ബീജിംഗ്: ചൈനീസ് കാര്‍ നിര്‍മ്മാതാക്കളായ സീക്കര്‍ തങ്ങളുടെ പുതിയ ഇലക്ട്രിക് വെഹിക്കിള്‍ (ഇ വി) ബാറ്ററികള്‍, വ്യവസായ പ്രമുഖരായ ടെസ്ലയും ബിവൈഡിയും ഉള്‍പ്പെടെയുള്ള മറ്റു കമ്പനികളേക്കാള്‍ വേഗത്തില്‍ ചാര്‍ജ് ചെയ്യുമെന്ന് അവകാശപ്പെട്ടു. അള്‍ട്രാ ഫാസ്റ്റ് ചാര്‍ജിംഗ് സ്റ്റേഷനുകള്‍ ഉപയോഗിച്ച് 10 മുതല്‍ 80 ശതമാനം വരെ ശേഷിയുള്ള ബാറ്ററികള്‍ 10- 5 മിനിറ്റിനുള്ളില്‍ ചാര്‍ജ് ചെയ്യാന്‍ കഴിയുമെന്ന് കമ്പനി അവകാശപ്പെടുന്നു.
താരതമ്യപ്പെടുത്തുമ്പോള്‍ എലോണ്‍ മസ്‌കിന്റെ ടെസ്ല പറയുന്നത് 15 മിനിറ്റ് ചാര്‍ജ്ജ് അതിന്റെ മോഡല്‍ 3-നെ 175 മൈല്‍ (282 കിലോമീറ്റര്‍) സഞ്ചരിക്കാന്‍ പര്യാപ്തമാക്കുമെന്നാണ്. എന്നാലത് കാറിന്റെ പൂര്‍ണ്ണ ശ്രേണിയുടെ പകുതിയില്‍ താഴെയാണ്.
അടുത്തയാഴ്ച മുതല്‍ ലഭ്യമാകുന്ന സീക്കറിന്റെ 2025 007 സെഡാന്‍, പുതിയ ബാറ്ററിയുള്ള ആദ്യ വാഹനമായിരിക്കും.
മൈനസ് 10 ഡിഗ്രി സെല്‍ഷ്യസ് തണുത്ത കാലാവസ്ഥയില്‍ പോലും ബാറ്ററിയുടെ ശേഷിയുടെ 10 മുതല്‍ 80 ശതമാനം വരെ ചാര്‍ജ് ചെയ്യാന്‍ അരമണിക്കൂര്‍ സമയമാണ് ആവശ്യമായി വരികയെന്ന് കമ്പനി പറഞ്ഞു.
'ടെസ്ലയുടെ ചാര്‍ജിംഗ് സാങ്കേതികവിദ്യ ഇപ്പോള്‍ മുന്‍നിരയിലുള്ളതല്ലെന്നും കുറച്ചുകാലമായി അത് നിലവിലില്ല' എന്നുമാണ് കണ്‍സള്‍ട്ടന്‍സി സ്ഥാപനമായ സിനോ ഓട്ടോ ഇന്‍സൈറ്റ്സിന്റെ സ്ഥാപകനും മാനേജിംഗ് ഡയറക്ടറുമായ ടു ലെയെ ഉദ്ധരിച്ച് ബി ബി സി റിപ്പോര്‍ട്ട് ചെയ്തത്.
സീക്കറിന്റേത് ധീരമായ അവകാശവാദങ്ങളാണെന്നും വിശ്വസിക്കാമെന്നും എന്നാല്‍ ഏറ്റവും വേഗത്തില്‍ ചാര്‍ജ് ചെയ്യുന്ന ബാറ്ററി സീക്കറിന്റേതല്ലെന്നും വേഗത്തില്‍ ചാര്‍ജ് ചെയ്യുന്നവയിലൊന്നെന്നത് അവര്‍ക്ക് മികവാണെന്നും ടു ലെ പറഞ്ഞു.
ചൈനയിലെ മത്സരം അവിശ്വസനീയമാംവിധം കഠിനമാണെന്നം ബി വൈ ഡി പോലുള്ള ബ്രാന്‍ഡുകള്‍ സ്‌കെയിലിനും വില്‍പ്പനയ്ക്കും മുന്‍ഗണന നല്‍കുമ്പോള്‍, സീക്ര്‍, ലി ഓട്ടോ, നിയോ തുടങ്ങിയ ബ്രാന്‍ഡുകള്‍ പരമാവധി ചാര്‍ജിംഗ് അനുഭവം വര്‍ധിപ്പിക്കുന്നതില്‍ ശ്രദ്ധ കേന്ദ്രീകരിക്കുന്നുവെന്നാണ് ചൈന ആസ്ഥാനമായുള്ള കാര്‍ വ്യവസായ കമന്റേറ്ററായ മാര്‍ക്ക് റെയിന്‍ഫോര്‍ഡ് പറയുന്നത്.
സീക്കറിന്റെ മാതൃകമ്പനിയായ ഗീലിക്ക് യു കെ ആസ്ഥാനമായുള്ള ലക്ഷ്വറി സ്പോര്‍ട്സ് കാര്‍ ബ്രാന്‍ഡായ ലോട്ടസും സ്വീഡന്റെ വോള്‍വോയും ഉള്‍പ്പെടെ നിരവധി ബ്രാന്‍ഡുകള്‍ സ്വന്തമായുണ്ട്.
മെയ് മാസത്തില്‍ സീക്കറിന്റെ ഓഹരികള്‍ ന്യൂയോര്‍ക്ക് സ്റ്റോക്ക് എക്‌സ്‌ചേഞ്ചില്‍ വ്യാപാരം ആരംഭിച്ചു. 2021ന് ശേഷം ഒരു ചൈനീസ് കമ്പനിയുടെ ആദ്യത്തെ പ്രധാന യു എസ് വിപണി അരങ്ങേറ്റം അടയാളപ്പെടുത്തി.
പ്രാരംഭ പബ്ലിക് ഓഫറിംഗില്‍ (ഐ പി ഒ) നിശ്ചയിച്ച വിലയേക്കാള്‍ 27 ശതമാനം താഴെയാണ് ഓഹരികള്‍ ഇപ്പോള്‍ ട്രേഡ് ചെയ്യുന്നത്.
ചൈനീസ് നിര്‍മ്മിത ഇലക്ട്രിക് കാറുകള്‍, സോളാര്‍ പാനലുകള്‍, സ്റ്റീല്‍, മറ്റ് സാധനങ്ങള്‍ എന്നിവയ്ക്ക് ബൈഡന്‍ ഭരണകൂടം വലിയ താരിഫ് വര്‍ധനവ് പ്രഖ്യാപിക്കുന്നതിന് ഏതാനും ദിവസങ്ങള്‍ക്ക് മുമ്പാണ് ഈ ലിസ്റ്റ് വന്നത്.
ചൈനയില്‍ നിന്നുള്ള ഇ വികള്‍ക്ക് 100 ശതമാനം അതിര്‍ത്തി നികുതി ഉള്‍പ്പെടെയുള്ള നടപടികള്‍, അന്യായ നയങ്ങള്‍ക്കുള്ള മറുപടിയാണെന്നും യു എസ് ജോലികള്‍ സംരക്ഷിക്കാന്‍ ഉദ്ദേശിച്ചുള്ളതാണെന്നും വൈറ്റ് ഹൗസ് പറഞ്ഞു.
യു എസിലെയും യൂറോപ്യന്‍ യൂണിയനിലെയും മറ്റ് പ്രധാന കാര്‍ വിപണികളിലെയും ഉദ്യോഗസ്ഥര്‍ ചൈനീസ് ഇ വി കമ്പനികളുടെ അതിവേഗ വിദേശ വിപുലീകരണത്തെക്കുറിച്ച് കൂടുതല്‍ ആശങ്കാകുലരാണ്.