ഭോപ്പാല്‍: മധ്യപ്രദേശിലെ മാണ്ട്ല ജില്ലയില്‍ പൊലീസുമായുള്ള ഏറ്റുമുട്ടലില്‍ രണ്ട് വനിതാ മാവോയിസ്റ്റുകള്‍ കൊല്ലപ്പെട്ടു. ഇവരുടെ തലയ്ക്ക് മധ്യപ്രദേശ് സര്‍ക്കാര്‍ 14 ലക്ഷം രൂപ വീതം പ്രതിഫലം പ്രഖ്യാപിച്ചിരുന്നെന്നു മുഖ്യമന്ത്രി മോഹന്‍ യാദവ് പറഞ്ഞു.
മധ്യപ്രദേശ്- മഹാരാഷ്ട്ര- ഛത്തീസ്ഗഢ് മാവോയിസ്റ്റ് മേഖലയിലെ കെബി (കന്‍ഹ ഭോറാംദേവ്) ഡിവിഷനിലെ ഭോറാംദേവ് ഏരിയ കമ്മിറ്റിയില്‍ പെട്ടവരായിരുന്നു കൊല്ലപ്പെട്ട രണ്ട് വനിതാ നക്‌സലൈറ്റുകളെന്നു മധ്യപ്രദേശ് പൊലീസ് അറിയിച്ചു.
ബിച്ചിയ പൊലീസ് സ്റ്റേഷന് പരിധിയിലാണു വെടിവയ്പ്പ് നടന്നതെന്നു ഡയറക്ടര്‍ ജനറല്‍ പൊലീസ് (ഡിജിപി) കൈലാഷ് മക്വാന പറഞ്ഞു. ഒരു സെല്‍ഫ് ലോഡിങ് റൈഫിള്‍, ഒരു ഓര്‍ഡിനറി റൈഫിള്‍, ഒരു വയര്‍ലെസ് സെറ്റ്, ദൈനംദിന ഉപയോഗത്തിനുള്ള ചില വസ്തുക്കള്‍ തുടങ്ങിയവ സംഭവസ്ഥലത്തുനിന്നും കണ്ടെടുത്തു. മറ്റ് നക്‌സലൈറ്റുകള്‍ക്കായി തിരച്ചില്‍ പുരോഗമിക്കുകയാണെന്നു ഡിജിപി പറഞ്ഞു.
കന്‍ഹ ദേശീയോദ്യാനത്തിലെ മുന്ദിദാദര്‍- ഗണേരിദാദര്‍- പര്‍സതോള വനമേഖലയില്‍ മാവോയിസ്റ്റുകളുടെ സാന്നിധ്യമുണ്ടെന്ന ഇന്റലിജന്‍സ് വിവരത്തെത്തുടര്‍ന്നാണു സുരക്ഷാ സേന തിരച്ചില്‍ ആരംഭിച്ചത്. എന്നാല്‍ സുരക്ഷാ സേനയ്ക്കു നേരേ മാവോയിസ്റ്റുകള്‍ വെടിയുതിര്‍ത്തു. ഇതേ തുടര്‍ന്നു സുരക്ഷാസേന നടത്തിയ ശക്തമായി തിരിച്ചടിയിലാണ് രണ്ട് വനിതാ നക്‌സലൈറ്റുകള്‍ കൊല്ലപ്പെട്ടത്.
കൊല്ലപ്പെട്ട നക്‌സലൈറ്റുകളില്‍ ഒരാള്‍ മഹാരാഷ് ട്രയിലെ ഗഡ്ചിരോളി ജില്ലയിലെ കരോച്ചി പൊലീസ് സ്റ്റേഷന് കീഴിലുള്ള മുര്‍ക്കുടിയില്‍ താമസിക്കുന്ന കെബി ഡിവിഷനിലെ രാകേഷ് ഒഡിയുടെ ഭാര്യ മംമ്ത എന്ന രമാബായി ആണെന്ന് ഉദ്യോഗസ്ഥര്‍ പറഞ്ഞു. ഇവരില്‍ നിന്ന് ഒരു സിംഗിള്‍ ഷോട്ട് റൈഫിള്‍ കണ്ടെടുത്തു.
പ്രമീളയാണു കൊല്ലപ്പെട്ട മറ്റൊരു നക്സലൈറ്റ്. ഇവരില്‍ നിന്ന് ഒരു എസ് എല്‍ ആര്‍ കണ്ടെടുത്തു,
ഒന്നര മാസത്തിനിടെ രണ്ട് ഏറ്റുമുട്ടലുകളിലായി മധ്യപ്രദേശില്‍ ആറ് മാവോയിസ്റ്റുകളാണു കൊല്ലപ്പെട്ടതെന്നു പൊലീസ് ഉദ്യോഗസ്ഥര്‍ പറഞ്ഞു.