ദുബൈ: ദുബൈ- ടെല്‍അവീവ് ഫ്‌ളൈ ദുബൈ വിമാനത്തില്‍ ഇന്ത്യന്‍ വംശജനായ ക്യാപ്റ്റന്‍ സ്മിത് മച്ച്ഹാറിനെ ആക്രമിച്ച സഹപൈലറ്റിന്റെ പശ്ചാത്തലവും ഉദ്ദേശ്യവും സംബന്ധിച്ച് അന്വേഷണം പുരോഗമിക്കുന്നു. ഒമാന്‍ സ്വദേശിയായ ഹമാം അല്‍ ഹമ്മാമിയാണ് ആക്രമണത്തിന് പിന്നിലെ സഹപൈലറ്റെന്ന് ചില മാധ്യമങ്ങള്‍ റിപ്പോര്‍ട്ട് ചെയ്തിട്ടുണ്ട്. എന്നാല്‍ അദ്ദേഹത്തിന്റെ വ്യക്തിത്വമോ ആരോപിക്കപ്പെടുന്ന ആശയങ്ങളോ സംബന്ധിച്ച് ഔദ്യോഗിക സ്ഥിരീകരണം ഇതുവരെ ഉണ്ടായിട്ടില്ല.
അതേസമയം, ഒമാന്‍ അധികൃതര്‍ നേരത്തെ ഹമാമിന് രാജ്യത്ത് വിമാനം പറത്തുന്നതിന് വിലക്ക് ഏര്‍പ്പെടുത്തിയിരുന്നുവെന്നും അതിന് പിന്നില്‍ തീവ്രവാദ ആശയങ്ങളുമായി ബന്ധപ്പെട്ട ആശങ്കകളുണ്ടായിരുന്നുവെന്നും ചില മാധ്യമ റിപ്പോര്‍ട്ടുകള്‍ പറയുന്നു. ഈ ആരോപണങ്ങളും ഇതുവരെ ഔദ്യോഗികമായി സ്ഥിരീകരിച്ചിട്ടില്ല. പരിക്കേറ്റ രണ്ടു പൈലറ്റുമാരേയും സൗദി അറേബ്യയില്‍ ആശുപത്രിയില്‍ പ്രവേശിപ്പിച്ചിരുന്നുവെങ്കിലും പിന്നീട് വൈദ്യപരിശോധനകള്‍ പൂര്‍ത്തിയാക്കിയ ശേഷം ഇരുവരെയും അബുദാബിയിലേക്ക് മാറ്റി.
ആരാണ് ഹമാം അല്‍ ഹമ്മാമി?
അന്വേഷണത്തിന്റെ കേന്ദ്രത്തില്‍ ഇപ്പോള്‍ നില്‍ക്കുന്ന പേര് ഹമാം അല്‍ ഹമ്മാമിയുടേതാണ്. ഒമാന്‍ സ്വദേശിയാണെന്നും യു എ ഇയില്‍ ജനിച്ചതാണെന്നും ചില റിപ്പോര്‍ട്ടുകള്‍ പറയുന്നു. സിറിയന്‍ വംശജയായ മാതാവാണ് അദ്ദേഹത്തിനുള്ളതെന്നും യു എ ഇയില്‍ വര്‍ഷങ്ങളോളം താമസിച്ചിരുന്നുവെന്നും അമേരിക്കന്‍ മാധ്യമമായ സി എന്‍ എന്‍ റിപ്പോര്‍ട്ട് ചെയ്തു.
അദ്ദേഹത്തിന്റെ മുന്‍ വ്യോമയാന ജീവിതത്തെക്കുറിച്ചും ഇപ്പോള്‍ ചോദ്യങ്ങള്‍ ഉയരുന്നുണ്ട്.
അന്വേഷണവുമായി ബന്ധപ്പെട്ട വിവരങ്ങള്‍ അറിയുന്ന മൂന്ന് വ്യക്തികളെ ഉദ്ധരിച്ച് അസോസിയേറ്റഡ് പ്രസ്സ് റിപ്പോര്‍ട്ട് ചെയ്തത്, ഒമാന്‍ സ്വദേശിയായ അല്‍ ഹമ്മാമിയാണ് ആക്രമണത്തിന് പിന്നിലെ സഹപൈലറ്റെന്നാണ്. എന്നാല്‍ ഔദ്യോഗികമായി പേര് സ്ഥിരീകരിച്ചിട്ടില്ല. വിവരങ്ങള്‍ പുറത്തുവിടാന്‍ അധികാരമില്ലാത്തതിനാല്‍ ഇവര്‍ അജ്ഞാതരായി തുടരുകയായിരുന്നു.
ഇതൊരു വ്യക്തിയുടെ ഒറ്റപ്പെട്ട നടപടിയായിരുന്നോ, അതോ ഏതെങ്കിലും തീവ്രവാദ സംഘടനയുമായോ മറ്റാരുമായോ ബന്ധമുണ്ടായിരുന്നോ എന്നതും അന്വേഷണത്തിന്റെ ഭാഗമാണ്.
മുന്‍കാല മുന്നറിയിപ്പുകള്‍ ഉണ്ടായിരുന്നോ?
സംഭവത്തിന് പിന്നാലെ ഏറ്റവും കൂടുതല്‍ ചര്‍ച്ചയാകുന്ന ചോദ്യങ്ങളിലൊന്നാണിത്- സഹപൈലറ്റിന്റെ മുന്‍കാല പശ്ചാത്തലത്തില്‍ എന്തെങ്കിലും മുന്നറിയിപ്പ് സൂചനകള്‍ ഉണ്ടായിരുന്നോ?
ദി വാള്‍ സ്ട്രീറ്റ് ജേണല്‍ പ്രസിദ്ധീകരിച്ച റിപ്പോര്‍ട്ടില്‍ ഒമാന്‍ അധികൃതര്‍ മുമ്പ് അല്‍ ഹമ്മാമിക്ക് രാജ്യത്ത് വിമാനം പറത്തുന്നതില്‍ വിലക്ക് ഏര്‍പ്പെടുത്തിയിരുന്നുവെന്നും അദ്ദേഹത്തിന് തീവ്രവാദപരമായ ആശയങ്ങളുണ്ടായിരുന്നുവെന്ന ആശങ്കയായിരുന്നു കാരണമെന്നും അജ്ഞാത സ്രോതസ്സുകളെ ഉദ്ധരിച്ച് റിപ്പോര്‍ട്ട് ചെയ്തു.
എന്നാല്‍ ആ ആശയങ്ങള്‍ എന്തായിരുന്നു, ഒമാന്‍ അധികൃതര്‍ മറ്റ് രാജ്യങ്ങളെയോ വിമാനക്കമ്പനികളെയോ ഇതുസംബന്ധിച്ച് അറിയിച്ചിരുന്നോ തുടങ്ങിയ കാര്യങ്ങള്‍ ഇപ്പോഴും വ്യക്തമല്ല.
സമാനമായ ആശങ്കകളുടെ പേരില്‍ അദ്ദേഹത്തെ പൈലറ്റ് പരിശീലനത്തില്‍ നിന്ന് നീക്കിയിരുന്നുവെന്നും പിന്നീട് മറ്റൊരു തസ്തികയിലേക്ക് മാറ്റിയിരുന്നുവെന്നും ഒരു പ്രാദേശിക നയതന്ത്ര സ്രോതസ്സിനെ ഉദ്ധരിച്ച് സി എന്‍ എന്‍ റിപ്പോര്‍ട്ട് ചെയ്തു. എന്നാല്‍ ഈ വിവരങ്ങള്‍ക്കും ഔദ്യോഗിക സ്ഥിരീകരണം ലഭിച്ചിട്ടില്ല.
വിവിധ വിമാനക്കമ്പനികളിലെ ജോലി
അല്‍ ഹമ്മാമിയുടെ പേരിലുള്ളതായി പറയപ്പെടുന്ന ലിങ്ക്ഡ്ഇന്‍ പ്രൊഫൈല്‍ പ്രകാരം അദ്ദേഹം ഒമാന്‍ എയറില്‍ ഏഴ് വര്‍ഷത്തോളം ജോലി ചെയ്തിരുന്നു. 2025 ഫെബ്രുവരിയിലാണ് അവിടെനിന്ന് മാറിയത്.
തുടര്‍ന്ന് 2025 ജൂണില്‍ റോയല്‍ എയര്‍ മറോക്കില്‍ ചേര്‍ന്നതായും 2026 ജനുവരിയില്‍ അവിടെനിന്ന് പിരിഞ്ഞതായും പ്രൊഫൈലില്‍ രേഖപ്പെടുത്തിയിരുന്നതായി സി എന്‍ എന്‍ റിപ്പോര്‍ട്ട് ചെയ്തു.
യു കെയിലെ ഒരു സര്‍വകലാശാലയില്‍ പഠിച്ചിരുന്നുവെന്ന വിവരവും ഇപ്പോള്‍ സ്ഥിരീകരിക്കപ്പെട്ടിട്ടുണ്ട്.
ബക്കിങ്ഹാംഷയര്‍ ന്യൂ യൂണിവേഴ്‌സിറ്റി അധികൃതര്‍ പ്രസ് അസോസിയേഷനോട് വ്യക്തമാക്കിയത് അല്‍ ഹമ്മാമി അവിടെ ഏവിയേഷന്‍ മാനേജ്‌മെന്റില്‍ ഒരു ഡിസ്റ്റന്‍സ് ലേണിങ് കോഴ്‌സ് പൂര്‍ത്തിയാക്കിയിരുന്നുവെന്നാണ്. എന്നാല്‍ സര്‍വകലാശാലയില്‍ അദ്ദേഹം പൈലറ്റ് പരിശീലനം നേടിയിട്ടില്ലെന്നും അധികൃതര്‍ വ്യക്തമാക്കി.
തീവ്രവാദ പ്രവര്‍ത്തനമെന്ന് യു എ ഇ
സംഭവത്തെക്കുറിച്ചുള്ള യുഎഇയുടെ ഔദ്യോഗിക നിലപാട് ശനിയാഴ്ച കൂടുതല്‍ വ്യക്തമായി.
യു എ ഇ അറ്റോര്‍ണി ജനറല്‍ ഹമദ് സൈഫ് അല്‍ ഷംസി, സഹപൈലറ്റ് കോക്പിറ്റിനുള്ളില്‍ വിമാനത്തിലെ അടിയന്തര ഉപയോഗത്തിനുള്ള ക്രാഷ് ആക്സ് ഉപയോഗിച്ച് ക്യാപ്റ്റനെ ആക്രമിക്കുകയും വിമാനത്തിന്റെ നിയന്ത്രണം ഏറ്റെടുക്കാന്‍ ശ്രമിക്കുകയും ചെയ്തതായി പറഞ്ഞു.
ഇതിനെ അദ്ദേഹം 'തീവ്രവാദ പ്രവര്‍ത്തനം' എന്നാണ് വിശേഷിപ്പിച്ചത്.
വിമാനത്തിന്റെ അടിയന്തര സാഹചര്യങ്ങളില്‍ വിവിധ ഭാഗങ്ങള്‍ മുറിച്ചുമാറ്റുന്നതിനായി കോക്പിറ്റില്‍ സൂക്ഷിക്കുന്ന ഉപകരണമാണ് ക്രാഷ് ആക്സ്.
വ്യാഴാഴ്ച തന്നെ സംഭവത്തിന് പിന്നില്‍ തീവ്രവാദ പ്രവര്‍ത്തനമോ അതിനുള്ള ഉദ്ദേശ്യമോ ഉണ്ടായിരുന്നോ, ആക്രമണം മുന്‍കൂട്ടി ആസൂത്രണം ചെയ്തതാണോ, മറ്റാരുടെയെങ്കിലും നിര്‍ദേശമോ സഹായമോ ഉണ്ടായിരുന്നോ തുടങ്ങിയ കാര്യങ്ങള്‍ പരിശോധിക്കാന്‍ അല്‍ ഷംസി അന്വേഷണത്തിന് ഉത്തരവിട്ടിരുന്നു.
എന്നാല്‍ അല്‍ ഹമ്മാമി ഒറ്റയ്ക്കാണോ പ്രവര്‍ത്തിച്ചതെന്നോ ആക്രമണത്തിന്റെ കൃത്യമായ ഉദ്ദേശ്യമെന്തെന്നോ യു എ ഇ ഇതുവരെ ഔദ്യോഗികമായി വ്യക്തമാക്കിയിട്ടില്ല.
അന്വേഷണത്തിന്റെ അടുത്ത ഘട്ടം
ഇപ്പോള്‍ അബുദാബിയാണ് അന്വേഷണത്തിന് നേതൃത്വം നല്‍കുന്നത്. ആക്രമണത്തിന്റെ സാഹചര്യങ്ങള്‍, ഉദ്ദേശ്യം, മറ്റാരുമായെങ്കിലും ബന്ധമുണ്ടായിരുന്നോ തുടങ്ങിയ കാര്യങ്ങളാണ് അന്വേഷിക്കുന്നത്.
വിമാനം യു എ ഇയില്‍ രജിസ്റ്റര്‍ ചെയ്തതും യു എ ഇയുടെ പതാകയ്ക്ക് കീഴില്‍ സര്‍വീസ് നടത്തുന്നതുമായതിനാല്‍ സംഭവത്തില്‍ യു എ ഇ നിയമം ബാധകമാണെന്ന് അല്‍ ഷംസി നേരത്തെ വ്യക്തമാക്കിയിരുന്നു. രാജ്യത്തിന് പുറത്തുവെച്ച് സംഭവം നടന്നാലും വിമാനത്തിനുള്ളില്‍ നടക്കുന്ന കുറ്റകൃത്യങ്ങളില്‍ യു എ ഇ നിയമം ബാധകമാകുമെന്ന് അദ്ദേഹം പറഞ്ഞു.
സംഭവവുമായി ബന്ധപ്പെട്ട എല്ലാ സാഹചര്യങ്ങളും ഉദ്ദേശ്യങ്ങളും ബന്ധങ്ങളും കണ്ടെത്തുന്നതിനൊപ്പം സാങ്കേതിക പരിശോധനകളും ഭൗതിക- ഡിജിറ്റല്‍ തെളിവുകളുടെ പരിശോധനയും തുടരുകയാണെന്ന് അല്‍ ഷംസി അറിയിച്ചു.
ആവശ്യമായ നടപടികള്‍ പൂര്‍ത്തിയാക്കിയ ശേഷം അന്വേഷണത്തിന്റെ അന്തിമ ഫലങ്ങള്‍ പ്രഖ്യാപിക്കുമെന്നും അദ്ദേഹം വ്യക്തമാക്കി.
ഇനിയും ഉത്തരം കിട്ടാത്ത ചോദ്യങ്ങള്‍
സംഭവത്തില്‍ നിരവധി ചോദ്യങ്ങള്‍ ഇപ്പോഴും ബാക്കിയാണ്. സഹപൈലറ്റിന്റെ കൃത്യമായ ഉദ്ദേശ്യമെന്തായിരുന്നു? അദ്ദേഹം ഒറ്റയ്ക്കാണോ പ്രവര്‍ത്തിച്ചത്? മുന്‍കാലത്ത് ഉയര്‍ന്നതായി പറയപ്പെടുന്ന ആശങ്കകള്‍ എത്രത്തോളം വസ്തുതാപരമാണ്? അവ ഏതെങ്കിലും അധികൃതര്‍ മറ്റ് രാജ്യങ്ങളുമായോ വിമാനക്കമ്പനികളുമായോ പങ്കുവെച്ചിരുന്നോ? ഫ്‌ളൈദുബൈയുടെ നിയമന- പരിശോധനാ നടപടികളില്‍ ഈ വിവരങ്ങള്‍ ലഭ്യമായിരുന്നോ? ഈ ചോദ്യങ്ങള്‍ക്കുള്ള ഉത്തരങ്ങള്‍ ലഭിക്കണമെങ്കില്‍ അന്വേഷണം പൂര്‍ത്തിയാകണം.
അതേസമയം, സംഭവത്തിന്റെ പശ്ചാത്തലത്തില്‍ ഇസ്രയേലിലേക്കുള്ള ഫ്‌ളൈദുബൈ സര്‍വീസുകള്‍ താത്ക്കാലികമായി നിര്‍ത്തിവച്ചിരിക്കുകയാണ്.
ആകാശത്ത് ഏതാനും മിനിറ്റുകള്‍ക്കുള്ളില്‍ നടന്ന സംഭവത്തില്‍ നിന്ന് ഇപ്പോള്‍ അന്വേഷണം എത്തിനില്‍ക്കുന്നത് ഒരു വലിയ ചോദ്യത്തിന് മുന്നിലാണ്- വിമാനത്തിന്റെ സുരക്ഷ ഉറപ്പാക്കുന്നതില്‍ സാങ്കേതിക സംവിധാനങ്ങള്‍ക്കൊപ്പം ഒരു പൈലറ്റിന്റെ പശ്ചാത്തലം എത്രത്തോളം നിര്‍ണായകമാണ് എന്നതാണ് ആ ചോദ്യം. അതിന്റെ ഉത്തരമാണ് ഇനി അന്വേഷണത്തിലൂടെ പുറത്തുവരേണ്ടത്.