ബെംഗളൂരു: മുതിർന്ന ഐ.പി.എസ് ഉദ്യോഗസ്ഥനും കർണാടക സംസ്ഥാന പോലീസ് മേധാവിയുമായ കെ. രാമചന്ദ്ര റാവുവിനെ സർക്കാർ സസ്പെൻഡ് ചെയ്തു. അദ്ദേഹത്തിനെതിരെ സമൂഹമാധ്യമങ്ങളിൽ പ്രചരിച്ച ദൃശ്യങ്ങളിൽ 'അശ്ലീല പെരുമാറ്റം' കാണുന്നതായുള്ള ആരോപണത്തിന്റെ അടിസ്ഥാനത്തിലാണ് നടപടി. പദവിയുടെയോ സീനിയോറിറ്റിയുടെയോ പേരിൽ ആരെയും സംരക്ഷിക്കില്ലെന്ന് സർക്കാർ വ്യക്തമാക്കി.
സംഭവത്തിൽ കുറ്റം തെളിഞ്ഞാൽ കർശന നടപടി സ്വീകരിക്കുമെന്ന് വനിതാശിശുവികസന മന്ത്രി ലക്ഷ്മി ഹെബ്ബാൽക്കർ പറഞ്ഞു. 'മന്ത്രിയായുള്ള ഉത്തരവാദിത്തത്തോടെ പറയാം, തെറ്റുണ്ടായതായി കണ്ടെത്തിയാൽ സീനിയോറിറ്റി കണക്കാക്കാതെ നിഷ്കരുണം നടപടി ഉണ്ടാകും,' അവർ അറിയിച്ചു. സാമൂഹിക പ്രവർത്തകനായ ദിനേഷ് കല്ലഹള്ളിയും റാവുവിനെ സസ്പെൻഡ് ചെയ്യണമെന്ന് ആവശ്യപ്പെട്ടു.
അതേസമയം, ആരോപണങ്ങൾ രാമചന്ദ്ര റാവ് ശക്തമായി നിഷേധിച്ചു. പ്രചരിക്കുന്ന വീഡിയോ വ്യാജമാണെന്നും, എപ്പോൾ എവിടെ പകർത്തിയതാണെന്നോ തനിക്ക് അറിവില്ലെന്നും അദ്ദേഹം പറഞ്ഞു. ദൃശ്യങ്ങൾ എട്ട് വർഷം പഴക്കമുള്ളതാണെന്ന ചോദ്യത്തിന്, 'ബെലഗാവിയിൽ സേവനമനുഷ്ഠിച്ചിരുന്ന കാലത്തേതായിരിക്കാം' എന്നായിരുന്നു അദ്ദേഹത്തിന്റെ പ്രതികരണം.
'ഇത് എങ്ങനെ സംഭവിച്ചു, ആരാണ് ചെയ്തത് എന്നെനിക്ക് അറിയില്ല. ഇന്നത്തെ കാലത്ത് എന്തും കൃത്രിമമായി സൃഷ്ടിക്കാം. ദൃശ്യങ്ങൾ മുഴുവനായും അസത്യമാണ്,' എന്നും അദ്ദേഹം പറഞ്ഞു. തുടർനടപടികൾക്കായി നിയമോപദേശം തേടുമെന്നും റാവ് അറിയിച്ചു. ആഭ്യന്തര മന്ത്രിയെ നേരിൽകണ്ട് വിശദീകരിക്കാനായിരുന്നു ശ്രമം, എന്നാൽ അതിന് അവസരം ലഭിച്ചില്ലെന്നും അദ്ദേഹം വ്യക്തമാക്കി.
വൈറൽ ദൃശ്യവും സർക്കാർ നടപടിയും കർണാടകയിൽ വലിയ രാഷ്ട്രീയസാമൂഹിക ചർച്ചകൾക്ക് ഇടയാക്കിയിരിക്കുകയാണ്.
'അശ്ലീല ചിത്രങ്ങൾ' വൈറലായി; കർണാടക ഡി.ജി.പിയെ സസ്പെൻഡ് ചെയ്തു
