലൂടെ മികച്ച കഥകള്‍ അവതരിപ്പിക്കാന്‍ ആവശ്യമായ പ്രതിഭയും വിഭവങ്ങളും ആഗോള സാന്നിധ്യവും പുതിയ കമ്പനിക്കുണ്ടാകുമെന്നും അദ്ദേഹം പറഞ്ഞു.
ഇടപാട് യാഥാര്‍ഥ്യമായതില്‍ ജീവനക്കാര്‍, കലാകാരന്മാര്‍, നിര്‍മാണസംഘങ്ങള്‍, ഉപദേശകര്‍, പങ്കാളികള്‍ എന്നിവരുടെ സംഭാവന നിര്‍ണായകമായിരുന്നുവെന്നും എലിസണ്‍ വ്യക്തമാക്കി.
സൃഷ്ടിപരമായ പ്രതിഭകള്‍ക്ക് കൂടുതല്‍ അവസരങ്ങള്‍ നല്‍കുകയും പ്രേക്ഷകര്‍ക്ക് മികച്ച വിനോദം ഒരുക്കുകയും ഓഹരി ഉടമകള്‍ക്ക് നേട്ടം ഉറപ്പാക്കുകയും ചെയ്യുന്ന ഒരു കമ്പനി കെട്ടിപ്പടുക്കുകയാണ് ഇനി ലക്ഷ്യമെന്നും അദ്ദേഹം പറഞ്ഞു.
പുതിയ കമ്പനി ഓരോ വര്‍ഷവും 30 സിനിമകള്‍ തിയറ്ററുകളില്‍ റിലീസ് ചെയ്യാനും കൂടാതെ 180ലധികം ടെലിവിഷന്‍ ഷോകളും സീരീസുകളും പുറത്തിറക്കാനും പദ്ധതിയിടുന്നു.
വാര്‍ണര്‍ ബ്രദേഴ്‌സ് ഡിസ്‌കവറി ഏറ്റെടുക്കല്‍ പൂര്‍ത്തിയായതോടെ കമ്പനിയുടെ ഓഹരി വിപണി സാന്നിധ്യത്തിലും മാറ്റമുണ്ടായി. സംയോജിത കമ്പനിയുടെ ഓഹരികള്‍ ചൊവ്വാഴ്ച മുതല്‍ ന്യൂയോര്‍ക്ക് സ്റ്റോക്ക് എക്‌സ്‌ചേഞ്ചില്‍ 'എസ്‌കെവൈഡി' എന്ന ടിക്കര്‍ ചിഹ്നത്തില്‍ വ്യാപാരം ആരംഭിച്ചു.
നിരവധി മാസങ്ങള്‍ നീണ്ട ചര്‍ച്ചകള്‍ക്കും മത്സരിച്ച ഏറ്റെടുക്കല്‍ ഓഫറുകള്‍ക്കും നിയന്ത്രണ പരിശോധനകള്‍ക്കും ശേഷമാണ് ഇടപാട് പൂര്‍ത്തിയായത്.
വാര്‍ണര്‍ ബ്രദേഴ്‌സിന്റെ സ്റ്റുഡിയോ, സ്ട്രീമിങ് വിഭാഗങ്ങള്‍ ഏറ്റെടുക്കാന്‍ ആദ്യം നെറ്റ്ഫ്‌ളിക്‌സ് താത്പര്യം പ്രകടിപ്പിച്ചിരുന്നെങ്കിലും വാര്‍ണര്‍ ബ്രദേഴ്‌സ് ഡിസ്‌കവറിയുടെ വിശാലമായ ബിസിനസ് ഉള്‍പ്പെടുന്ന ഓഫറുമായി പാരമൗണ്ട് ഒടുവില്‍ സ്വന്തമാക്കുകയായിരുന്നു.
ഇതോടെ ഹോളിവുഡിലെ സിനിമ, ടെലിവിഷന്‍, സ്ട്രീമിങ്, വാര്‍ത്താ മേഖലകളില്‍ വിപുലമായ ആസ്തികളുള്ള പുതിയൊരു വിനോദ ഭീമന്‍ കൂടി രംഗത്തെത്തുകയാണ്.