ഓസ്റ്റിന്‍: എലോണ്‍ മസ്‌കിന്റെ സ്വപ്‌നവാഹനങ്ങളിലൊന്നായ ടെസ്ല സൈബര്‍ട്രക്കിന്റെ ഉത്പാദനം കുറയ്ക്കാനും ഘട്ടംഘട്ടമായി അവസാനിപ്പിക്കാനും കമ്പനി ഒരുങ്ങുന്നതായി റിപ്പോര്‍ട്ട്. അമേരിക്കയിലെ ടെക്‌സസിലെ ഓസ്റ്റിനിലുള്ള ഫാക്ടറിയില്‍ മാത്രമാണ് നിലവില്‍ സൈബര്‍ട്രക്ക് നിര്‍മിക്കുന്നത്.
അടുത്ത വര്‍ഷം പകുതിയോടെ ഉത്പാദനത്തില്‍ മാറ്റം വരുത്തുമെന്ന് ടെസ്ല സി ഇ ഒ എലോണ്‍ മസ്‌ക് വെള്ളിയാഴ്ച വ്യക്തമാക്കി. സൈബര്‍കാബിന്റെ ഉത്പാദനം വര്‍ധിപ്പിക്കുന്നതിനായി സൈബര്‍ട്രക്ക് നിര്‍മാണത്തിനായി ഉപയോഗിക്കുന്ന സൗകര്യങ്ങള്‍ പുനഃക്രമീകരിക്കാനാണ് നീക്കമെന്ന് മസ്‌ക് തന്റെ സാമൂഹികമാധ്യമ പ്ലാറ്റ്ഫോമായ എക്‌സില്‍ കുറിച്ചു.
സൈബര്‍ട്രക്കിന്റെ നിര്‍മാണം മറ്റൊരു ഫാക്ടറിയിലേക്ക് മാറ്റുമോ അതോ പൂര്‍ണമായും നിര്‍ത്തുമോ എന്ന കാര്യത്തില്‍ കമ്പനി വ്യക്തത വരുത്തിയിട്ടില്ല. എന്നാല്‍ വാഹനത്തിന്റെ മുഖ്യ എന്‍ജിനീയറായ വെസ് മോറില്‍ നടത്തിയ പ്രതികരണം സൈബര്‍ട്രക്കിന്റെ ഉത്പാദനത്തിന് അവസാനമാകുമെന്ന സൂചന നല്‍കുന്നതാണ്. സൈബര്‍ട്രക്ക് മികച്ച സാങ്കേതികവിദ്യാ വികസനത്തിനുള്ള വേദിയായിരുന്നുവെന്നും അതിന്റെ സാങ്കേതിക പാരമ്പര്യം സൈബര്‍കാബിലൂടെ തുടരുമെന്നും അദ്ദേഹം എക്‌സില്‍ കുറിച്ചു.
മസ്‌കിന് ഏറെ പ്രിയപ്പെട്ട വാഹനങ്ങളിലൊന്നായി വിശേഷിപ്പിക്കപ്പെട്ടിരുന്ന സൈബര്‍ട്രക്കിന്റെ കാര്യത്തില്‍ നിര്‍ണായക തീരുമാനമുണ്ടാകുന്നത് അദ്ദേഹത്തിന് തിരിച്ചടികള്‍ നിറഞ്ഞ ഒരാഴ്ചയ്‌ക്കൊടുവിലാണ്. അമേരിക്കന്‍ ഇടക്കാല തെരഞ്ഞെടുപ്പില്‍ റിപ്പബ്ലിക്കന്‍ സ്ഥാനാര്‍ഥികള്‍ക്ക് പിന്തുണയുമായി മസ്‌ക് ചെലവഴിച്ച ഏകദേശം 50 കോടി ഡോളറിന്റെ പ്രചാരണ സംഭാവനകള്‍ പ്രതീക്ഷിച്ച ഫലം കണ്ടില്ല.
തുടര്‍ന്ന് ആര്‍ട്ടിഫിഷ്യല്‍ ഇന്റലിജന്‍സ് മേഖലയിലെ ഓഹരികളിലുണ്ടായ വില്‍പ്പന സമ്മര്‍ദം ടെസ്ലയുടെയും സ്‌പേസ് എക്‌സിന്റെയും ഓഹരികളെയും ബാധിച്ചു. തെരഞ്ഞെടുപ്പിന് ശേഷമുള്ള ആദ്യ രണ്ട് വ്യാപാരദിവസങ്ങളില്‍ ഇരു കമ്പനികളുടെയും ഓഹരികള്‍ 12 ശതമാനത്തിലധികം ഇടിഞ്ഞു. ഇതോടെ മസ്‌കിന്റെ ആസ്തിയില്‍ 1,1300 കോടി ഡോളറിന്റെ കുറവുണ്ടായതായി ബ്ലൂംബെര്‍ഗ് ബില്യണയേഴ്സ് ഇന്‍ഡക്‌സ് റിപ്പോര്‍ട്ട് ചെയ്തു. എന്നിരുന്നാലും ലോകത്തിലെ ഏറ്റവും സമ്പന്നനായ വ്യക്തി എന്ന സ്ഥാനം മസ്‌ക് നിലനിര്‍ത്തുകയാണ്. മൈക്രോസോഫ്റ്റ് സ്ഥാപകന്‍ ബില്‍ ഗേറ്റ്‌സിന്റെ ആകെ ആസ്തിയായ 1,2300 കോടി ഡോളറിനോട് അടുത്തതാണ് മസ്‌കിന്റെ രണ്ട് ദിവസത്തെ നഷ്ടമെന്നും റിപ്പോര്‍ട്ടില്‍ പറയുന്നു.
സൈബര്‍ട്രക്കിന്റെ വ്യത്യസ്തമായ രൂപകല്‍പ്പന ടെസ്ല ആരാധകരെയും മസ്‌ക് അനുകൂലികളെയും ആകര്‍ഷിച്ചിരുന്നെങ്കിലും സമൂഹമാധ്യമങ്ങളില്‍ വാഹനത്തിന് കടുത്ത വിമര്‍ശനങ്ങളും നേരിടേണ്ടിവന്നു. ചിലര്‍ അതിന്റെ രൂപകല്‍പ്പനയെ പരിഹസിച്ച് 'ഡംപ്സ്റ്റര്‍ ചിക്' എന്ന് വിശേഷിപ്പിച്ചു. വിപണിയില്‍ പ്രതീക്ഷിച്ച സ്വീകാര്യത നേടാനും വാഹനത്തിന് കഴിഞ്ഞില്ല.
2023-ല്‍ നടന്ന ടെസ്ല ഓഹരിയുടമകളുടെ യോഗത്തില്‍ പ്രതിവര്‍ഷം അഞ്ച് ലക്ഷം സൈബര്‍ട്രക്കുകള്‍ നിര്‍മിക്കാനാകുമെന്നായിരുന്നു മസ്‌കിന്റെ പ്രതീക്ഷ. എന്നാല്‍ സൈബര്‍ട്രക്കിന്റെ വില്‍പ്പന കണക്കുകള്‍ കമ്പനി പ്രത്യേകം പുറത്തുവിട്ടിട്ടില്ല. ഈ വര്‍ഷം മോഡല്‍ 3, മോഡല്‍ വൈ എന്നിവ ഒഴികെയുള്ള വാഹനങ്ങളുടെ ആകെ വില്‍പ്പന 37,000-ല്‍ താഴെയാണെന്നാണ് കമ്പനി റിപ്പോര്‍ട്ടുകള്‍ സൂചിപ്പിക്കുന്നത്. നിര്‍ത്തലാക്കിയ മോഡല്‍ എസ്, മോഡല്‍ എക്‌സ് എന്നിവയുടെ വില്‍പ്പനയും ഈ കണക്കില്‍ ഉള്‍പ്പെടുന്നു.
അമേരിക്കയില്‍ ടെസ്ലയ്ക്ക് മറ്റൊരു വാഹന നിര്‍മാണശാല കാലിഫോര്‍ണിയയിലുണ്ട്. എന്നാല്‍ ഏറ്റവും വിലകൂടിയ മോഡലുകളായ മോഡല്‍ എസ്, മോഡല്‍ എക്‌സ് എന്നിവയുടെ നിര്‍മാണം അവിടെ മസ്‌ക് നേരത്തേ നിര്‍ത്തിയിരുന്നു. മനുഷ്യസാദൃശ്യമുള്ള ഒപ്റ്റിമസ് റോബോട്ടുകളുടെ നിര്‍മാണത്തിനായി കൂടുതല്‍ സൗകര്യം ഒരുക്കുകയാണ് ലക്ഷ്യം.
ഇലക്ട്രിക് വാഹനങ്ങളുടെ വില്‍പ്പനയേക്കാള്‍ റോബോടാക്‌സി സേവനങ്ങളും മനുഷ്യസാദൃശ്യമുള്ള റോബോട്ടുകളുമാണ് ടെസ്ലയുടെ ഭാവിയെന്ന് മസ്‌ക് വ്യക്തമാക്കിയിട്ടുണ്ട്. എന്നാല്‍ ഈ പദ്ധതികള്‍ ഇപ്പോഴും പ്രഖ്യാപനങ്ങളുടെ ഘട്ടത്തില്‍നിന്ന് പൂര്‍ണമായും യാഥാര്‍ഥ്യത്തിലേക്ക് എത്തിയിട്ടില്ല.
രണ്ട് പേര്‍ക്ക് മാത്രം യാത്ര ചെയ്യാവുന്നതും സ്റ്റിയറിങ് വീല്‍, ആക്‌സിലറേറ്റര്‍, ബ്രേക്ക് പെഡലുകള്‍ എന്നിവയില്ലാത്തതുമായ സൈബര്‍കാബ് വൈകാതെ ടെസ്ലയുടെ മറ്റെല്ലാ വാഹനങ്ങളുടെയും ആകെ ഉത്പാദനത്തേക്കാള്‍ കൂടുതലായി നിര്‍മിക്കുമെന്നാണ് മസ്‌കിന്റെ അവകാശവാദം. കഴിഞ്ഞ വര്‍ഷം അവസാനത്തോടെ അമേരിക്കയുടെ പകുതിയോളം പ്രദേശങ്ങളില്‍ പൂര്‍ണ സ്വയംനിയന്ത്രിത റോബോടാക്‌സി യാത്രാസേവനം ലഭ്യമാക്കുമെന്നും അദ്ദേഹം പ്രഖ്യാപിച്ചിരുന്നു.
എന്നാല്‍ നിലവില്‍ ടെക്‌സസിലെ നാല് നഗരങ്ങളിലും ഫ്‌ളോറിഡയിലെ മൂന്ന് നഗരങ്ങളിലുമായി ഏഴ് നഗരങ്ങളില്‍ മാത്രമാണ് ടെസ്ലയുടെ റോബോടാക്‌സി സേവനം ലഭ്യമാകുന്നത്. ആല്‍ഫബെറ്റിന്റെ ഉപസ്ഥാപനമായ വെയ്മോ ഉള്‍പ്പെടെയുള്ള എതിരാളികളേക്കാള്‍ ടെസ്ല പിന്നിലാണ്.
റോബോടാക്‌സി സേവനത്തില്‍നിന്നുള്ള വരുമാനവും ലാഭവും കമ്പനി ത്രൈമാസ സാമ്പത്തിക റിപ്പോര്‍ട്ടുകളില്‍ പ്രത്യേകം വെളിപ്പെടുത്തിയിട്ടില്ല. ഇതോടെ സേവനം സാമ്പത്തികമായി ലാഭകരമാണോ എന്ന കാര്യത്തിലും വ്യക്തതയില്ല. സ്വയംനിയന്ത്രിത വാഹനങ്ങള്‍ നിരത്തിലിറക്കുന്നതിനുള്ള പ്രാദേശിക ഭരണകൂടങ്ങളുടെ അനുമതി നേടുന്നതും കമ്പനിക്ക് വെല്ലുവിളിയാണ്.
അതേസമയം, ഒപ്റ്റിമസ് മനുഷ്യസാദൃശ്യമുള്ള റോബോട്ടുകളും വില്‍പ്പനയ്ക്കായി വിപണിയിലെത്തിയിട്ടില്ല. റോബോട്ടുകളുടെ കൈകളുടെ പ്രവര്‍ത്തനം ഉള്‍പ്പെടെയുള്ള സാങ്കേതികവിദ്യകളുടെ വികസനം ഇപ്പോഴും പുരോഗമിക്കുകയാണെന്ന് അടുത്തിടെ നടന്ന വരുമാന അവലോകന യോഗത്തില്‍ മസ്‌ക് വ്യക്തമാക്കിയിരുന്നു.