ന്യൂഡല്‍ഹി : രാജ്യാന്തര വിപണിയില്‍ അസംസ്‌കൃത എണ്ണ വിലയില്‍ ഗണ്യമായ കുറവ്. എണ്ണ വില വീപ്പയ്ക്ക് 21 രൂപ കുറഞ്ഞ് 5827 ലേക്ക് എത്തി. ആവശ്യക്കാര്‍ കുറഞ്ഞതോടെയാണ് രാജ്യാന്തര വിപണിയില്‍ അസംസ്‌കൃത എണ്ണവിലയില്‍ കുറവുണ്ടായത്.
ആഗോളതലത്തില്‍ വെസ്റ്റ് ടെക്സസ് വിപണിയില്‍ അസംസ്‌കൃത എണ്ണ വില 0.03 ശതമാനം കുറവിലാണ് വ്യാപാരം നടത്തുന്നത്. വീപ്പയ്ക്ക് 68.56 അമേരിക്കന്‍ ഡോളറാണ് വില. ന്യൂയോര്‍ക്കില്‍ 72.31 ഡോളറിനാണ് ബ്രെന്റ് ക്രൂഡിന്റെ വില്‍പ്പന നടക്കുന്നത്.
അസംസ്‌കൃത എണ്ണവിലയിലുണ്ടായ ഇടിവ് രാജ്യത്തെ എണ്ണവിലയില്‍ പ്രതിഫലിക്കുമോ എന്ന് ഉറ്റുനോക്കുകയാണ് ഉപഭോക്താക്കളും നിരീക്ഷകരും.
രണ്ടാഴ്ചയിലെ ശരാശരി എണ്ണവിലയെ അടിസ്ഥാനമാക്കി ഓരോ രണ്ടാഴ്ച കൂടുമ്പോഴും രാജ്യത്തെ നികുതി നിരക്കുകള്‍ അവലോകനം ചെയ്യും. ഗുജറാത്തിലെ ജാംനഗറില്‍ ലോകത്തിലെ ഏറ്റവും വലിയ ഓയില്‍ റിഫൈനറി കോംപ്ലക്സ് നടത്തുന്ന റിലയന്‍സ് ഇന്‍ഡസ്ട്രീസ് ലിമിറ്റഡും റോസ്‌നെഫ്റ്റ് പിന്തുണയുള്ള നയാര എനര്‍ജിയും രാജ്യത്തെ ഇന്ധന കയറ്റുമതിക്കാരുടെ പട്ടികയില്‍ ഒന്നാമതാണ്.
എണ്ണ ഉത്പാദകര്‍ക്ക് ബാരലിന് 75 ഡോളര്‍ എന്ന പരിധിക്ക് മുകളില്‍ ലഭിക്കുന്ന ലാഭത്തിന് സര്‍ക്കാര്‍ നികുതി ചുമത്തുന്നു. വിദേശ കയറ്റുമതിയില്‍ റിഫൈനര്‍മാര്‍ നേടുന്ന മാര്‍ജിനുകള്‍ അടിസ്ഥാനമാക്കിയാണ് ഇന്ധന കയറ്റുമതിയുടെ ലെവി. ഈ മാര്‍ജിനുകള്‍ പ്രാഥമികമായി അന്താരാഷ്ട്ര എണ്ണ വിലയും ചെലവും തമ്മിലുള്ള വ്യത്യാസമാണ്.
രാജ്യാന്തര വിപണിയില്‍ ക്രൂഡ് ഓയില്‍ വില കുറഞ്ഞു; ഇന്ത്യയില്‍ ഇന്ധന വിലകുറയുമോ ?
