ടെഹ്‌റാന്‍ : ഖാസിം ബാസിര്‍' എന്ന അത്യാധുനിക മിസൈല്‍ പുറത്തിറക്കി ഇറാന്‍. യുഎസ് നിര്‍മ്മിത താഡ്, പാട്രിയറ്റ് പോലുള്ള ബാലിസ്റ്റിക് മിസൈലുകളെ പ്രതിരോധിക്കാന്‍ കഴിയുന്ന സംവിധാനങ്ങളാണ് ഈ മിസൈല്‍ നിര്‍മാണത്തില്‍ ഉപയോഗിച്ചിരിക്കുന്നതെന്നാണ് ഇറാന്റെ അവകാശവാദം.
1,200 കിലോമീറ്ററിലധികം ദൂരപരിധിയുള്ള ഈ മിസൈലിന് എല്ലാ ഇസ്രായേലി പ്രദേശങ്ങളെയും മറികടക്കാന്‍ കഴിയുമെന്നും ഇറാന്‍ പ്രതിരോധമന്ത്രാലയം എക്‌സില്‍ അവകാശപ്പെട്ടു.
യെമനിലെ ഹൂത്തി വിമതരെ ടെഹ്‌റാന്‍ പിന്തുണയ്ക്കുന്ന ഇസ്രായേലുമായി ഇറാന്‍ സംഘര്‍ഷത്തില്‍ തുടരുന്നതിനിടെയാണ് പുതിയ മിസൈല്‍ ഖാസിം ബാസിറിനെക്കുറിച്ചുള്ള റിപ്പോര്‍ട്ടുകള്‍ വരുന്നത്.
ഖാസിം ബാസിര്‍ എന്താണ്?
ഇറാന്റെ ഏറ്റവും പുതിയ മിസൈലാണ് ഖാസിം ബാസിര്‍, ഇതിന് നിരവധി സവിശേഷതകളുണ്ട്, ഇത് നിലവില്‍ യുഎസ് നിര്‍മ്മിത താഡ്, പേട്രിയറ്റ് തുടങ്ങിയ മിസൈല്‍ പ്രതിരോധ സംവിധാനങ്ങളെ മറികടക്കുന്നതാണെന്നാണ് ഇറാന്‍ പുറയുന്നത്.
ഓപ്പറേഷന്‍ ട്രൂ പ്രോമിസ് 1, 2 എന്നിവയില്‍ നിന്നുള്ള അനുഭവത്തിലൂടെയാണ് 'കൂടുതല്‍ ദൂരപരിധി മറികടക്കുന്നതും പ്രഹരശേഷിയുമുള്ള ' മിസൈല്‍ വികസിപ്പിച്ചെടുത്തതെന്ന് ഇറാനിയന്‍ സൈന്യം എക്‌സില്‍ പറഞ്ഞു.
2024 ഏപ്രില്‍ 13ന് ഇസ്രായേലിനെതിരെ ഇറാന്‍ നടത്തിയ വ്യോമാക്രമണത്തിന്റെ രഹസ്യനാമമാണ് ഓപ്പറേഷന്‍ ട്രൂ പ്രോമിസ്. ഏപ്രില്‍ 1ന് സിറിയയിലെ ഇറാന്റെ കോണ്‍സുലേറ്റിനു നേരെ ഇസ്രായേല്‍നടത്തിയതെന്ന് ഇറാന്‍ ആരോപിക്കുന്ന ആക്രമണത്തിനുള്ള പ്രതികാര നടപടിയായിരുന്നു ഓപ്പറേഷന്‍ട്രൂ പ്രോമിസ്.
എന്നാല്‍ ഇറാന്‍ വിക്ഷേപിച്ച ഏകദേശം 300 മിസൈലുകളില്‍ 99 ശതമാനവും ആകാശത്ത് നശിപ്പിക്കപ്പെട്ടുവെന്ന് ഇസ്രായേല്‍ അവകാശപ്പെടുന്നു.
അതേസമയം, ഓപ്പറേഷന്‍ ട്രൂ പ്രോമിസ് 2, 2024 ഒക്ടോബര്‍ 1ന് ഇസ്രായേലിനെതിരെ ഇറാന്‍ നടത്തിയ ആക്രമണത്തെയാണ് സൂചിപ്പിക്കുന്നത്. നടന്നുകൊണ്ടിരിക്കുന്ന ഇറാന്‍-ഇസ്രായേല്‍ സംഘര്‍ഷത്തിനിടെ ഏറ്റവും വലിയ ആക്രമണമായിരുന്നു അത്.
ഖാസെം ബാസിര്‍ മിസൈലിന്റെ സവിശേഷതകള്‍
'നൂതന സ്‌റ്റെല്‍ത്ത് സാങ്കേതികവിദ്യ' ഈ മിസൈലിന്റെ സവിശേഷത. ഇതിന്റെ കാര്‍ബണ്‍ ഫൈബര്‍ ബോഡി അതിനെ ഭാരം കുറഞ്ഞതും വേഗതയേറിയതും റഡാര്‍ ആഗിരണം ചെയ്യുന്നതുമാക്കുന്നു. കൂടാതെ, അതിന്റെ 'കട്ട്എഡ്ജ്' മാര്‍ഗ്ഗനിര്‍ദ്ദേശ സംവിധാനത്തിന് റഡാര്‍ കണ്ടെത്തലുകളെ ഒഴിവാക്കാന്‍ കഴിയും.
ഇതിന് 'സാറ്റലൈറ്റ് ഗൈഡഡ് ഇന്റര്‍സെപ്ഷന്‍ ഫെയ്‌ലുവര്‍ 'എന്നൊരു സവിശേഷതയുമുണ്ട്; ഇറാനിയന്‍ സൈന്യത്തിന്റെ അഭിപ്രായത്തില്‍, ബഹിരാകാശത്ത് അധിഷ്ഠിതമായ പ്രതിരോധ സംവിധാനങ്ങള്‍ക്ക് പോലും അതിന്റെ വാര്‍ഹെഡ് ട്രാക്ക് ചെയ്യാന്‍ കഴിയില്ല എന്നാണ് ഇതിനര്‍ത്ഥം. ഖാസിം ബാസിറിന് അഞ്ച് ശതമാനം എന്ന വളരെ കുറഞ്ഞ ഇന്റര്‍സെപ്ഷന്‍ നിരക്കാണുള്ളത്. 'യുദ്ധ സാഹചര്യങ്ങളില്‍ 200 മിസൈലുകളില്‍ 5 എണ്ണം മാത്രമേ നിര്‍ത്താന്‍ കഴിയൂ' എന്നും എക്‌സ് പോസ്റ്റില്‍ പറയുന്നു.
ഖാസിം ബാസിറില്‍ ഒരു തെര്‍മല്‍ ഇമേജിംഗ് ഗൈഡന്‍സ് സിസ്റ്റം സജ്ജീകരിച്ചിരിക്കുന്നു, ഇത് അതിന്റെ കൃത്യത വര്‍ദ്ധിപ്പിക്കുകയും ഇലക്ട്രോണിക് യുദ്ധത്തെ പ്രതിരോധിക്കുകയും ചെയ്യുന്നു.1,200 കിലോമീറ്ററിലധികം അകലെ നിന്ന് പുതിയ മിസൈല്‍ വിജയകരമായി വിക്ഷേപിച്ചതായും, ജിപിഎസ് നാവിഗേഷനെ ആശ്രയിക്കാതെയും വ്യതിയാനമില്ലാതെയും നിശ്ചിത ലക്ഷ്യത്തില്‍ കൃത്യമായി പതിച്ചതായും പ്രതിരോധ മന്ത്രി ബ്രിഗേഡിയര്‍ ജനറല്‍ അസീസ് നസീര്‍സാദെ പറഞ്ഞു. മിസൈലിന്റെ മാര്‍ഗ്ഗനിര്‍ദ്ദേശവും കൃത്യതയും മെച്ചപ്പെടുത്തിയിട്ടുണ്ടെന്നും, പാളികളുള്ള പ്രതിരോധ സംവിധാനങ്ങളെ മറികടക്കാന്‍ ഇത് പ്രാപ്തമാക്കുമെന്നും നസീര്‍സാദെ ഊന്നിപ്പറഞ്ഞു.
'ഞങ്ങളെ ആക്രമിച്ചാല്‍, അല്ലെങ്കില്‍ ഞങ്ങള്‍ക്ക് മേല്‍ ഒരു യുദ്ധം അടിച്ചേല്‍പ്പിച്ചാല്‍, ഞങ്ങള്‍ ശക്തിയോടെ പ്രതികരിക്കും-നാസിര്‍സാദെ പറഞ്ഞു.
'നമ്മള്‍ നമ്മുടെ അയല്‍രാജ്യങ്ങളുടെ ശത്രുക്കളല്ല, അവര്‍ നമ്മുടെ സഹോദരന്മാരാണ്, പക്ഷേ അവരുടെ മണ്ണിലുള്ള അമേരിക്കന്‍ താവളങ്ങളായിരിക്കും തങ്ങളുടെ ലക്ഷ്യമെന്നും നാസിര്‍സാദെ കൂട്ടിച്ചേര്‍ത്തു.
'ഖാസിം ബാസിര്‍ മിസൈല്‍' പുറത്തിറക്കി ഇറാന്‍; യുഎസ് നിര്‍മ്മിത താഡിനെ പിന്തള്ളിയെന്ന് അവകാശം
