വാഷിങ്ടൺ: ആണവകരാർ സംബന്ധിച്ച ചർച്ചകൾ പരാജയപ്പെട്ടാൽ ഇറാനിലെ പിക്കാക്സ് മലനിരയ്ക്കു കീഴിലുള്ള ആണവകേന്ദ്രം ഉൾപ്പെടെയുള്ള പ്രധാന കേന്ദ്രങ്ങൾ വീണ്ടും ആക്രമിക്കുമെന്ന് അമേരിക്കൻ പ്രസിഡന്റ് ഡോണൾഡ് ട്രംപ് മുന്നറിയിപ്പ് നൽകി. ചർച്ചകൾ പുരോഗമിക്കുന്നുണ്ടെങ്കിലും ഇറാന് ഒരിക്കലും ആണവായുധം സ്വന്തമാക്കാൻ അനുവദിക്കില്ലെന്നും അദ്ദേഹം വ്യക്തമാക്കി.
ഫോക്സ് ന്യൂസിന് നൽകിയ അഭിമുഖത്തിലായിരുന്നു ട്രംപിന്റെ പ്രതികരണം. ഇറാനുമായി വളരെ നല്ല ചർച്ചകളാണ് നടക്കുന്നതെങ്കിലും ചിലപ്പോൾ അവർ ആണവ വിഷയത്തെക്കുറിച്ച് സംസാരിച്ചിട്ടില്ലെന്ന് അവകാശപ്പെടാറുണ്ടെന്ന് അദ്ദേഹം പറഞ്ഞു. എന്നാൽ ചർച്ചകളുടെ പ്രധാന വിഷയം ആണവ പദ്ധതിയാണെന്നും ഇറാന് ആണവായുധം ലഭിക്കില്ലെന്ന് അവർക്ക് വ്യക്തമായി അറിയാമെന്നും ട്രംപ് കൂട്ടിച്ചേർത്തു.
ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു ഇറാന്റെ ആണവ പദ്ധതി പുനർനിർമിക്കുന്നതുമായി ബന്ധപ്പെട്ട രഹസ്യവിവരങ്ങൾ അമേരിക്കയ്ക്ക് കൈമാറിയെന്ന റിപ്പോർട്ടുകളും ട്രംപ് തള്ളി. അത്തരം വിവരങ്ങൾ അറിയാൻ നെതന്യാഹുവിന്റെ സഹായം ആവശ്യമില്ലെന്നും, അമേരിക്ക ഈ വിഷയത്തിൽ സജീവമായി തുടരണമെന്ന ആഗ്രഹമാണ് അദ്ദേഹം പ്രകടിപ്പിക്കുന്നതെന്നും ട്രംപ് പറഞ്ഞു.
ഇറാന്റെ പ്രധാന ആണവകേന്ദ്രങ്ങൾ അമേരിക്ക നേരത്തേ തകർത്തുവെന്ന അവകാശവാദവും ട്രംപ് ആവർത്തിച്ചു. കരാർ ഉണ്ടാകാത്ത പക്ഷം പിക്കാക്സ് മലനിരയ്ക്കു കീഴിലുള്ള ആണവകേന്ദ്രവും എളുപ്പത്തിൽ തകർക്കുമെന്നും, ആവശ്യമെങ്കിൽ ഇറാന്റെ പാലങ്ങൾ, വൈദ്യുത നിലയങ്ങൾ തുടങ്ങിയ പ്രധാന അടിസ്ഥാന സൗകര്യങ്ങളും ലക്ഷ്യമിടുമെന്നും അദ്ദേഹം മുന്നറിയിപ്പ് നൽകി. അതേസമയം സൈനിക നടപടി ഒഴിവാക്കി നയതന്ത്രപരമായ പരിഹാരമാണ് താൻ ആഗ്രഹിക്കുന്നതെന്നും ഇറാൻ ജനത സമാധാനത്തോടെ ജീവിക്കണമെന്നാണ് തന്റെ നിലപാടെന്നും ട്രംപ് പറഞ്ഞു.
എന്താണ് പിക്കാക്സ് കേന്ദ്രം?
ഇറാനിലെ നതാൻസ് ആണവസമ്പുഷ്ടീകരണ കേന്ദ്രത്തിന് സമീപം ഏകദേശം 100 മീറ്ററിലധികം പാറക്കെട്ടുകൾക്കടിയിലായാണ് പിക്കാക്സ് ആണവകേന്ദ്രം സ്ഥിതിചെയ്യുന്നതെന്നാണ് വിലയിരുത്തൽ. ഭൂഗർഭത്തിൽ നിർമ്മിച്ചിരിക്കുന്ന ഈ കേന്ദ്രം അത്യാധുനിക സെൻട്രിഫ്യൂജുകൾ സ്ഥാപിക്കാനും യുറേനിയം സമ്പുഷ്ടീകരണ പ്രവർത്തനങ്ങൾ നടത്താനുമുള്ള സംവിധാനമാണെന്നാണ് പാശ്ചാത്യ രഹസ്യാന്വേഷണ ഏജൻസികളുടെ വിലയിരുത്തൽ.
അമേരിക്കയുടെ ഏറ്റവും ശക്തമായ ബങ്കർ ബസ്റ്റർ ബോംബുകൾക്കുപോലും ഈ കേന്ദ്രം പൂർണമായി തകർക്കാൻ കഴിയുമോയെന്ന കാര്യത്തിൽ സൈനിക വിദഗ്ധർക്കിടയിൽ അഭിപ്രായവ്യത്യാസമുണ്ട്. 2025ൽ ഇറാൻ ആയിരക്കണക്കിന് സെൻട്രിഫ്യൂജുകൾ പിക്കാക്സ് കേന്ദ്രത്തിലേക്ക് മാറ്റിയതായി ഇസ്രയേൽ രഹസ്യാന്വേഷണ വിഭാഗം വിലയിരുത്തിയതായി അടുത്തിടെ റിപ്പോർട്ടുകൾ പുറത്തുവന്നിരുന്നു. ഉപഗ്രഹ ചിത്രങ്ങളിൽ നിർമാണ പ്രവർത്തനങ്ങൾ തുടരുന്നതിന്റെ സൂചനകൾ ലഭിച്ചിട്ടുണ്ടെങ്കിലും കേന്ദ്രം പൂർണമായും പ്രവർത്തനക്ഷമമായിട്ടുണ്ടോയെന്ന് ഇതുവരെ സ്ഥിരീകരിച്ചിട്ടില്ല.
ട്രംപിന്റെ പുതിയ മുന്നറിയിപ്പോടെ ഇറാൻ-അമേരിക്ക ബന്ധത്തിലും പശ്ചിമേഷ്യയിലെ സുരക്ഷാ സാഹചര്യത്തിലും വീണ്ടും അനിശ്ചിതത്വം വർധിക്കുമെന്നാണ് അന്താരാഷ്ട്ര നിരീക്ഷകരുടെ വിലയിരുത്തൽ.
ആണവകരാർ ഇല്ലെങ്കിൽ വീണ്ടും ആക്രമണം; ഇറാനെതിരെ ട്രംപിന്റെ കടുത്ത മുന്നറിയിപ്പ്
