ന്യൂഡല്ഹി: 200 കോടി രൂപയുടെ സാമ്പത്തിക തട്ടിപ്പും കള്ളപ്പണം വെളുപ്പിക്കലും സംബന്ധിച്ച കേസില് ബോളിവുഡ് നടി ജാക്വലിന് ഫെര്ണാണ്ടസിനെതിരെ എന്ഫോഴ്സ്മെന്റ് ഡയറക്ടറേറ്റ് (ഇ ഡി) നടപടികള് ശക്തമാക്കി. തട്ടിപ്പുകാരനെന്ന് ആരോപിക്കപ്പെടുന്ന സുകേഷ് ചന്ദ്രശേഖറുമായുള്ള ബന്ധത്തിന്റെ പശ്ചാത്തലത്തില് പണം വെളുപ്പിക്കല് കേസില് ജാക്വലിനെതിരെ കുറ്റം ചുമത്താന് ഡല്ഹിയിലെ പട്യാല ഹൗസ് കോടതി ഉത്തരവിട്ടു.
അതേസമയം, സുകേഷ് ചന്ദ്രശേഖറുമായി ബന്ധപ്പെട്ട ഡല്ഹി പൊലീസിന്റെ എംകോക്ക കേസില് ജാക്വലിന് ആശ്വാസം ലഭിച്ചിട്ടുണ്ട്. പ്രസ്തുത കേസില് കോടതി പുറത്തിറക്കിയ കുറ്റപത്ര ഉത്തരവില് ജാക്വലിന്റെ പേര് പ്രതിപ്പട്ടികയില് ഉള്പ്പെടുത്തിയിട്ടില്ല. പകരം, സാക്ഷികളില് ഒരാളായാണ് അവരെ പരിഗണിച്ചിരിക്കുന്നത്.
പട്യാല ഹൗസ് കോടതി സുകേഷ് ചന്ദ്രശേഖര്, ഭാര്യ ലീന മരിയ പോള്, ജാക്വലിന് ഫെര്ണാണ്ടസ് എന്നിവരുള്പ്പെടെയുള്ള പ്രതികള്ക്കെതിരെ കള്ളപ്പണം വെളുപ്പിക്കല് നിരോധന നിയമം പ്രകാരമുള്ള കുറ്റങ്ങള് ചുമത്താന് ഉത്തരവിട്ടു.
കേസില് പ്രാഥമികമായി ലഭ്യമായ തെളിവുകളുടെ അടിസ്ഥാനത്തില് പ്രതികള്ക്കെതിരെ ശക്തമായ സംശയം നിലനില്ക്കുന്നുവെന്നും അതിനാല് കള്ളപ്പണം വെളുപ്പിക്കല് നിയമം പ്രകാരം വിചാരണ നേരിടേണ്ടതുണ്ടെന്നും അഡീഷണല് സെഷന്സ് ജഡ്ജി പ്രശാന്ത് ശര്മ്മ നിരീക്ഷിച്ചു.
എല്ലാ പ്രതികളെയും ജൂണ് 3ന് കോടതിയില് ഹാജരാകാന് കോടതി നിര്ദേശിച്ചിട്ടുണ്ട്.
200 കോടി രൂപയുടെ തട്ടിപ്പുകേസുമായി ബന്ധപ്പെട്ട് ജാക്വലിന് ഫെര്ണാണ്ടസിന്റെ പേര് ഏറെക്കാലമായി ഉയര്ന്നുവരുന്നുണ്ടെങ്കിലും ഡല്ഹി പൊലീസിന്റെ എംകോക്ക കേസില് പ്രതിസ്ഥാനത്ത് ഉള്പ്പെടുത്തിയിരുന്നില്ല. എന്നാല് കള്ളപ്പണം വെളുപ്പിക്കല് അന്വേഷണത്തില് ഇ ഡി വ്യത്യസ്ത നിലപാടാണ് സ്വീകരിച്ചിരിക്കുന്നത്.
സുകേഷ് ചന്ദ്രശേഖറിന്റെ തട്ടിപ്പിലൂടെ സമ്പാദിച്ച പണം ഉപയോഗിച്ച് വാങ്ങിയ വിലപിടിപ്പുള്ള സമ്മാനങ്ങള് ജാക്വലിന് അറിഞ്ഞുകൊണ്ട് സ്വീകരിച്ചുവെന്നാണ് ഇ ഡിയുടെ ആരോപണം.
എന്നാല്, സുകേഷിന്റെ ക്രിമിനല് പശ്ചാത്തലത്തെക്കുറിച്ച് തനിക്ക് അറിവില്ലായിരുന്നുവെന്നും എല്ലാ ആരോപണങ്ങളും അടിസ്ഥാനരഹിതമാണെന്നും ജാക്വലിന് ഫെര്ണാണ്ടസ് ആവര്ത്തിച്ച് വ്യക്തമാക്കിയിട്ടുണ്ട്.
2022 ഓഗസ്റ്റ് 17ന് സമര്പ്പിച്ച കുറ്റപത്രത്തില് ഇ ഡി ജാക്വലിനെ പ്രതിയായി ഉള്പ്പെടുത്തിയിരുന്നു. സുകേഷില് നിന്ന് 5.71 കോടി രൂപയുടെ സമ്മാനങ്ങള് ജാക്വലിന് സ്വീകരിച്ചതായി അനുബന്ധ കുറ്റപത്രത്തില് ആരോപിക്കുന്നുണ്ട്. അതേസമയം, സുകേഷിന്റെ കബളിപ്പിക്കല് നടപടികളുടെ ഇരയാണ് താനെന്ന നിലപാടാണ് ജാക്വലിന് സ്വീകരിച്ചിരിക്കുന്നതെന്നും ഇ ഡി രേഖകളില് പറയുന്നു.
സുകേഷിന്റെ ക്രിമിനല് പശ്ചാത്തലം അറിയാമായിരുന്നിട്ടും അദ്ദേഹം നല്കിയ ആഭരണങ്ങള്, വിലപിടിപ്പുള്ള വസ്തുക്കള്, ആഡംബര സമ്മാനങ്ങള് എന്നിവ ജാക്വലിന് ഉപയോഗിച്ചിരുന്നുവെന്ന ആരോപണവും 2022ലെ ഇ ഡി കുറ്റപത്രത്തില് ഉന്നയിച്ചിട്ടുണ്ട്.