ന്യൂഡൽഹി: പാകിസ്ഥാൻ പ്രസിഡന്റ് ആസിഫ് അലി സർദാരി ഇന്ത്യക്കെതിരെ നടത്തിയ പരാമർശങ്ങൾ ശക്തമായി തള്ളി കേന്ദ്ര വിദേശകാര്യ മന്ത്രാലയം. ഇന്ത്യയുടെ ആഭ്യന്തര വിഷയങ്ങളിൽ അഭിപ്രായം പറയാൻ സർദാരിക്ക് യാതൊരു അവകാശവുമില്ലെന്ന് വിദേശകാര്യ മന്ത്രാലയ വക്താവ് രൺധീർ ജയ്സ്വാൾ വ്യക്തമാക്കി.
വാരണാസിയിലെ ഒരു മസ്ജിദുമായി ബന്ധപ്പെട്ട വിഷയത്തെ ചൂണ്ടിക്കാട്ടി ഇന്ത്യയിൽ മുസ്ലിം മതസ്ഥാപനങ്ങൾ ഭീഷണി നേരിടുന്നുവെന്ന തരത്തിൽ സർദാരി നടത്തിയ പരാമർശങ്ങളോടാണ് ഇന്ത്യ പ്രതികരിച്ചത്. ഇത്തരം പ്രസ്താവനകൾ ഇന്ത്യയുടെ ആഭ്യന്തര കാര്യങ്ങളിൽ ഇടപെടാനുള്ള ശ്രമമാണെന്നും ഇന്ത്യ അത് പൂർണമായും തള്ളിക്കളയുന്നതായും ജയ്സ്വാൾ പറഞ്ഞു.
'ഇന്ത്യയുടെ ആഭ്യന്തര വിഷയങ്ങളിൽ അഭിപ്രായം പറയാൻ പാകിസ്ഥാൻ പ്രസിഡന്റിന് യാതൊരു സ്ഥാനവുമില്ല. അദ്ദേഹത്തിന്റെ പരാമർശങ്ങൾ അടിസ്ഥാനരഹിതവും അനാവശ്യവുമാണ്,' വിദേശകാര്യ മന്ത്രാലയം വ്യക്തമാക്കി.
അതേസമയം, പാകിസ്ഥാന്റെ സ്വന്തം മനുഷ്യാവകാശ ചരിത്രവും ഇന്ത്യ വിമർശിച്ചു. മനുഷ്യാവകാശ ലംഘനങ്ങളുടെ പേരിൽ ലോകവ്യാപകമായി വിമർശിക്കപ്പെടുന്ന രാജ്യമാണ് പാകിസ്ഥാനെന്നും അവിടെ ന്യൂനപക്ഷ സമൂഹങ്ങൾ ദീർഘകാലമായി പീഡനങ്ങൾ നേരിടുന്നുണ്ടെന്നും ഇന്ത്യ ചൂണ്ടിക്കാട്ടി.
'വിവിധ മതവിഭാഗങ്ങളിലെ ന്യൂനപക്ഷങ്ങളെ ലക്ഷ്യമിട്ട് പീഡിപ്പിച്ച ദീർഘചരിത്രമാണ് പാകിസ്ഥാനുള്ളത്. അതിനാൽ സർദാരിയുടെ പരാമർശങ്ങൾ യഥാർഥ ആശങ്കയല്ല, രാഷ്ട്രീയ ലക്ഷ്യത്തോടെ നടത്തിയ ആക്രമണമെന്ന നിലയിലാണ് കാണേണ്ടത്,' ജയ്സ്വാൾ പറഞ്ഞു.
പാകിസ്ഥാന്റെ ദേശീയ നയങ്ങളിൽ മതവിദ്വേഷത്തിനും അസഹിഷ്ണുതയ്ക്കും വലിയ പങ്കുണ്ടെന്നും ഇന്ത്യ ആരോപിച്ചു. അതിനാൽ സർദാരിയുടെ പ്രസ്താവനകൾക്ക് യാതൊരു അടിസ്ഥാനവുമില്ലെന്നും അവ പൂർണമായും നിരാകരിക്കുന്നതായും വിദേശകാര്യ മന്ത്രാലയം ആവർത്തിച്ചു.
പാകിസ്ഥാൻ പ്രസിഡന്റിന്റെ പരാമർശം തള്ളി ഇന്ത്യ; 'മനുഷ്യാവകാശ ലംഘനങ്ങളുടെ റെക്കോർഡ് പാകിസ്ഥാന്റേത്'
