തിരുവനന്തപുരം: നടിയെ ആക്രമിച്ച കേസില് വിധി പ്രഖ്യാപിച്ചതിനു പിന്നാലെ അതിജീവിത ഇന്സ്റ്റാഗ്രാമില് പ്രതികരണം പോസ്റ്റ് ചെയ്തു. തന്റെ അക്കൗണ്ടില് ഇംഗ്ലീഷില് എഴുതിയ കുറിപ്പില് വിധിയില് അദ്ഭുതമില്ലെന്നാണ് അവര് പറയുന്നത്. വിധി നിരവധി പേരെ അമ്പരപ്പിച്ചിട്ടുണ്ടാകുമെന്നും പക്ഷേ തന്നെ അമ്പരപ്പിച്ചിട്ടില്ലെന്നും അവര് വിശദീകരിക്കുന്നു.
അതിജീവിതയുടെ കുറിപ്പ്:
എട്ട് വര്ഷം, ഒന്പത് മാസം, 23 ദിവസങ്ങള്... ഏറ്റവും വേദനാജനകമായ ഈ യാത്രയുടെ അവസാനമെന്നോണം വെളിച്ചത്തിന്റെ നേരിയ ഒരു കണിക ഞാന് കാണുന്നു. പ്രതികളില് ആറു പേര് ശിക്ഷിക്കപ്പെട്ടിരിക്കുന്നു. എന്റെ വേദനകളെ നുണയെന്നും ഈ കേസ് കെട്ടിച്ചമച്ച കഥയെന്നും പരിഹസിച്ചവര്ക്കായി ഞാന് ഈ വിധിയെ സമര്പ്പിക്കുന്നു. നിങ്ങള്ക്ക് ഇപ്പോള് അല്പം ആശ്വാസം കിട്ടുന്നുണ്ടാകുമെന്ന് ഞാന് കരുതുന്നു.
ഒന്നാം പ്രതി എന്റെ പേഴ്സണല് ഡ്രൈവര് ആയിരുന്നു എന്ന് എപ്പോഴും പറയുന്നവരോട് അത് ശുദ്ധമായ നുണയാണ്. അയാള് എന്റെ ഡ്രൈവറോ എന്റെ ജീവനക്കാരനോ എനിക്ക് ഏതെങ്കിലും വിധത്തില് പരിചയമുള്ള വ്യക്തിയോ അല്ല. 2016ല് ഞാന് വര്ക്ക് ചെയ്ത ഒരു സിനിമക്ക് വേണ്ടി പ്രൊഡക്ഷനില് നിന്നും നിയോഗിക്കപ്പെട്ട ഒരാള് മാത്രമാണ് അയാള്. ഈ ക്രൈം നടക്കുന്നതിന് മുന്പ് ഒന്നോ രണ്ടോ തവണ മാത്രമാണ് ഞാന് അയാളെ കണ്ടിട്ടുള്ളത്. അതുകൊണ്ട് ദയവായി നിങ്ങള് നിങ്ങളുടെ അഭിരുചിക്കനുസരിച്ച് കഥകള് പറയുന്നത് നിര്ത്തുമെന്ന് കരുതുന്നു.
ഈ വിധി പലരെയും ഒരുപക്ഷേ നിരാശപ്പെടുത്തിയിരിക്കാം. എന്നാല് എനിക്കിതില് അത്ഭുതമില്ല. 2020ന്റെ അവസാനം തന്നെ ചില അന്യായമായ നീക്കങ്ങള് എനിക്ക് ബോധ്യപ്പെട്ടിരുന്നു. കുറ്റാരോപിതരില് ഒരാളുടെ കാര്യത്തിലേക്ക് അടുക്കുമ്പോള് മാത്രം കേസ് അതുവരെ കൈകാര്യം ചെയ്തുവന്ന രീതിയില് നിന്നും മാറ്റം സംഭവിക്കുന്നു എന്നത് പ്രോസിക്യൂഷനും മനസിലായിരുന്നു.
കഴിഞ്ഞ കുറച്ച് വര്ഷങ്ങളായി എനിക്ക് ഈ കോടതിയില് തീര്ത്തും വിശ്വാസമില്ലെന്ന് പറഞ്ഞു കൊണ്ട് ഞാന് പലതവണ ബഹുമാനപ്പെട്ട സുപ്രിം കോടതിയെയും ഹൈക്കോടതിയെയും സമീപിച്ചിരുന്നു. ഈ പ്രസ്തുത ജഡ്ജിയില് നിന്നും ഈ കേസ് മാറ്റണമെന്നുള്ള എന്റെ എല്ലാ ഹര്ജികളും പക്ഷേ നിഷേധിക്കുകയായിരുന്നു.
നിരന്തരമായ വേദനകള്ക്കും കണ്ണീരിനും കടുത്ത മാനസിക സംഘര്ഷങ്ങള്ക്കുമൊടുവില് ഞാനിപ്പോള് തിരിച്ചറിയുന്നു. ''നിയമത്തിന് മുന്നില് ഈ രാജ്യത്തെ എല്ലാ പൗരന്മാരും തുല്യരല്ല''. തിരിച്ചറിവ് നല്കിയതിന് നന്ദി. ഉയര്ന്ന നീതിബോധമുള്ള ന്യായാധിപന്മാര് ഉണ്ടാവുമെന്ന് തന്നെയാണ് ഇപ്പോഴും വിശ്വസിക്കുന്നത്.
ഈ യാത്രയിലുടനീളം കൂടെ നിന്ന മനുഷ്യത്വമുള്ള സകല മനുഷ്യരെയും ഞാന് നന്ദിയോടെ ചേര്ത്തു പിടിക്കുന്നു.
അതുപോലെ അധിക്ഷേപകരമായ കമന്റുകളും പണം വാങ്ങിയുള്ള നുണക്കഥകളും ഉപയോഗിച്ച്എന്നെ ആക്രമിക്കുന്നരോട്, നിങ്ങള് അത് തുടരുക- അതിനാണ് നിങ്ങള് പണം വാങ്ങിയിരിക്കുന്നത്.
അതിജീവിതയ്ക്ക് പുറമേ നടി മഞ്ജുവാര്യരും കുറിപ്പ് പോസ്റ്റ് ചെയ്തിട്ടുണ്ട്.
മഞ്ജുവാര്യരുടെ കുറിപ്പ്: ബഹുമാനപ്പെട്ട കോടതിയോട് ആദരവുണ്ട്. പക്ഷേ, ഇക്കാര്യത്തില് നീതി പൂര്ണമായി നടപ്പായി എന്നുപറയാന് ആവില്ല. കാരണം കുറ്റം ചെയ്തവര് മാത്രമേ ഇപ്പോള് ശിക്ഷിക്കപ്പെട്ടിട്ടുള്ളു. ഇത് ആസൂത്രണം ചെയ്തവര്, അത് ആരായാലും, അവര് പുറത്ത് പകല്വെളിച്ചത്തിലുണ്ട് എന്നത് ഭയപ്പെടുത്തുന്ന ഒരു യാഥാര്ഥ്യമാണ്. അവര് കൂടി ശിക്ഷിക്കപ്പെട്ടാലേ അതിജീവിതയ്ക്കുള്ള നീതി പൂര്ണമാവുകയുള്ളു. പൊലീസിലും നിയമസംവിധാനത്തിലും ഞാനുള്പ്പെടെയുള്ള സമൂഹത്തിനുള്ള വിശ്വാസം ദൃഢമാകാന് അതുകൂടി കണ്ടെത്തിയേ തീരു. ഇത് അവള്ക്ക് വേണ്ടി മാത്രമല്ല ഈ നാട്ടിലെ ഓരോ പെണ്കുട്ടിക്കും ഓരോ സ്ത്രീക്കും ഓരോ മനുഷ്യര്ക്കും കൂടി വേണ്ടിയാണ്. അവര്ക്ക് തൊഴിലിടങ്ങളിലും തെരുവിലും ജീവിതത്തിലും സധൈര്യം തലയുയര്ത്തിപ്പിടിച്ച് ഭയപ്പാടില്ലാതെ നടക്കാന് കഴിയുന്ന സാഹചര്യമുണ്ടാകണം. ഉണ്ടായേ തീരൂ. അന്നും ഇന്നും എന്നും അവള്ക്കൊപ്പം.