ബെയ്ജിങ്: 30 ബില്യണ് ഡോളര് മൂല്യമുള്ള ഉത്പന്നങ്ങളുടെ പരസ്പര തീരുവ കുറയ്ക്കുന്നതിനും നിര്മിത ബുദ്ധി (എ ഐ) സംബന്ധിച്ച് പുതിയ ചര്ച്ചകള് ആരംഭിക്കുന്നതിനും ചൈനയും അമേരിക്കയും ധാരണയിലെത്തി. ചൈനീസ് പ്രസിഡന്റ് ഷി ജിന്പിങ്ങിന്റെ വാഷിംഗ്്ടണ് സന്ദര്ശനത്തിനിടെ യു എസ് പ്രസിഡന്റ് ഡൊണാള്ഡ് ട്രംപുമായി നടത്തിയ കൂടിക്കാഴ്ചകള്ക്ക് പിന്നാലെയാണ് ധാരണ. മൂന്ന് ദിവസത്തെ സന്ദര്ശനമായിരുന്നു ഷിയുടേത്.
ഇരുരാജ്യങ്ങളും തമ്മിലുള്ള വ്യാപാര സംഘര്ഷം മാസങ്ങളായി തുടരുന്നതിനിടെയാണ് ബന്ധം സുസ്ഥിരമാക്കുകയെന്ന ലക്ഷ്യത്തോടെ നടന്ന ഉന്നതതല ചര്ച്ചയില് എട്ട് ഇനങ്ങളടങ്ങിയ ധാരണയിലെത്തിയത്. ലോകത്തെ ഏറ്റവും വലിയ രണ്ട് സമ്പദ്വ്യവസ്ഥകളായ ചൈനയും അമേരിക്കയും തമ്മിലുള്ള വ്യാപാരബന്ധമാണ് ചര്ച്ചകളില് പ്രധാനമായും ശ്രദ്ധ നേടിയത്.
വ്യാപാരത്തിന് പ്രധാന പരിഗണന
ചൈനീസ് വിദേശകാര്യ മന്ത്രാലയത്തിന്റെ അറിയിപ്പനുസരിച്ച്, ഇരുരാജ്യങ്ങളുടെയും സാമ്പത്തിക സംഘങ്ങള് നടത്തിയ പ്രവര്ത്തനങ്ങള്ക്ക് നേതാക്കള് അംഗീകാരം നല്കി. തീരുവ കുറയ്ക്കുന്നതിനുള്ള ധാരണയ്ക്ക് പുറമെ വ്യാപാര കൗണ്സില് രൂപീകരിക്കാനും തീരുമാനിച്ചു.
വൈറ്റ് ഹൗസ് പുറത്തിറക്കിയ കുറിപ്പ് പ്രകാരം, ഓരോ ദിശയിലും 30 ബില്യണ് ഡോളര് മൂല്യമുള്ള സെന്സിറ്റീവ് വിഭാഗത്തില്പ്പെടാത്ത ഉത്പന്നങ്ങളാണ് കരാറിന്റെ പരിധിയില് വരുന്നത്. ക്വാലാലംപൂരില് നേരത്തെ നടന്ന ചര്ച്ചകളിലെ ധാരണകളുടെ അടിസ്ഥാനത്തില് തുടര്നടപടികള് സ്വീകരിക്കാനും ഇരുരാജ്യങ്ങളും തീരുമാനിച്ചു.
നിലവിലുള്ള വ്യാപാര താത്ക്കാലിക ധാരണ രണ്ട് മാസത്തേക്ക് കൂടി നീട്ടാന് ചൈനയും അമേരിക്കയും നേരത്തെ സമ്മതിച്ചിരുന്നു. ഇതോടെ നവംബര് 10ന് ശേഷവും ധാരണ തുടരുകയും കൂടുതല് വിപുലമായ വ്യാപാര കരാറിനായി ചര്ച്ചകള്ക്ക് അധിക സമയം ലഭിക്കുകയും ചെയ്യും. യു എസ് ട്രഷറി സെക്രട്ടറി സ്കോട്ട് ബെസന്റ് ഇക്കാര്യം വ്യക്തമാക്കി.
വ്യാപാരബന്ധം സംബന്ധിച്ച് വലിയ പുതിയ കരാര് പ്രഖ്യാപിച്ചില്ലെങ്കിലും ഭാവിയിലും ചര്ച്ചകള് തുടരുന്നതിനുള്ള വിവിധ സംവിധാനങ്ങള് ഉച്ചകോടിയില് രൂപീകരിച്ചു.
എ ഐ മേഖലയില് പുതിയ ചര്ച്ചാ സംവിധാനം
നിര്മിത ബുദ്ധി സാങ്കേതികവിദ്യയും ചൈന- യു എസ് ചര്ച്ചകളിലെ പ്രധാന വിഷയമായി. അത്യാധുനിക എ ഐ സാങ്കേതികവിദ്യകളുടെ നേട്ടങ്ങളും അപകടസാധ്യതകളും സംബന്ധിച്ച് ഇരുരാജ്യങ്ങളും നേരിട്ടുള്ള ചര്ച്ചകള് നടത്തും. ഇതിന്റെ അടുത്ത ഘട്ടം നവംബറില് നടക്കും.
എ ഐയുമായി ബന്ധപ്പെട്ട അടിയന്തര സംഭവങ്ങളില് ആശയവിനിമയം നടത്തുന്നതിനായി പ്രത്യേക ആശയവിനിമയ സംവിധാനവും രൂപീകരിക്കും.
എ ഐ മേഖലയില് മത്സരിക്കുന്നതിനേക്കാള് സഹകരിക്കുന്നതിന് ഇരുരാജ്യങ്ങള്ക്കും കൂടുതല് കാരണങ്ങളുണ്ടെന്ന് ഷി ജിന്പിങ് പറഞ്ഞു. സാങ്കേതികവിദ്യയുടെ ദുരുപയോഗവും തെറ്റായ ഉപയോഗവും തടയുന്നതിനായി അപകടസാധ്യതകളെക്കുറിച്ച് പരസ്പരം അഭിപ്രായങ്ങള് പങ്കിടണമെന്നും അദ്ദേഹം വ്യക്തമാക്കി.
ഇറാനും ആഗോള ഉച്ചകോടികളും ചര്ച്ചയായി
വിദേശനയ വിഷയങ്ങളും നേതാക്കള് ചര്ച്ച ചെയ്തു. ആണവായുധങ്ങള് വികസിപ്പിക്കില്ലെന്ന പ്രതിബദ്ധത ഇറാന് പാലിക്കണമെന്ന് ഇരുരാജ്യങ്ങളും അഭിപ്രായപ്പെട്ടു. അന്താരാഷ്ട്ര ജലപാതകളില് ഒരു രാജ്യത്തിനോ സ്ഥാപനത്തിനോ ടോള് ചുമത്തരുതെന്നും അവര് നിലപാട് വ്യക്തമാക്കി.
ഏഷ്യപസഫിക് സാമ്പത്തിക സഹകരണ ഉച്ചകോടിക്കും ജി20 ഉച്ചകോടിക്കും ആതിഥേയത്വം വഹിക്കുന്ന രാജ്യങ്ങളെന്ന നിലയില് പരസ്പരം പിന്തുണ നല്കാനും ചൈനയും അമേരിക്കയും ധാരണയിലെത്തി. മറ്റുരാജ്യം ആതിഥേയത്വം വഹിക്കുന്ന ഉച്ചകോടികളില് പങ്കെടുക്കാനുള്ള താത്പര്യവും ഇരു നേതാക്കളും പ്രകടിപ്പിച്ചു.
രണ്ടാം ലോകമഹായുദ്ധകാലത്ത് ചൈനയും അമേരിക്കയും സഖ്യകക്ഷികളായി പോരാടിയ ചരിത്രവും നേതാക്കള് അനുസ്മരിച്ചു.