ടെഹ്റാന്: ഇന്ധനക്കടത്ത് നടത്തിയെന്ന ആരോപണത്തില് ഗള്ഫ് കടല്പ്രദേശങ്ങളില് വിദേശ ക്രൂവുള്ള രണ്ട് എണ്ണക്കപ്പലുകള് ഇറാന്റെ ഇസ്ലാമിക് റെവല്യൂഷണറി ഗാര്ഡ് കോര്പ്പ്സ് (ഐ ആര് ജി സി) പിടിച്ചെടുത്തതായി ഇറാനിയന് മാധ്യമങ്ങള് റിപ്പോര്ട്ട് ചെയ്തു. രണ്ട് കപ്പലുകളിലുമായി ഒരു ദശലക്ഷത്തിലധികം ലിറ്റര് കടത്തിയ ഇന്ധനം കണ്ടെത്തിയതായും ആകെ 15 വിദേശ ക്രൂ അംഗങ്ങളെ നിയമ നടപടികള്ക്കായി കോടതിയില് ഹാജരാക്കിയതായും താസ്നിം വാര്ത്താ ഏജന്സി റിപ്പോര്ട്ട് ചെയ്തു.
ഇറാന്റെ ഫാര്സി ദ്വീപിന് സമീപമാണ് കപ്പലുകള് പിടികൂടിയതെന്ന് റിപ്പോര്ട്ടില് പറയുന്നു. കഴിഞ്ഞ നിരവധി മാസങ്ങളായി ഈ ടാങ്കറുകള് ഇന്ധനക്കടത്ത് പ്രവര്ത്തനങ്ങളില് ഏര്പ്പെട്ടിരുന്നുവെന്നും നിരീക്ഷണം, തടയല്, രഹസ്യാന്വേഷണ പ്രവര്ത്തനങ്ങള് എന്നിവയ്ക്ക് ശേഷമാണ് അവ തിരിച്ചറിഞ്ഞ് പിടികൂടിയതെന്നും വാര്ത്താ ഏജന്സി വ്യക്തമാക്കി.