തിരുവനന്തപുരം: സംസ്ഥാന സര്ക്കാരിന്റെ 2026-27 സാമ്പത്തിക വര്ഷത്തെ ബജറ്റ് ജനുവരി 29ന് നിയമസഭയില് അവതരിപ്പിക്കുമെന്ന് സ്പീക്കര് എ. എന്. ഷംസീര് അറിയിച്ചു. പതിനഞ്ചാം നിയമസഭയുടെ അവസാന സമ്മേളനം ജനുവരി 20ന് ആരംഭിക്കും. അന്നുതന്നെ ഗവര്ണറുടെ നയപ്രഖ്യാപനവും നടക്കും. 32 ദിവസത്തെ സമ്മേളനമാണ് ഇതിന് നിശ്ചയിച്ചിരിക്കുന്നതെന്ന് സ്പീക്കര് പറഞ്ഞു.
രാഹുല് മാങ്കൂട്ടത്തില് എംഎല്എയ്ക്കെതിരായ സ്വകാര്യ പരാതികള് സംബന്ധിച്ചും സ്പീക്കര് പ്രതികരിച്ചു. ഒരു എംഎല്എയെ അയോഗ്യനാക്കാനുള്ള നടപടികള് ആരംഭിക്കണമെങ്കില് നിയമസഭാംഗങ്ങളില് ആരെങ്കിലും പരാതി നല്കേണ്ടതുണ്ടെന്നും, അത്തരത്തിലൊരു പരാതി ലഭിച്ചാലാണ് അത് പ്രിവിലേജസ് ആന്ഡ് എത്തിക്സ് കമ്മിറ്റിക്ക് കൈമാറാനാകൂവെന്നും അദ്ദേഹം വ്യക്തമാക്കി. ഇതുവരെ ഇത്തരത്തിലുള്ള ഒരു പരാതിയും ലഭിച്ചിട്ടില്ലെന്നും സ്പീക്കര് കൂട്ടിച്ചേര്ത്തു.
ബലാത്സംഗക്കേസില് ഒരു എംഎല്എ അറസ്റ്റിലായത് സഭയുടെ മാനത്തെ ബാധിക്കുന്നതല്ലെന്നും അദ്ദേഹം പറഞ്ഞു. 'ഒരു കൊട്ടയിലെ ഒരു മാങ്ങ ചീത്തയായാല് എല്ലാം ചീത്തയാണെന്ന് പറയാന് കഴിയില്ല. സമൂഹത്തില് ചിലര് തെറ്റ് ചെയ്താല് എല്ലാവരെയും കുറ്റപ്പെടുത്താനാവില്ല. ജനങ്ങള് ജനപ്രതിനിധികളില് നിന്ന് നല്ല പെരുമാറ്റമാണ് പ്രതീക്ഷിക്കുന്നത്. സ്ത്രീകളെ ബഹുമാനിക്കാന് എല്ലാവരും പഠിക്കണം,' എന്നും ഷംസീര് പറഞ്ഞു.
സംസ്ഥാന ബജറ്റ് ജനുവരി 29ന്; നിയമസഭാ സമ്മേളനം 20ന് ആരംഭിക്കും
