കീവ് : മൂന്ന് വർഷത്തിലേറെയായി തുടരുന്ന റഷ്യ-ഉക്രൈൻ യുദ്ധത്തിന് അന്ത്യം കുറിക്കാനുള്ള ശ്രമത്തിന്റെ ഭാഗമായി ഉക്രൈൻ പ്രസിഡന്റ് വോളൊഡിമിർ സെലെൻസ്കി 20 പോയിന്റ് അടങ്ങിയ സമാധാന പദ്ധതിയുടെ വിശദാംശങ്ങൾ പുറത്തുവിട്ടു. അമേരിക്കയും ഉക്രൈനും തമ്മിലുള്ള ചർച്ചകളിൽ രൂപപ്പെട്ട കരട് രേഖയുടെ ഉള്ളടക്കമാണ് സെലെൻസ്കി മാധ്യമപ്രവർത്തകരെ അഭിസബോധന ചെയ്ത് വിശദീകരിച്ചത്. എന്നാൽ ഭൂഭാഗവുമായി ബന്ധപ്പെട്ട നിർണായക വിഷയങ്ങളിൽ ഇപ്പോഴും വ്യക്തതയില്ലെന്നത് കരാർ പ്രാബല്യത്തിലാകുന്നതിലെ വലിയ വെല്ലുവിളിയായി തുടരുന്നു. റഷ്യ ഈ നിബന്ധനകൾ അംഗീകരിക്കുമോ എന്നതും അനിശ്ചിതമാണ്.
പൂർണവും നിബന്ധനകളില്ലാത്തതുമായ ആക്രമണവിരുദ്ധ കരാറാണ് സമാധാന പദ്ധതിയുടെ അടിസ്ഥാനം. കരാർ നടപ്പാക്കൽ ഉറപ്പാക്കാൻ ഉപഗ്രഹങ്ങളും ഡ്രോണുകളും ഉപയോഗിച്ചുള്ള അന്താരാഷ്ട്ര നിരീക്ഷണ സംവിധാനം രൂപീകരിക്കും. ഉക്രൈനിന് ശക്തമായ സുരക്ഷാ ഉറപ്പുകൾ നൽകുമെന്ന് രേഖ വ്യക്തമാക്കുന്നു. സമാധാനകാലത്ത് ഉക്രൈൻ സൈന്യത്തിന്റെ ശക്തി എട്ട് ലക്ഷം സൈനികരായി നിലനിർത്താനും കരാറിൽ വ്യവസ്ഥയുണ്ട്.
റഷ്യ വീണ്ടും ആക്രമണം നടത്തിയാൽ നേറ്റോയുടെ ആർട്ടിക്കിൾ 5ന് സമാനമായ സുരക്ഷാ ഇടപെടലുകളും റഷ്യയ്ക്കെതിരായ ആഗോള ഉപരോധങ്ങൾ പുനഃസ്ഥാപിക്കുമെന്നും പദ്ധതി വ്യക്തമാക്കുന്നു. അതേസമയം ഉക്രൈൻ റഷ്യൻ ഭൂപ്രദേശത്ത് പ്രകോപനമില്ലാതെ ആക്രമണം നടത്തിയാൽ ഈ സുരക്ഷാ ഉറപ്പുകൾ അസാധുവാകുമെന്നും പറയുന്നു. യൂറോപ്പിനോടും ഉക്രൈനോടും ആക്രമണവിരുദ്ധ നയം നിയമപരമായി ഉറപ്പാക്കാൻ റഷ്യ ബാധ്യസ്ഥമാകണമെന്നും കരാറിൽ ഉൾപ്പെടുത്തിയിട്ടുണ്ട്.
ഉക്രൈനെ നിശ്ചിത സമയപരിധിക്കുള്ളിൽ യൂറോപ്യൻ യൂണിയൻ അംഗമാക്കുക, അമേരിക്കയുമായി സ്വതന്ത്ര വ്യാപാര കരാർ വേഗത്തിലാക്കുക, 200 ബില്യൺ ഡോളർ ലക്ഷ്യമിട്ട പുനർനിർമാണ-വികസന ഫണ്ട് രൂപീകരിക്കുക തുടങ്ങിയ സാമ്പത്തിക പുനരുജ്ജീവന നടപടികളും പദ്ധതിയിൽ ഉൾപ്പെടുന്നു. ഖനനമേഖല, അടിസ്ഥാന സൗകര്യ വികസനം, ഗ്യാസ് പൈപ്പ്ലൈൻ നവീകരണം എന്നിവയിൽ അന്താരാഷ്ട്ര നിക്ഷേപം ലക്ഷ്യമിടുന്നു.
ഡൊണെറ്റ്സ്ക്, ലുഹാൻസ്ക്, സപൊറിഷ്യ, ഖേഴ്സൺ മേഖലകളിൽ നിലവിലുള്ള സൈനിക വിന്യാസ രേഖയെ താൽക്കാലിക 'ലൈൻ ഓഫ് കോൺടാക്ട്' ആയി അംഗീകരിക്കുമെന്ന് പദ്ധതി വ്യക്തമാക്കുന്നു. എന്നാൽ അന്തിമ ഭൂപ്രദേശ ക്രമീകരണത്തെക്കുറിച്ച് പിന്നീട് ചർച്ച നടത്തുമെന്ന് പറയുന്നുണ്ട്. ഡ്നിപ്രൊപെട്രോവ്സ്ക്, മൈകോലൈവ്, സുമി, ഖാർകീവ് മേഖലകളിൽ നിന്ന് റഷ്യൻ സൈന്യം പൂർണമായി പിന്മാറിയാൽ മാത്രമേ കരാർ പ്രാബല്യത്തിൽ വരൂ.
സപൊറിഷ്യ ആണവ നിലയം ഉക്രൈൻ-അമേരിക്ക-റഷ്യ എന്നീ മൂന്ന് രാജ്യങ്ങൾ ചേർന്ന് സംയുക്തമായി പ്രവർത്തിപ്പിക്കണമെന്ന നിർദേശവും ശ്രദ്ധേയമാണ്. എല്ലാ യുദ്ധ തടവുകാരെയും 'ഓൾ ഫോർ ഓൾ' അടിസ്ഥാനത്തിൽ മോചിപ്പിക്കുക, കുട്ടികളടക്കം തടവിലായ സാധാരണ പൗരന്മാരെ തിരിച്ചെത്തിക്കുക എന്നിവയും കരാറിൽ ഉൾപ്പെടുത്തിയിട്ടുണ്ട്.
കരാർ ഒപ്പുവച്ചതിന് ശേഷം ഉക്രൈനിൽ തിരഞ്ഞെടുപ്പ് നടത്തണമെന്നും, എല്ലാ നിബന്ധനകളും നിയമപരമായി ബാധകമാണെന്നും രേഖ പറയുന്നു. കരാർ നടപ്പാക്കൽ മേൽനോട്ടത്തിനായി അമേരിക്കൻ മുൻ പ്രസിഡന്റ് ഡൊണാൾഡ് ട്രംപ് അധ്യക്ഷനായ 'പീസ് കൗൺസിൽ' രൂപീകരിക്കുമെന്നും സെലെൻസ്കി വ്യക്തമാക്കി. എല്ലാ കക്ഷികളും അംഗീകരിച്ചാൽ ഉടൻ പൂർണ വെടിനിർത്തൽ പ്രാബല്യത്തിൽ വരുമെന്നും അദ്ദേഹം പറഞ്ഞു.
യുദ്ധം അവസാനിപ്പിക്കുന്നതിലേക്കുള്ള വലിയ ചുവടുവയ്പ്പായി ഈ പദ്ധതി വിലയിരുത്തപ്പെടുമ്പോഴും, ഭൂഭാഗവുമായി ബന്ധപ്പെട്ട വിഷയങ്ങളിൽ റഷ്യയുടെ നിലപാട് എന്തായിരിക്കും എന്നതാണ് അന്തിമ ഫലം നിർണയിക്കുക.
റഷ്യ-ഉക്രൈൻ യുദ്ധത്തിന് വഴിത്തിരിവോ? 20 പോയിന്റ് സമാധാനരേഖ പുറത്തുവിട്ട് സെലെൻസ്കി; ഭൂഭാഗ വിഷയത്തിൽ അനിശ്ചിതത്വം
