അസുന്‍സിയോണ്‍: പരാഗ്വേയിലെ യുനോ ബാങ്ക് തകര്‍ച്ചയുമായി ബന്ധപ്പെട്ട അന്വേഷണത്തിന്റെ ഭാഗമായി മുന്‍ പ്രസിഡന്റ് സാന്റിയാഗോ പെനയുടെ ആഡംബര വസതിയില്‍ പൊലീസ് പരിശോധന നടത്തി. ബാങ്കിങ് പ്രതിസന്ധിയെ തുടര്‍ന്ന് അധികാരത്തില്‍നിന്ന് നീക്കം ചെയ്യപ്പെട്ട പെനയ്ക്കെതിരെ ക്രിമിനല്‍ കുറ്റങ്ങളും ചുമത്തിയിട്ടുണ്ട്.
കഴിഞ്ഞയാഴ്ചയാണ് പരാഗ്വേയിലെ പ്രമുഖ ഓണ്‍ലൈന്‍ ബാങ്കായ യുനോ ബാങ്കിന്റെ നിയന്ത്രണം അധികൃതര്‍ ഏറ്റെടുത്തത്. രാജ്യത്തെ 65 ലക്ഷം ജനങ്ങളില്‍ പകുതിയോളം പേര്‍ക്ക് അക്കൗണ്ടുകളുണ്ടായിരുന്ന ബാങ്കില്‍ 80 കോടി ഡോളറിലധികം സര്‍ക്കാര്‍ നിക്ഷേപവും ഉണ്ടായിരുന്നു. ബാങ്കിന്റെ തകര്‍ച്ച രാജ്യത്തെ സാമ്പത്തിക മേഖലയില്‍ വലിയ പ്രത്യാഘാതങ്ങളുണ്ടാക്കുകയും വിവിധ നഗരങ്ങളില്‍ ജനകീയ പ്രതിഷേധങ്ങള്‍ക്ക് വഴിവെക്കുകയും ചെയ്തു.
നിലവില്‍ സൈനിക കേന്ദ്രത്തില്‍ കസ്റ്റഡിയിലാണ് പെന. 2023ല്‍ പ്രസിഡന്റായി അധികാരമേറ്റ അദ്ദേഹം യുനോ ബാങ്കിന്റെ മാതൃകമ്പനിയായ യുനോ ഹോള്‍ഡിങ്ങില്‍ ഓഹരികള്‍ സ്വന്തമാക്കിയിരുന്നു. എന്നാല്‍ കഴിഞ്ഞ വര്‍ഷം ഇവ വിറ്റഴിച്ചതായാണ് റിപ്പോര്‍ട്ട്.
പ്രസിഡന്റ് പദവി ദുരുപയോഗം ചെയ്ത് ദശലക്ഷക്കണക്കിന് ഡോളറിന്റെ സര്‍ക്കാര്‍ നിക്ഷേപം യുനോ ബാങ്കിലേക്ക് വഴിതിരിച്ചുവിട്ടെന്നാണ് പെനയ്ക്കെതിരായ പ്രധാന ആരോപണം. ബാങ്കിന്റെ സാമ്പത്തിക പ്രതിസന്ധിയെക്കുറിച്ചും സംശയാസ്പദമായ വായ്പകളെക്കുറിച്ചും മുന്നറിയിപ്പുകള്‍ ലഭിച്ചിട്ടും സ്ഥിതിഗതികള്‍ മറച്ചുവെക്കുകയോ ഗൗരവം കുറച്ചുകാട്ടുകയോ ചെയ്തതായും അന്വേഷണസംഘം ആരോപിക്കുന്നു.
ബാങ്കിന്റെ തകര്‍ച്ചയുമായി ബന്ധപ്പെട്ട അന്വേഷണത്തിന്റെ ഭാഗമായി മുന്‍ പ്രസിഡന്റിന്റെ വസതിയില്‍ പരിശോധന നടത്തിയതായി പ്രോസിക്യൂട്ടര്‍മാര്‍ ഔദ്യോഗിക പ്രസ്താവനയിലൂടെ സ്ഥിരീകരിച്ചു.
ബാങ്ക് അധികൃതരുമായി ബന്ധമുള്ള സ്ഥാപനങ്ങള്‍ക്ക് സംശയാസ്പദമായ വായ്പകള്‍ അനുവദിച്ചുകൊണ്ടിരിക്കെ സര്‍ക്കാര്‍ സ്ഥാപനങ്ങളില്‍നിന്ന് നിക്ഷേപം സ്വീകരിച്ചിരുന്നതായും പ്രോസിക്യൂഷന്‍ ആരോപിച്ചു.
തലസ്ഥാനമായ അസുന്‍സിയോണിന് പുറത്തുള്ള പെനയുടെ ആഡംബര വസതിയും അന്വേഷണപരിധിയിലാണ്. 2024ല്‍ ഈ വസതിയുടെ നിര്‍മാണത്തിനായി യുനോ ബാങ്കില്‍നിന്ന് ഏകദേശം അഞ്ച് ലക്ഷം ഡോളറിന്റെ രണ്ട് വായ്പകള്‍ പെന നേടിയെന്നാണ് കുറ്റപത്രത്തില്‍ പറയുന്നത്.
വായ്പ തിരിച്ചടവിനായി പ്രതിമാസം 38,000 ഡോളറാണ് പെന നല്‍കേണ്ടിയിരുന്നതെന്നും ഇത് പ്രസിഡന്റ് എന്ന നിലയില്‍ അദ്ദേഹത്തിന് ലഭിച്ചിരുന്ന പ്രതിമാസ ശമ്പളത്തിന്റെ ആറിരട്ടിയാണെന്നും കുറ്റപത്രത്തില്‍ ചൂണ്ടിക്കാട്ടുന്നു.
സെനറ്റ് വോട്ടെടുപ്പിലൂടെയാണ് പെനയെ പ്രസിഡന്റ് സ്ഥാനത്തുനിന്ന് നീക്കിയത്. തുടര്‍ന്ന് വൈസ് പ്രസിഡന്റ് പെഡ്രോ അല്ലിയാന പുതിയ പ്രസിഡന്റായി ചുമതലയേറ്റു.
യുനോ ബാങ്കിന്റെ തകര്‍ച്ചയെത്തുടര്‍ന്ന് അക്കൗണ്ടുകളിലെ പണം പിന്‍വലിക്കാന്‍ കഴിയാതെ വന്ന 12 ലക്ഷം ഇടപാടുകാര്‍ക്ക് സര്‍ക്കാര്‍ നഷ്ടപരിഹാരമോ നിക്ഷേപത്തുകയോ തിരികെ നല്‍കിയതായി പുതിയ പ്രസിഡന്റ് പെഡ്രോ അല്ലിയാന അറിയിച്ചു.
ഇതുവരെ ഏകദേശം 15.8 കോടി ഡോളര്‍ ഇടപാടുകാര്‍ക്ക് തിരിച്ചുനല്‍കിയിട്ടുണ്ട്. പണം തിരികെ നല്‍കുന്ന നടപടി ഈ ആഴ്ചയും തുടരുമെന്നും അദ്ദേഹം വ്യക്തമാക്കി.